 |
 |
 |
 |
 |
 |
 |
 |
Reproduccion digital
Auh ca in occequi in oquihualmotocayotitihuallaque Auh ca zan oc nican ticcahua in itlatlatollo inic ohuallaque in chicomoztoca chichimeca Azteca yeica incampa acachto ohuallaque in oncan quinhualquixti in huei tlacatecolotl in tetzauhteotl ca ompa catca in itocayocan Aztlan Chicomoztoc Auh ca in yehuantin in cazatepan ohuallaque inic oncan hualpanoquê in ilhuicaatl ixeliuhyan in noce teoatl ixeliuhyan in omito omoteneuh in tlatepotzco
Capit Ca nican mitoa in quenin oquinhualhuicatia in huei tlacatecolotl in quitocayotia tetzauhteotl inic oquihualquixti in oncan Aztlan Chicomoztoc in Azteca in Mecitin
Auh ca in yehuatl Huitzilopoch huitzillin itoca auh yecê opochmaye huei tiacauh inic za contlamelauhcatocayotique Huitzilopochtli ixiptla in Tlacatecolotl tetzauhteotl Auh inic cenca quintoliniaya in Azteca Chicomoztoca tlatoque
Auh ca ye otic hualitotiquizque in campa ohualquiztihuallaque in Azteca in Chicomoztoca Meciti Auh ca nican huel imonecyan inic tiquitozque in quenin quinhualquixti in quenin quinhualhuicac in huei tlacatecolotl tetzauhteotl ca in yehuantin in oncan huel chanchiuhticate in maltepeitoticate in oncan tlatotocati in oncan in Aztlan Chicomoztoc in huel yehuantin Azteca Chicomoztoca ca in macehualhuan catca in Mecitin atenca in tlatlamacahuan in otiquinteneuhque in tlatoquê Azteca ca in macehualhuan in tlatlamacahuan _ ocatca in Mecitín Atenca Auh in yehuantin in tlatocahuan cenca quintoliniaya cenca quinmotlacahuatiaya in momoztlae ye quimmaca in ixquich atlan mochihua in michin in cuêyâtl in têcuitlatl in izcahuitli in ocuiltamalli in axaxayacatl tlaxcalli Auh ihuan in acocolin ahuauhtli Auh niman yehuatl in canauhtli tlalalacatl tocuilcoyotl atzitzicuilotl apopotli yacatzintli ca cenca ic quintoliniaya in ixquich quimitlaniliaya iz zaye mochi in píxca in atotolin in imihuiyo ihuan in tlauquecholihuitl ca yeppa huei atenhuaque tlatlamani huei in atezcatl in quitocayotia metztli iapan huelquiyahualoticatca Auh ihuan cenca quincocoliaya cenca quintlaelittaya oquimpopolozquia oquimpehuazquia Auh in inteyacancauh ocatca tiacauh itoca catca Huitzilopochtli huei Tlacatecolopixqui intlayecolticauh in huei Tlacatecolotl tetzauhteotl cenca quitlacanotzaya quimottitiaya in Huitzilopochtli inic zatepan oquimixiptlati in Tlacatecolotl tetzauhteotl inic za itoca omochiuh Huitzilopochtli
in Mexitin ye quimelleloxitia inic ye quintolinia ihuan ye quimpopolozquia quimpehuazquia Auh in yehuatl in itetlayecolticauh in ihueyo in Tlacatecolotl Huizilopoch cenca mochipa ixpan chocaya inic quitlatlauhtiaya in Tlacatecolotl tetzauhteotl in ma quimpalehui ma quimmanahui in imacehualhuan ca nel quimoteotia ca amo no quimmoteotia in inteohuan in Azteca in Chicomoztoca ca centlamantin Auh inin ca huel yehuatl quimocenteotia in huey tlacatecolotl macenca quimonocnelili ma quimpalehui ma quimmaquixti inic amo mochtin quimmictizque inic amo quizcempopolozque ma za occecca ¨¨uinhuica macana qualcan yeccan quintlalmaca in oncan cenca quixcahuizque inic quitlayecoltizque
