cf_04_iv

folio: 32r

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

32r 78

] No ioan mjtoa aiac vel maoaia anoço motlaujtequja motepotlamja motecujnja moxoquechaquja moxocuetlanja mocxicueloa ic tlatenmachililoia îtoloia ma qujcencuj ca omonauecauj qujtoznequj ca nauecatl in jpan omococo No ioan mjtoa in aqujn ypan tlacatia qujpãtiaia qujnemactiaia in tonalpouhque iuh qujtoaia mocujltonoz ioan tiacauhtiz oqujchtiz tlamauhtiz tlamamauhtiz momaujzçotiz tonalchicaoac iez auh aiamo caltiaia in jpan chicome coatl iuh qujtoaia oc cenca vel ipan qujtonalchicaoaia injc cenca mocujltonoz injc mâceoale nemaque ilhujle mochioaz ipampa in chicome coatl ca qujxiptlatiaia in tonacaiotl in tlaolli motqujtica qualonj ioan in iuh qujtoa in chicometioaia ipan tonalli muchipa qualcan Auh in qujoaltoqujlia macujlli calli ioan chiquacen cuetzpalin iuh mjtoaia njmã amo qualli tonalli in jonteixtin y intlatoaian macujlxochitl ioan mjctlan tecutli in aqujn ipan tlacatia in oqujchtli in çioatl njman atle imâceoal mochioaia çan oalnenenqujçaia motqujtica netolinjliztli in ilhujl in jmâceoal ynemac ioan çan tlatolli cololotinemj tlatolli cololhujtinemj tlatolli itlaqual tlacatl qujcaoatztinemj çan jc nemj in tlacatl qujcuecuetlanja tlacatl qujcocomonja iuh mjtoa [fol r

32r 79

] injc aio in jquac on oitla contechioalti in on oitla conteecaujlti in on oitla ic onteatlatzicujnj macel ica ontlacanemj in tlâpalpul iollochicopul iollopatlachpul iollotlauelilocapul quennel noço macujltonale ca ie iuhque in mamacujltonaleque aquen tlatta ca nel ic monotzque in amo ceme tlacacemelleque ca iuhcan tlacatque Auh injc qujqualtiliaia tonalpouhque qujteilhuiaia aiamo vel ipan maltiz in ipan otlacat ma oc qujchia in chicome coatl ca vmpa oc nen titlatemachia ça qujn iê qujmattiuh intla nemjz aço ça nen itla imâceoaltitiuh ca itla maçeoaliztica qujmocuepililitiuh yn jtonal ipampa in iuh qujtoaia in jpan chicome tonalli qujlmach mochipa qualcan vel vncan in tlatoaia in chicome coatl in qujxiptlatiaia tonacaiotl motqujtica necujltonolli Ioan no qujtoaia intla tlamocujtlaujz motlacujtlaujz iel iêel mochioaz ca ic qujzcaltiaia in jtonal qujtoznequj ic qujqualtilia vncan qujmotlaxilia qujmopopolhuja injc otlamauhcaittililoc ipan tonalli otlacat ic ixcoian inôma itlamaceoaliztica qujmoieccaqujxtilia in jtonal qujmonomâvilia inezcaliliztica