cf_04_iv

folio: 45v

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

45v 117

] motqujtica necujltonolli netlamachtilli in iuh qujtoaia tonalpouhque auh in aqujn vncan tlacatia much qujnemactiaia in papaqujnj iez âaujenj tecêceltianj tececemeltianj camanale camanaloanj vetzqujztli queoa cemjcnjuhtli tecêcemjcnjuh muchi tlacatl itlaço novian vel tetlan motlalia noviian tepal vntlaqua ontlachia aiac qujiolitlacoa ipampa in iuhquj itonal oçomatli auh intla cioatl cenca mocujltonoz itla uel mailiz uel muchioaz in jtiamjc vellanecujloz vel motlacâtiz qujhimatiz qujtlâtlamachiz in jtiamjc in jtlaca amo actiuetziz amo caxaoaz vel mochioaz in jnanauh in tlein qujmonanauhtiz ipampa in chicometioaia tonale ca iuh ca inemac Auh in chicuei malinalli no achi qujqualittaia çan novian iuhquj in ixqujch chichicueey tonalli Auh in chicunavi acatl çan njman amo qualli ipampa qujlmach itlatoaia itlacemjlhujtiltiaian Tlaçolteutl motqujtica tlaçolli in aqujn vncan tlacati ie omjto njman atle qualli qujmâçeoa çan vncan ca itelchioaloca iquequeloloca icuecuenochichioaloca iaujlqujxtiloca Eta Noviian iuhcan jn in jzqujcan chicunavitioaia in iuh ie mjieccan omjto [fol v

45v 118

] Auh in jpan matlactli oçelotl ie vel qualcan in iuh ie mjieccan omjto itlatollo iuh qujtoa qujlmach in matlactioaian tonalli in izqujtetl tlamatlactetilia tonalli vncan itlatoaia in Tezcatlipuca in jpan machoia tto in aqujn vncan tlacati cenca qujqualittaia qujtoaia ca tematian in otlacat imatian itlatoaia in tlacatl totecujo Tezcatlipuca intla nemjz ca mâceoale iez ic njman iquac caltiaia auh intla qujnequjzque iniollotlama in oc conchololtizque qujn c vmpa qujmattivia in tonaltzonco iquac caltiaia in jpan matlactlomej olin ipampa in mochi tonaltzontli cenca qujqualittaia ic cenca uel vncan qujntonalchicaoaia in jpan qujmaltiaia Auh in matlactli oce quauhtli ioan matlactli omome cozcaquauhtli iuh qujtoa onteixti çan chico qualli amo çan centettitica vme vitz qujtoa in aqujque ipan tlacatia in onteixti tonalli qujn çen jpan qujmaltiaia in tonaltzontli vmpa qujqualtiliaia in jntonal Iehoatl in in njcan cencalpan tonaltzontli matlactli omej olin injn oc cenca qujqualittaia ipampa in qujtlamjtica yn jca tlantica ica tzonqujztica matlactli omej tonally auh in quenamj imâceoal vncan tlacatia ie mjieccan omjto