16v 75

Qujmõiacanato qujnoalhujcaque qujnoaliacantiaque injc qujmoncaoato injc qujncalaqujto in intecpanchan cenca qujnmavizmatque qujnmacaque in intech monequj inca mochiuhque yoan njman qujnmacaque imjchpuchoan njman qujntlatlanjque canjn Mexico quenamjcan oc veca Qujnanqujlique ca aocmo veca aço ça eilhujtl axioaloz cenca qualcã yoã cenca chicaoaque cenca tiacaoã tepeoanjme novian tepeuhtinemj Auh in tlaxcalteca ieppa mochalanjticatca moqualancaitzticatca motlavelitzticatca mococoliticatca aimelmottaia acã vel monepanoaia in chololteca Ipampa in qujntenanaoatilique injc qujnpoiomjctizque qujmjlhujque Ca cenca tlaveliloc ca toiaouh in chololtecatl iuhqujn mexicatl ic chicaoac ca icnjuh in mexicatl in oiuh qujcacque in españoles njmã ic vmpa iaque in chololla qujnvicaque in tlaxcalteca yoan in cempoalteca moiauchichiuhtiaque [fol v