3-relacion-de-chimalpahin

3 Relacion de Chimalpahin

folio: 156r

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

156r 302

IV Tochtli xihuitl Nican ypan in yn momiquillico Huitzillihuitl tlahtohuani Tenochtitlan ynîn ypiltzin yn Acamapichtli yn tlahtocat cenpohualxihuitl ypan chiquacen xihuitl auh çân niman iquac motlahtocatlalli yn ipiltzin yn itoca Chimalpopocatzin auh yn Itzcohuatzin tlacateccati ytlan quinanamiqui auh yn ipilhuan quincauhtia yn tlahtohuani Huitzillihuitl yn tlahtocapipiltin macuiltin ynic ce ytoca Teotlatlauhqui ynic ome ytoca Huehue Cuitlahuatzin ynin ompa tlahtocatito yn Itztapallapan ynic ey ytoca Huehue Moteuhcçoma Ylhuicaminatzin ynic nahui cihuatl ytoca Yaocihuatl ynin ompa quihualmitlani yn Cohuatlychan tlahtocapilli ytoca Toyaotlancatzin ynîn ipiltzin yn Huehue Cuixtecatl tlahtohuani Cohuatlychan auh yc ompa tlacatito yn itoca Huehue Tepollomitzin auh macihui yn ompa quichihuato yn inântzin y Cohuatlychan camo ma ompa ne ca çan nican Mexico nemico ytlan yn itlatzin

156r 303

Huehue Moteuhcçoma Ilhuicaminatzin ynic macuilli yn ipilhuan Huitzillihuitl {ça no} cihuatl amo huel momati yn itoca

156r 304

Auh yn oc cequintin huehuetque yniuh quimachiyotia yhuan quinpiltzîntia yn Huitzillihuitl yn yzca yntoca ynic ce ytoca Huehue Eleltzin ynic ome ytoca Huehue çaca ynic ey ytoca Citlalcohuatl ynic nahui ytoca Aztacohuatl ynic macuilli ytoca Axicyotzin ynic chiquacen ytoca Quauhtzitzimitzin ynic chicome ytoca Xiconoc ynic chicue ytoca Tlacacochto

156r 305

Auh çâ no ypan in yn IV Tochtli xihuitl y motlahtocatlalli Quauhtlehuanitzin Tlayllotlac teuhctli tlahtohuani Tzaqualtitlan Tenanco Amaquemecan ynin ypiltzin yn Itztlotzin Tlayllotlac teuhctli auh yehuatl tlahtocatizquia yn inyacapâ yn itoca Huehue Chimalpahintzin auh çan mocauh ynic mitohua motenehua Huehue Chimalpahintzin Mocauhqui {auh no yquac yn ipan in motlahtocatlalli ÿn Totequixtzin tlahtohuani Opochhuacan Chalco }

156r 306

V Acatl xihuitl Nican ypan in in ye quitohua yn Cohuaçacatzin ye yxtlamati ye mozcallia yn quito aquin in yn ipân ca y nopetl ÿn nocpatl yn Mamalhuaçocatontli yquac quimicti auh chiuhcnauh xihuitl yn ipânpa tlahtocat yn inantzin yn Cohuaçacatzin yn Amaqmecan yn ihuan Cohuatzin teuhctli Mamalhuaçocân ychan