cf_06_vi

folio: 136v

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

136v 503

] Tlanaoatia in ticitl in otztli amo mopôpoxcanênequjz amo itlan aqujz amo cacocujz in etic amo motlatlaloz amo no ac qujmauhtiz aiac qujçaviz ca njman mjtoa motlatlaxiliz in nantli mjtoa olinjz in piltontli çan cuel ixqujchton in njcan onmoteneoa in jnaoatil otztli conjtoa in ticitl O nopilhoantzitzin tlaçotitlacatzitzinti totecujoan can jz amonmonoltitoque cujx anpipiltzitzinti cujx ancoconetzitzinti ca tilamatque in tontonotza ca anqujmotztiliticate in jxqujch tomjcca ticioatzitzinti in jpan tititzin cujx ie qujmati in piltontli in jchpuchtontli ma anconmoxiccaviliti in piltontli ma oc cenca tle anqujmomachitia ma oc amjx amotequjtzin ma oc amonecujtlaviltzin onmuchioa ica vel in oitla ticnamjqujto in oitla topantic [fol v

136v 504

] in jtlacachioalizpan piltontli â iz njca in mjtoa njticitl ça nel no ic njticitl cujx mjqujzpatli njcpia cujx njctecujcujliz in oitla ipan tehoato o cujx mjqujzpatli nomac ca njqujtqujtinemj ca çan nanamjco ca çan palevilo in totecujo auh ca çan tlaecapeviliztli ticchioa cujx toconjtozque ma iuh onmuchioa in ma vellacati in piltontli cujx tocontotenjtalhvizque auh tocontocujlizque in jtetlaocoliliztzin tloque naoaque anca quenamj ipan teoativi

136v 505

Ma oc nelle axcan timuchintin titlateumatican ma oc tictotemachilican in totecujo quecin qujmonenequjltitica cujx itla tocnopil tomaceoal cujx no ie in atle çan choqujztli çan ixaiotl monequj in axcan tle anqujmomachititzinoa totecujoan noxviuhtzitzinoan tlaçotitlacatzitzinti