cf_06_vi

folio: 133r

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

133r 493

] in jtlamacaoaltzin totecujo in quenamj ic qujmapanjlia â in cioatzintli in cocotzin in totepitzin auh tlein ie cuel toconjtozque cujx tiqujtozque in otechmocnelili in tloque naoaque ca çan oc techmocneliliznequj ipampa ca oc mjctlan ca oc iooaian in tontlatoa tlein ie toconjtozque ma oc tictotemachilican in jpalnemoanj ma oc ie tictemachican in tlein mjtoa auh in noço tlein omjto in topan in mjctlan in iooaian quen otitoloque quen otitalhviloque quen oticotonjliloque cujx nelli cujx tonaz tlathujz qujmuchiviliz in tloque naoaque cujx ijxco ijcpac titlachiazque in quenamj cozcatl quetzalli qujmomacaviliznequj totecujo cujx noço çan ixqujchtzin onmopolivitiz cujx atzintli conmopolhviz cujx noço itevical iez in nochpuchtzin in tepitzin in cocotzin amotzontecontzin [fol r

133r 494

] amelchiqujuhtzin njqueoa nopilhoantzitzin totecujoan ma tictonanamjqujlican in totecujo in tloque naoaque manoço onjcuci ma ompoçonj in jxuchicaltzin totecujo ma itech onaci in nochpuchtzin in tocennan in tecitzin in iooalticitl

133r 495

Tlananqujlia in pilhoaque cioa ilamatque in tlatoa qujtoa

133r 496

Ma ximotequjtili tlaçotitlacatzintli teunantli totechiuhcauh ma xicmonanamjqujli in cioapilli in qujlaztli auh ma itech xicmaxitili in piltontli in conetontli in jxuchicaltzin totecujo in temazcaltzintli in vncan monoltitoc in vncan motlapialia in tecitzin in temazcaltecitzin in iooalticitl