23v 122
A In iehoantin y ca ixpopoiume motlapololtianj injc otlateutocaque ca cenca qujmaujçoque yn itlachioalhoan Dios ynjc tlanextia ynjc pepetlaca in teiollalia auh ynjn amo ic qujmoteutizquja ca çan ic qujlnamiqujzquja ca oc cenca tlapanauja ynjc cenca tlanextia pepetlaca teiollalia tepapaqujltia ynjn teiocuxcatzin Dios in çan vel iceltzin itetzinco qujça in pepetlaca in tlanextia in ixqujch teiollali yn ixqujch tetlamachti vel iehoatzin çan vel izeltzin tlachioale B Auh intla cenca otlamaujçoque ipampa cequjnti itlachioalhoan Dios cenca chicaoaque qujlnamiqujzquja ca ynjn teiocuxcatzin Dios oc cenca chicaoacatzintli C In isqujch iueli in Dios ynjc cenqujzca tlamatinj ynjc cenca tecujltono cenqujzca tetlamachti ca ytlachioaltzin itech neci iehica ca cenca vey cemanaoac oqujmuchiujli cenca miec tlamantli oqujmuchiujli vel maujztic vel tetlamachti D Injquehi tlateutocanjme momanauja motzinqujxtia qujtoa in tehoanti ca iehoatzi tictotemulia in iehoatzin tiqueleuja yn ipalnemoanj [fol v