cf_12_xii

folio: 58v

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

58v 181

] Auh in Españoles çã njman amo mamana auh in oqujtlazque tlequjqujztli cenca tlaiovac poctli motecac Auh in qujmotoctitimanca in tetlaquetzalli netlaloloc yoan in jxqujchtin tlapanco onoca valmotepeuhque veca netlaloloc nec qujvallecavia in tlequjqujztli contecaco temalacatitlan auh in jcpac vitzilobuchtli oc nen tlapiaia qujvitequja in teponaztli iuhqujn ontetemj qujvitequj teponaztli auh njmã ic ontlecoque vmentin Españoles vmpa qujmonvivitequjto auh in oqujmonvivitequjto in ca valmaiauhque qujnvalchicanauhque auh in quaquachictin in jxqujchtin in tiacavan in acaltica tlaiecoaia muchintin valqujzque vallalvacaqujzque auh in tetlanelhuja in telpopotzitzinti çan iehoãtin in qujvalhujvicaque in [fol v

58v 182

] acalli Auh in ie iuhquj in tiaiacavan nec qujmottilia in caltzalantli vellatotoca vel netzatzililo qujtoa Tiacavane ma vallatotoca auh in ie iuhquj in oqujttaque in Españoles in ie impan monamjquj in ie qujntotona njmã ic mocototztlalique moteputztique vel totoca motlaloa necoccampa in valmjnaloia in tlatzontectica yoan necoccampa in valtepacholo qujn vmpan xolloco patito imjhio qujcujto vmpa valmomanato njman ie ic valnecuepalo Auh in iehoantin Españoles njman ic no mocuepa motlalito in acachinanco auh in tlequjqujztli vncan qujcauhtiqujzque in temalacatitlan njman conanque in tiacavan qujtototza qujmaiavito atlan tetamaçolco qujtztiltitiaque