14v 65
] Motecuçoma quenamj cujx telpuchtli cujx yiolloco oqujchtli cujx ie veve cujx ie tlachicalhuja cujx ie veve tlamati cujx ie veve tlacati cujx le quaiztac Auh qujnnanqujliaia in teteu in Españoles ca yiolloco oqujchtli amo tomaoac çan pitzactõtli çan pipitzactontli çan cujllotic cujllotcatontli Auh in juh qujcaquja in Motecuçoma in cenca temolo in cenca matataco cenca ixco tlachiaznequj in teteu iuhqujn patzmjquja yiollo iolpatzmjquja cholozquja choloznequja mocholtiznequja mocholtizquja motlatizquja motlatiznequja qujnnetlatilizquja qujnneinailiznequja in teteu Auh qujmoiollotica qujmoiollotiaia qujmopictica qujmopictiaia qujiocuxca qujiocoaia ic moiolnonotzca ic moiolnonotzaia yitic qujmolhujca yitic qujmolhujaia cana oztoc calaqujz auh cenca intech moiollaliaia intech vel catca yiollo intech tlaquauhtlamatia cequjntin qujmomachiztiaia [fol v