36v 89
] Tezcatlipuca titlacaoa injc qujtlaliaia ixiptla itoca Omacatl çan no ivi in mjchioaia ic qujchichioaia injc qujtlaliaia auh in aqujn qujnequja qujtlaliaia in jxiptla Omacatl matlacpoaltica in qujpiaia ychan ipan in qujtlaliaia vme acatl tonalli auh intla ie itla vel maailia in aqujn oqujtlali qujtoznequj intla ie tlapiuja ixneçi iaxca itlatquj aocmo qujcaoaliztlamatia çan qujcentlaliaia qujcencalaqujaia in jchan vecauhtica qujpiaia auh intla ie oqujnec in qujcaoaz in aocmo qujpiaz çan no ipan in qujcaoaia vme acatl tonalli çan iee qujmattiuja in jtonal ipan in qujtlaliaia no ipan in qujcaoaia vmpa concaoaia in jteupan in jcalpulco omacatl qujtlenamaqujlitiuh auh vmpa canatiuh in aqujn oc iê oqujnec qujpiaz ichan qujcujcatiaia in calpuleque ic tetlatlaqualtia in chane tlatlaqualo aatlioa yn jchan auh in oiooac tlatlaoano çan ie iuh tlatlalilli çan ie iuh tlatecolli çan vncan tectica çan ie vncan tlantica çan ie vncan qujmattiaia in matlacpoaltica pialoia techan iquac calaquja no iquac qujçaia auh mjtoa in aqujn ipan tlacatia qujtoaia mocujltonoz motlacamatiz ioan vel muchioaz in jnetlaiecoltiliz in tlein maailiz amo nenqujçaz vel [fol v