Auh in yehuatl in huei tlacatecolotl tetzauhteotl niman quimottiti inic oquitlacanotz in Huitzilopoch tlacatecolopixquí tlaciuhqui itetlayecolticauh in tlacatecolotl quilhui! Nomacehuale Huitzitlé ca huel nelli ca cenca tinechtlaocoltia cenca ammochintin in annomacehualhuan Atenca Meciti Auh in axcan ca ye onihuia ca ye onitlachiato in canin qualcan yeccan izzan noiuhcan in in oncan nômâni cenca huei in atezcatl moch oncan mochihua in ixquich amotech monequiz in atle polihui in nican ancate ich no ompa mochihua _ ca mo nicnequí in nican amechpopolozque Auh yece in oncan namechnemactia in oncan namechtenehuília ca tetlalpan ca ye nohuian onoac ca amo zan cana cactimani Auh yece ca cenca oc huecauhtica in aquique amocotoncahuan amo xeliuhcahuan in acitihui in aocmo amehuantin in annopilhuan in annomacehualhuan in nican ammochintin namechquixtiz inic namech zayehuel noyuhcan in in oancatca Auh yece ca achto cenca monequi inic nixpan timohuenchihuaz inic timonetoltiz inic moch ticneltiliz in ixquitlamantli ic nimitznahuatiz in atle centlamantli tiquilcahuaz in amo zan ticpopoloz Auh ca intla moch ic timohuenchihuaz intla moch ic nixpan timonetoltiz inic mochi ticchihuaz ca in canin namechhuicaz ca in canin namechtlalitiuh ca oncan tlatocatizque ca oncan tlayecoltilozque in aquique amohuampohuan amoxeliuhcahuan ompa acitihui Auh in iquac in iuhqui oquito in in huei tlacatecolotl in tetzauhteotl
Auh niman oquinanquili in itetlaye colticauh in Huitzilopoch quilhui Notecuiyo Noteouhé Notlacocauhé auh ca tlehuatl ipampa in amo nicchihuaz in amo noyollo copa ic mixpan ninohuenchihuaz inic ihuan ninonetoltic
in intechpa in ixquichtin mopilhuan moma cehualhuan ca huel nelli ca axcan mixpan ic ninopechteca inic nimitztlatlauhtia Auh ca mixpan ye nontlalqua nocontennamiqui in tlalteuhtli Ca huel nelli ca moch nicneltiliz ca moch nicchihuaz in izquitlamantli ic tinechnahuatiz ca nel nimomacehual ca nel nimotlacauh auh caye ixquich cahuitl in in ye motlan ninemi inic nimitztlayecoltia inic nimitztlacamati inic niquizcenyacana in ixquichtin nican onoque in momacehualhuan Cuix ma icá quemmanian otimitzyolitlacoque Ca amo ca mochipa mixpan tichuenchihua in tezzo ihuan in imezzo in ixquichtin yoyolimê atlan onoque ihuan in patlantinemi auh campa ticcuizque in ma occentlamantin titlaca imezzo inyollo timitzmacazque ca nel zan tiimmacehualhuan intlatocahuan in Azteca in amo nohuian toteohuan in in teohuian Auh ca zan mocel in timitztlayecoltia in timitzteteotia
Auh in in maxiquito in izquitlamantli ic tinechnahuatiz ca moch nicchihuaz ca moch nictzonquixtiz ca zan niman atle niquitla coz Auh ca zan yehuatl moch quichiuhtiazque in aquique momacehualhuan ye tihui in iquin on tiquimmexiltiliz in oncan axcan _ tinechtenehuilia ihuan in mochintín axcan nican onoque in yoltinemi momacehualhuan Auh ca nehuatl moch niquimmachtiz ca moch niquimittitiz niquincaquiltiz inic tinech nahuatiz ca zan huel noyehuatl quichihuazque inic quineltilizque amotle quitlacozque Auh in iquac iuhqui oquito in in Huitzilopoch niman quinanquili in Tlacatecolotl quilhui ca ye qualli Nomacehualê ca nícan nimitzhuipa niliz in izquitlamantli in notlanequiliz inic nimitztlaquauhnahuatia Ma huel ximoyolloti ma huel ximachioti Auh yece ca namechhuicatiaz ca amo namechxiccahuaz ca nimitznotztiaz inic namechhuicatiaz inic namechotlatoctitiaz inic amo ammotolinitiazque inic amo annentlamattiazque ca amohuan niatiaz ca amo nican ninocahuaz ca namechyollalitiaz Auh ca izcatqui in axcan ic nimitztlaquauhnahuatia Inic centlamantli huel yehuatl ic anquimoyollotitiazque in quauhyotl in Oceloyotl in teoatl tlachinolli mitl chimalli ca huel yehuatl in in anquiquatiazque in amo techmonectiaz inic antlamamauhtitiazque in amelchiquiuh in amoyollo ipatiuh ye tiaz ca antepeuhtiazque ca anquimpeuhtiazque anquimpopolotiazque in ixquichtin macehualtin altepehuaque in ye oncan onoque in izquican anquiztiazque
