cf_06_vi

folio: 14v

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

14v 34

] vncan moteahaltilitica in motechiuhcauh in teteu innan in teteu inta in veveteutl in tlalxicco maqujtoc in xiuhtetzaqualco monoltitoc in xiuhtototica mjxtzatzacujlitica ca amo motlacaiocoia in tlein onaiz in tlein conchioaz injc conmjtlaniz in moçomaltzin in moqualantzin in melleltzin injc conolinjz in quavitl in tetl manoço xicmjxtomjli ma xicmonacaztlapolvi ma xicmotlachialtili ma xicmohtequjli ma xicmoiacanjli in maceoalli maca çan ie xicmottili in maceoalli in tlapalivi ma ie xicmottili in tlatqujtl in tlamamalli manoço nelle axcan ma xicmjpichili ma itech ximjhijotitzino ca monetlaxoniuh ticmuchiujlia ca motlatlapitzal ma xicmoviti ma xicmopatiloti macanoçomo vncan ontlatlamattie in petlapan in jcpalpan macamo onmamaçouhtie manoço ivian ma iocoxca convicatiuh conotlatocti in maceoalli macamo ica ommaviltiz in maceoalli macamo texaxamatzaz macamo tetlapicquaz [fol v

14v 35

] auh macamo conjçoloz macamo conteuhiotiz in petlatl in jcpalli in mopetlatzin in mocpaltzin in motleiotzin in momaviziotzin in motlatocaiotzin ca oconcujc ca oticmomacavili ca oticmocnelili ca otlaocoliloc ca ie tlamaujçoa ca ie qujtimaloa in tlaçotli in iectli in maviztic ca otocõmotlatlatlalilili in jmac in jcxic in jtenco in jcpac ca oconcujc in tepeiotl in xiuhvitzolli in matacaxtli in matemecatl in cotzeoatl in tentetl in nacochtli