10r 25
] aocmo qujpepechtia ioiooac in moquetza tlachicque inchã cacalaquj tlatlapevia aquenmã tlapohuj in jiollo âvel ca in maca tleconj auh aoc quen qujmati amo qujtlatzilhuja amo yvic eoa amo qujtlaeltia in manel ça xaiocujtlatl in çan iuhquj tetzacpol chapantica anoce moca çaioli çaiollo moca tlaçolli tlâtlaçollo ça iuhquj qujtoloa iuhquj qujçolotza qujltequj iuhqujn chichi motempapaloa Intlaca oc tle qujtta qujtlaoanaz ic moccoviz qujcujtivetzi in jtilma yn jmaxtli icnoiotl ipampa qujmottitia aocmo vel motlacaoaltia moiollotechioa njman aoqujc vellacaconemj tlacaco tlamati in ma oc ivian oncemjlhujti onocuel ivintic tequjxocomjc onocuellapolo tlâelivintic aocmo qujmati ça mjxicquetza motzonjcquetza cujtlanexiuhtinemj ixtenexiuhtinemj ixchichilivi ixchichilpul quapôpoliuhtinemj quatzomaiuhtinemj quapôpolpol quatzômapol [fol r