Auh in amomalhuan in anquimacizque têchcâtl ipan anquimelietequizque itzmâ itecpatica auh inin iyollo ihuicpa anquihuanchihuazque in ollin in ilhuicac ocotiuh itlanextitiuh iquac ye hualquizaz in huitztlampa zan niman anquinamictizque in ihuicpa anconiyahuazque ihuan in imezzo Auh in iquac ye iuhqui oanconchiuhque niman ic nehuatl niman no ihuicpa in Tlaloc ihuan in ixquichtin nocnihuan teteô ca ye anquimiximati Auh in innacayo anquin qualizque amo iztayo ihuan zan tlaolpahuaxpan anquitlalilizque achitoton in moquaz
Auh inic ontlamantli in aquique tiacahuan in oquichtin in tequihuaque in quachiquequê ca yehuatl in inintoca yezquê in tlamanimê inic namechnahuatia Auh in yehuantin in atle motlazotilizque in tlamachtilmatli maxtlayacatl in tlacuiloltilmatli in quetzaltlalpiloni iz zazoque nami in intlahuiz in inchimal ca cenca imochiuhyan inquetzalli in tlazochalchihuitl in ompan amacitihui ammacozque ic amechtlayecoltizque ca amo maquimati in necaliliztli amo caci camati in yaoyotl amo mimati in ixquichtin ye oncan onoque in otlalmaceuhque in acachto nepapan tlacâ on can ye tentinemi ye nem¨¨ohualquiztiaque in oncan anquiztiazque ca ye huel yehuecauh in mochintin nepapan tlaca ompa ye _ tentinemi ye nemoa ye tlatocatihua cenca xochitlalpan atle monectoc moch oncan imochiuhyan Auh in aquique yaotequihuazque atle inquaxoch atle quintlacahualtizque iz zazo tlein quinequizque moch quichihuazque iz zazo quezquin izcahuahuan yezque iz zazo can conannaxque in aquin cihuatl ayac maquintlacahualtiz moch iz cen nemac mochihuaz in izquitlamantli in qualli in yectli in ahuiac in xochitl in iyetl in cuicatl iz zazo ixquich
Auh inic etlamantli in aquíque mamaltin yezque quintizaozazque quimihuípotonizque quimpatizque tomahuac mecatl ic quinxillaxilpizque quimaztapilotizque cenca quintlaqualtizque quintomahuazquê cecempohualilhuiticâ in quimmictizquê inic ilhuichihualozque mitotitinemizquê Auh in íquac imoztlayoc miquizque cenyohual tozozque tlaquazque mitotiz que tlahuanazque in âzo âcâ quinequiz cihua cochiz macozquê in ahuianimê cenca miequintin onyexquê iz cihuatlahueliloquê in ahuianime Auh cenca zan huelyehuatl in quauhyotl in oceloyotl ic tlamamani in yaoyotl ic antlamamauhtizque ye ica iz cenca mochi tlacatl quinequiz quelehuiz in tiacauhyotl
Auh inic nauhtlamantli in aquique tlatocatizque amo zan ¨¨camê yehuantin in ye tiacahuan
in ye tlamaní ye yaotequihuaque Auh inic macuillamantli huei teticpac quinhuahuanazque in huehuein tiacahuan in mamaltin Auh notiacahuan in quinhuahuanazquê quauhtli ocelotl ipan quixtiazque itzmâquahuitl otlachimalli inmac mantiaz yaocuicatozque Auh in yehuantin mamaltín in huahuanaloni cuetlachtli coyotl ipan mixeuhtiazque in quimpalehuizque atle itzmacquahuitl in mac onoc in mamaltin zan ocoquahuitl tlapotonilli iuhquin macquahuitl ic neciz ihuan in chimalotlauh mecayotiezque in itech in tlahuahuanaltetl temalacachtli oncan yaoyotica quimicaltinemizquê oncan miquizque quinhuitequizque itzmacquauhtica
