40r 99
] jntzontecon yn jmelchiqujuh ca amo cácujque qujnencujque injc oqujttaque in tachcauhiotl in veueiotl injc ie petlati ie icpalti injc ie contlanevi in jnpetl in jmjcpal in puchteca Auh in y timotolinja telpuchtle intla itla mocnopil momâceoal mochioaz intla itla ipan mjtzpoaz totecujo ca oc toconjttaz oc toconmaujçoz in tecoco in tetolinj in aiecoliztli in teiacacpa qujqujz in iuhquj motzaqua in aoacan tepeoacan ca oc vmpa onqujçaz ticiammjqujz timociappoaz timociauhquetztiaz titonalciauhtiaz teecaciiauhtiaz tixtlaltzin timochiutiaz tixtlalteuhpipixauhtiaz mjxquatzin tlatlatiaz mjtonaltzin ticmacujtiaz vel timaliviz in texomolo in tecaltech in tetlatzacujltitlan timotololtitiez mocujtlaxcol motech motetecatiez timâaqujz timocacalaqujz timoqujqujxtiz in aoacan tepeoacan timotzôtzonaz timocacapanjz qujtoznequj ac aço can tle uel onmochioaz ac aço can tle onmaqujtiz in motiamjc in mocnopillo in monentlamatia ca uel icnoioaz in moiollo mjxaiotzin ticmatentiez amo ticaxcanviz in mocneliloca ca timjhiiotamachioaz vel ontlamjz in mjhiio in motlapaliujz in aço cana atlauhitic atlauhcamac tlacopac tetl itzintlan quavitl itzintlan timocochitiz in aço cana timopopoliujtiz mjtztlatiz [fol r