cf_06_vi

folio: 13v

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

13v 32

Oieh tlacauhquj in moiollotzin ca ie tehoatzin tocommomachitia anca ie ticmjmachilia anca ie qujnequj in moiollotzin in quecin ticmonequjltia aço achica aço cemjlvitl aço achica cavitl mjtzmotlaamanjliliz aço onjxtotomaoaz aço ontlacujcujtiuetziz aço monelchioaz aço itic tlatoz aço itic motlaxqujz aço ixco icpac queoaz qujmanaz in tecuiotl in tlatocaiotl aço onmâmaçovaz aço teixco teicpac onnemjz aço onjcicatinemjz aço mjtonjz anca ie tehoatzin toconmomachitia in quen toconmonequjliliz anca quen macujl matlac ca nel çan taujltilo çan titlavevetzqujtilo in tlalticpac anca ijcic conpoloz anca icochiz concaviliz ca quavitl ca tetl itic timotlamachiltia timotlacaqujtia ca [fol v

13v 33

] itic itlatoliz in concaviliz tiqualmotlaxiliz cujtlatitlan tlaçultitlan toconmotlaxiliz conjcnopilviz conmomaceviz in ixpopoiotl in cocototztli in tzotzomatli in tatapatli auh toconmocxipachilviz toconmotlatiliz

13v 34

Auh injn tlacatle totecoe tloquee naoaquee iooalle ehecatle ipalnemoanje teiocoianje tehimatinje totecoe ma tlacaoa in moiollotzin ma xicmocnelili ma xicmotlavilili motolinja in maceoalli in ixtepetla in jxpopoiotl ma xicmottitili in ocutl in tlavilli in tlanextli in catlehoatl onaiz in catlehoatl conchioaz in catlehoatl contocaz tehoatzin toconmomachitia anca quen toconmonequjltiz anca quen ticmjmachiliz anca quen qujtlaçaz qujqujxtiz in iooalli in tlacatli in cemjlvitl