cf_01_i

folio: 31v

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

31v 163

] C Izcatquj ie no cepa namechmelavilia O quam bonus et quam suaujs est domine spiritus tuus in omnjbus qujtoznequj Yioiaue totecujoe Diose ca ticenqujzca qualli auh ca cenca iamanquj in moiollotzin cenca titechmotlaçotilia yn timuchinti Injc vel momelaoa q'toznequj Iio totecujoe Diose in motetlaçotlalitzin ca iehoatzin in espiritu sancto ca muchi ueli auh ca topan qujvalmioalia yn iqualtiliz yn iiectiliz aviiaca in motetlaçotlalitzin oticmuchiujlitzino yn isqujch in qualli in iectli in intech ca yn motlachioaltzitzinhoan ynjc muchi techpaleujz in titlaca auh ca no vel tehoatzin titonemactzin in titlaca ynjc neci ynjc ticmati ca cenca timotetlaoculilianj iehica ca titechmomaqujlia yn moneltococatzin ynjc vel timitztiximachilizque yoan titechmomaqujlia in motenaoatiltzin injc vel timitztouellamachtilizque yoan titechmomaqujlia in mosacramentotzin ynjc ticmopatilia yoan ticmuchipavilia yoan ynjc ticmuchicavilia in tanjma injc vel tiqujcnopilhujzque in cemicac nemiliztli in vmpa ilhujcac yoan oc cenca ticmonextilia in motetlaoculilitzin ca in iehoanti yn momaceoaltzitzinoan in mitzmoiolitlacalhuja amo njman tiqujnmopopolhuja amo njman tiqujnmotlatlatilia çan iujan tiqujnmononochilia çan ivian tiqujnmonemachtilia injc vel qujcuepazque yn inemiliz ca motëcopatzinco in motemachticaoan qujnnonotza in tlatlacoanj auh in moteupiscatzitzinhoan qujnmaca in sacramentos ynjc vel qujcuepazque yn inemiliz yoã injc vel motetzinco pachiujzque Auh yn amo mitzmiximachiliznequj yn amo [fol v

31v 164

] qujcaoaliztlamati in tlateutoqujliztli mictlan tiqujnmotlaxiliia yoan in motlaneltocacaoan in amo qujcuepaznequj yn inemiliz in çan ipan miq' yn intlatlacul cemicac tlaihiioujliztli ic tiqujnmotlatzacujltilia in vmpa mictlan auh ynjn yn iuh ticmuchivilia in ca muchi melaoac çan njman aiac qujcuepaz in motlatoltzin aiac mitzmotlatolilochtiliz yn aço ilhujcac chaneque yn anoço tlalticpac tlaca aiac vel qujtoz tleica in iuh ticmuchiujlia hi G njman amo cuepalonj in motlatoltzin iehica ca cenca melaoac in ticmuchivilianj yoan ca tinemiliz ameialli tiqualtiliz ameialli tiuelitiliz ameialli motetzinco cenqujztoc yn isqujch tecultono yn ixqujch tetlamachti yn isqujch tepapaqujlti auh ca tehoatzin novian timotlatocatilia yoan in isqujch in qualli iectli motechpatzinco qujça çan moceltzin ticmotemaqujlia D Ie cenca vel neztica notlaçopilhoane in quenjn cenca tlaçotlalonj cenca maujztililonj in totecujo Dios iehica ca ipalnemoanj teiocoianj noujan tlatoanj çan no tlacpac neztica in quenamique in teuan yn amocolhoan cenca vellaveliloque teiztlacaujanj teca mocacaiaoanj tecuculianj vellaelittalonj vel telchioalonj