cf_04_iv

folio: 43v

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

43v 110

] qujtlaolololtia qujtlatepeoaltia qujtlamamaca injc mochi ioan qujtlatizque in ie iuhquj in oqujcencauhque evillotl in jquac ie choqujliloz oiaomjc oc cemjlhujtica in jeujllo icalpulco cemjlhujtl in ca cemjlhujtl in eoatica auh qujnjquac in ioalnepantla qujtlatiaia vmpa in qujtocaiotiaia tevitoalco quauhxicalco tzompantitlan auh intla çã otlalmjc oztomecatl qujtoznequj intlacamo oiaomjc in aço çan ococolizcujc çan ie no ivi in qujchichioaia ieujllo iece çan ichan in tlatlaia amo ioalnepantla oc achi tonatiuh iquac in ie onmotzcaloa onmopiloa tonatiuh qujtlatiaia No ioan mjtoa in jquac ypan in ce coatl tonalli intla ipanti ipan motlalia in jquac oiaotlatoloc oteiaotlalhujloc in omjto in otecaqujtiloc iaoiotl vel iqua ipan vnpeoaia in iaoc vncan iaoqujxoaia ipan otlatocoia ipan vnneotemaloia vnmotema onmacocuj onmolinja eoa nênemj icxiconana in jxqujch quauhtlocelotl auh in aqujn ipan otlacat ce oçelotl tonalli qujtoaia qujpãtiaia qujnemactiaia in tonalpouhque tlacnopilhujanj ilhujle mâceoale muchioaz mocujltonoz vnca qujquanj iez auh intlaca mouellamaceoa in iuhquj itonal in amo ipan muchioa in jnemac in jcnopil çan iehoatl [fol v

43v 111

] qujmitlacalhuja qujmopopolhuja mjtoa ineviian conmocaujlia qujmotlâçolmjctilia Eta yn aqujn ipã otlacat in aiamo caltiaia qujn ipã caltiaia in Ey maçatl iquac qujtocamaca ipampa ie mjieccan omjto in eitioaian tonalli in jquac tlacemjlhujtiltia qujqualittaia in tonalpouhque iehoatl ic contlatotoqujliaia vmpa qujtlatequjniaia vmpa contlachieltiaia injc cenca qujtonalchicaoaia Auh in qujtoqujlia vme mjqujztli iuh qujtoa amo qualli atle vncã ca mâceoalli Auh in ey maçatl iuh qujtoa qualli tonalli ie omjto in eitioaia muchipa qualcan vncan ca tlacnopilhujliztli in iuh qujteilhujaia tonalpouhque Auh in navi tochtli in tlanauhcaiotia tonalli in nauhcaiopa tlavica tlacemjlhujtiltia amo no qualli iuh qujtoa in jzqujcan tlanauhcaiopan tonalli muchi amo qualli atle vncan ca qualli nemactli