 |
 |
 |
 |
 |
 |
 |
 |
Reproduccion digital
No yoan netetzaujloia tlatetzaujaia tetzammachoia in teculutl choca in jquac tla aca ytlapantenco anoço ixacalticpac iquauhticpac chocatica in qujcaquj qujtotica tecolo o o tecolo o o yvin in caqujzti in choca Qujtoa in jquac in cacoia qujnextia [fol r
] mjqujztli cocoliztli mjqujztetzaujtl in aqujn oqujcac aço ie mjqujz aço tlaciujti aço tlatlatziujti tlalmjqujz anoço iaomjqujz anoce aca ce ipiltzin ie mjqujz anoço itlacauh ie choloz aço ie tlalpoliujz in jchan tlalli canaoaz atl neneciz aca oatimanjz in qujiaoatl in jthoalli tepantli xixitintoz tlaujujtontoz tlaueuelontoz vncan nexixaloz neaxixaloz nemanaujloz tlaçollaxoz tequjxqtl coxontoz tlalli ipotocatoz iquac itoloz injc tlamaujçoloz ie iuhcan ocatca in ichan in vncan ontlamamauhtico in vncan onmoteiotico chane muchipa otlamavizmamanca otlatetzcaliuhtimanca ma cel cana ce tlaçolli ovetztoca auh in jcaltech aiac vel omaxixaia teaoaia auh yn axcan ie ça iuhcan ça tepantli ieoatoc