54r 153
] injc ovican qujçaz aço tetlanximaz aço tetlan aqujz aço cueitl vipilli tepan canaz aço tetlaqualiz tetlan quateujz auh in çioatl imjqujztevical iez vmextin qujnquatepipitzinjzque qujnquatexaxamanjzque ic tocaiotilo in tetlanxinquj quatepitzic quatexamac ioan injc ovican qujçaz aço monamacaz moquaz mjz motoloz motlamjz âcan avia acan tlacaco tlamati injc nemj iichtequj motlâtlacuja tetlâtlatlalochtia tetlacujcujlia tetlatlaçaltia tecacalxaputla tequjqujmjliquanja çan iuh aviloujti much qujmotequjtia in olli in patolli pâpatoa ôollama motlatlanjtoa tetlatlanjtoa moxixicoa texixicoa texixictlanj ontetlatlalia muchi qujtlanjtoa in jchan onoc muchi patolco tlachco qujtlamja in jntetzon in jnnepachol itatzin inantzin muchi qujchteccaqujxtia in açoc cana itlatzin tlatilo çan nen qujpiquj çan nempanca in motlanjtoa aoc tle in qujxquetza aoc tle in jtlatlanjtol injc tlanamjctiz injc vel oviti aoc tepapatla patolco tlachco oviti chiquati qujchiquatilia anoçe qujmomachtia in ollatolli patollatolli ollatole patollatole auh amo ivian iectli amo ivian tecauh motqujtica tzotzomatli tatapatli âcaxe âcome ioan tecoco tetolinj cocoliztli qujteittitia [fol r