Auh inic chicuacentlamantli huel huecapan imomoztli teocalli temamatlayoticaz in oncanic tlecoaz in tlacpac oncan icaz tlalnepantla in techcatl huei tetl tlaxixintli in oncan quimeltequizque in mamaltin ihuan oc cenca miec in tlacatecolotl ic oquinahuati in Huitzilopoch in omoch eixahui/ quineltilitinenque in oquichiuhtinenque cenca mochteizahui temamauhti in tlacatetolonahuatilli in ic oquinahuati in Huitzilopoch in amo moch nican micuiloa iz zan mocotona Auh zan oc yehuatl tiquitozque inic oquinhualyacantia in tlacatelotl iniquac oncan oquinhualquixti in Aztlan Atezcapan in oncan in _ Mecítin ca iniquac oncan ohualquizque ca quitoa huel cenxiquipilli ihuan macuiltzontli in ye mochin toquichtin cihuâ telpopochtin in oncan ohualpanoque in ilhuicaatl ixeliuhyan inecauhyan ocotlalhuactiaz in atle atl ocatca iniquac ohualpanoquê in ye mochintin Mecitin niman oncan oquimilhui in tlacatecolotl oc oncan onxiuhtixque oncan oc moch quichihuazque in ixquich yaotlatquitl chimalli macquahuitl tlahuiztli huei mitl in atlatica ic motlaza in amo tlahuitolli zan oc yehuatl in patlahuac itzmitl huel cemmatl in tomahuac acatl mamazoa in atlaticâ ic motlaza zan momahuia
Capit Canican mitoa in quenin mieccan ohualtepeuhtiaque in Mecitin ihuan in quenin mieccan omotlalicâ
Auh ca in iquac ohualpanoque in atl ixeliuhyan in oc oncan atenco onxiuhtique inic oncan moch oquichiuhque in inyaotlatqui in otiquitoque in tlatepotzco Auh niman hualolinque quinyacantihuiz in intlatocauh in Huizilopoch in itetlayecolticauh in huei tlacatecolotl /acachto quimiltilitihuitz/ tetzauhteotl quinyollalitihuitz quimilhuitihuitz in tlein quichiuazque yehica in tlacatecolotl acachto quimitztilitihuitz in canin tlaqualitta ihuan in canin onohuac in oncan tepehuazque
in Mecitin inic oncan quipehualtizque in mamaltin quimeltequizque quinquixtilizque in inyollo inic ixpan tlahuenchiuazque in tonatíuh olin ihuan in ixquichtin tlatlatecolô in imezzo inic quimatzelhuizque ihuan inic quinhuenchihuilizque imixpan in ínyollo in mamaltin
Auh ca iniquac in canin otlaqualittac in tlactecolotl in quexquich quitocazque in azo yeilhuitl noce nahuilhuitl acachto conilhuia in itetlayecolticauh in Huitzilopoch inic quincaquiltia in ixquichtin in imacehualhuan inic quinnemachtia inic amo motequipachozque yeica ca cenca tlaihiyo huica in ipampa in itlaqual Auh yece in tlacatecolotl quimmacatihuitz in ixquich tlamantli intechmonequi ca ompa quimoncuilia in canin quimati in oncâ in qualoni in tonacayotl in iquac cana impan tlathui in oncan icâc in ímomoz in izacapepech in tlacatecolotl oncan quitta iz cintli tlaxcalli tamalli chilli iztatl ayotli ihuan in ixquich qualoni niman oncan mochi tlacatl quinmamaca in inteyacancauh in intlatocauh Huitzilopochtli ca moch nohuian iuh quinchiuhtihuitza in tlacatecolotl inic quintlaqualtitihuitz in Mecitin in canin ohuican quauhtlâ texcallâ hualquixtihui yeica ca quinyacantihuitz in tlacatecolotl quauhtli quimonahualtitihuitz impan patlantihuitz quinyacana ca iuh oquinanahuati in ite _ tlayecolticauh in Huitzilopoch in intlatocauh mochiuhtihuitz in Mecitin in quilhui ca mamech yacantiaz in campa anyazque /zan ximechi¨¨tihuian Auh in iquac oncan/ quauhtli ipan niquiztaz namechtzatzilitiaz in campa anyazque zan xinechitztihuian Auh iniquac oncan onacito in canin onitlaqualittac in amotlalitihui oncan ninotlaliz oncan annechittazque aocmo nipatlaniz inic niman oncan xicchihuacan in nomomoz in nocal in nozacapepech in canin one huaticatca Auh oncan mochi tlacatl mocaltiz ammotlalizque auh ca nohuian iuhqui oquihual chiuhtia in tlacatecolotl Auh inic amo cenca tic hueyaquilizque inin tlatolli zan ixquich ce ticentzonquixtia in izquican ohualtepeuhtiaque in Mecitin Auh ca yeehuatl in itech icuiliuhticâ in temalacatl yahualtic tlahuahuanaliztetl in oncan mani in inahuac in Iglesia mayor Mexico
