15r 38
] çan nen vetzi yn jçiaujz in jtlapaliviz çan monenencoa Navi itzcujntli cemjlhujtonalli in aquj' ipan tlacatia iuh mjtoaia motlacamatiz iciuhca neciz in jtech monequj in jauh yn jtlaqual in maca nelle ai cemjlhujtl aneztica in campa tepal cevi iiollo in vmpa pâti vmpa ihiiocuj vmpa qujtlaça cemjlhujtl auh ça vmpa cana tepal qujcnopilhuja in jntech monequj ipilhoan injc ihiiocujzque ainemachpan in neçi qujqua amo qujmati in campa oallauh inenca ivtlatocaia intlanel çan tepiton itla onai itla contequjpanoa njman neçi in jneiollaliliz itla qujcnopilhuja yoan iuh qujtoaia intla itzcujnnemjti in itzcujntli itonal mvch vel moquetzazque oapaoazque in jtzcuj'oa aiac cocolmjqujz iuhqujn tlanecujlivi iuhqujn tlatexaliuj iuhqujn tlapipitzca mjtoaia quenel noço itonalecapooa in itzcujnti injc vel itech mochioa itzcujnnemjtiliztli ixqujch qujnnamaca auh ixqujch tlacati mvch quachqujçaia no ic mocujltonoaia [fol r