28r 68
] Moquetza ce qujaujtl injn mjtoaia njman amo qualli tonalli motqujtica teuhtli tlaçolli icnoiotl icnotlacaiotl tlaciaujliztli tlacococaviliztli teopouhcaiotl atle onqujçaliztli atle oneoatinemjliztli ipampa in jpan y tonalli iuh mjtoa ca vncan temoia in moteneoa cioateteo âtlacacemelleque teca mocaiaoanj ic cenca qujntlaquauhnaoatiaia in tepilhoan in aiac qujçaz aiac vtli qujtocaz çan cali onozque iuh qujmjlhujaia maca xonqujçaca anmotenamjctizque ca temo ca tlalpan açi in çioapipilti ic qujntlamauhcaittiliaia in tetaoan injc amo aca tennecujliviz ixnecujliujz tenpatziujz itech qujneoaz in jquac in in noviian çioateupan çioateucalli noujian tlamanaloia ca noviian cecentetl mãca in çioateucalli cecentlaxilacalpã vncan in omaxac teteujtl qujmonquequentia in vmpa catca ymjxiptlaoan macujlteme in teme tecpantoca tlaolxaoalti moolxauhque in aqujn ivicpa monetoltiaia qujntlaquentia yn jquac in intemoia yn jntlapoalpan in jpan tonalli temoia izqujteme amateteujtl qujnquentia Auh yoan no iquac vncã mjquja in quauhcalco onoca in jtla ic cate in vei qujtzacuticatca aço tetlanxinquj anoço ichtecquj in anoço [fol r