29v 159
E O in tlaujeliltic in qujnmoteutiti aque in iehoantin in tzitzitzimi ca uel qujmaxiltique tlaueliloque vel toiaohoan vel totecuculicahoan in tlalticpac titlaca Ointlaueliltic in qujnmacaque yn imezço yn inpilhoan yn injollo in invampoan yn iehoantin in ointlaueliltic in qujmicnotlatlauhtiaia in imispan tlalquaia in diablosme yoan yn imixiptlaoan ynjc qujmitlanjliaia in tlein intech monequja cenca moztlacaujaia ynjc momatia ca in iehoantin vel qujtemaca in isqujch in tetlamachti in isqujch tecujltono Yoan ca no iehoanti tepaleuja temanauja yoan temaqujstia in iuh momatque hi in amoculhoan cenca omotlapololtique yoan cenca otetlapololtique Auh yn ipampa injc vel qujcnopilhujzque in tlein qujnequja injollo imispan tlamanaia in diablome moçaoaia istoçoaia mîçoia tlatlatlauhtiaia miectlamantli ynjc qujtoneoaia ynjc qujchichinatzaia in innacaio in imispan in diablome in tzitzitzimi no yoan cenca miectlamantli ventli in qujmanaia in vë muchioaia in chalchiujtl in quetzalli in patlaoac in vitoliuhquj in vel xopaleoac yoan in tlaçotilmatli in tlaçotlãquj Yoan imixpan qujmanaia in nepapan xuchitl yoan miectlamantli in copalli in iuh qujchioaia hi ca ic qujnmaujztiliaia in injaohoan yn intecuculicaoan yn intetolinjcaoa in atle intech monequj mavizçotl yn atle intech momonequj tetlaçotlaliztli ca çan monequj cenca telchioalozque tlaellitalozque cuculilozque iehica ca tlacemisnanaoatilti [fol v