Auh ca in yehuatl in acachto icac in icpac in itzontitech catica ca yehuatl in nezca in Mecitin Auh in occe tlacatl in icpac onoticac ca yehuatl in canin altepehua in opehualoc in malli mochiuhtica ca oncan icuiliuhticâ in tetlacuiloltitech in itoca in cana altepetl cececni cacalloticac nohuian quiyahualotica in patlahuac temalalachtli ca aocac quimati in tlein totocayocan ca nel omochmicque in huehuetque in oquimatia in itlatlatollo in tetlacuilolli
Auh ca yehuatl in intlacatecolouh in Mecitin oquiteittiti in ixquich amoqualli amo yectli inic yehuatl oquiteittiti in neyaotlaliztli in necalilixtli in tlacamictiliztli in tlacanacaqualiztli ihuan in ixquitlamantli ic oquin nahuati in intlacatecolouh in Mecitin in ixquich amo qualli amoyectli in teizahui in temamauhti in amo quimatia in ixquichtin nepapan tlaca acachto ohuallacá
Auh ca otihualitotiquizque in ixquitlamantli inic oquinahuati in tlacatecolotl in itetlayecolticauh Huitzilopoch ca in ixquich cahuitl in onenca ihuan in quezquican ohualtepeuhtia ca izquican moch oquineltili in itlanahuatil in tlacatecolotl in inyollo in imezzo in mamaltin ixpan quihuenchiuhtihuitza ihuan quiquatihuitze in innacayo in mamaltin inic yehuantin oquiteittitique in Mecitin inic tlacanacaquani itencopa in huei tlacatelotl Auh ca amo quimatia in ixquich ic nohuian ônôâca ca amo tlacanacaquani ocatca auh ca in quihuenchihuaya in imixpan inteohuan catca ca zan yehuatl in imezzo in ixquichtin yoyolimê ic centlapanahuia in huei huentli in zozoltin quinquechcotonaya imixpan in imiz tlacateohuan catca yeica ca acan mania in yaoyotl in necaliliztli acan quaxochtli icaca zan mochi tlacatl cecencatca in intlalmacehualpan in acachto ohuallaque in tetahuan in tenanhuan omochiuhque in omotlacaxinachoque
in acachto otlalmacehuato in nohuian altepetl ipan in innecacahualhuan in intlacaxinach yohuan in ye huecauh tlaca in nonohuian otlateuhtiaque in nohuian ypan altepetl izcequi opopoliuh ihuan in occequin nemi in ipan in imaltepeuh in oc noma axcan nemi in cacate in oncan ocahualotiaque
Capit Ca nican mitoa inquenin omic in intlatocauh in Mecítín in Huitzilopoch ihuan in tlein ye oquinahuati in Mecitin in imiquiztempan
Auh ca ye otichualitotiquizque iz zan quexquich in oncan ic ohualpanoque in Mecítin in teoatl inecauhyan ihuan in quenin oquihuallotlatoctitia in intlatocauh Tlacatecolotl in Mecítin Auh ca zan ixquich nican tiquitozque in imiquiliztempan ic otlanahuatitia in intlatocauh in inteyacancauh in Mecítin in Huitzilopoch inic occeppa ic onahuati in tlacatecolotl in ixquiztlamantli oquimilhui in Meciti Auh ca in iquac iz zatepan oncan oquincauhtia in Mecitin in intlatocauh Huitzilopoch ca ye chicuepohualtia ye huel ohuehuetic in Huitzilopoch aocmo huel molinia huel cenca ohuehuetic za oquihualnapalotihuitzâ in imacehualhuan oncan oipan mochiuh in xihuitl molpia in ye otzonquiz ompohualli ommatlactli omome xihuitl in iquac ompa hualquizque in Aztlan in
Chicomoztoc in Mecitin ca ompohual xihuitl ommatlactli omome in oncan oacico in Colhuacan Chichimecatlalpan
Auh ca oncan in in ye imiquiztempan in Huitzilopoch oquinnanahuati in ixquichtin imacehualhuan in Mecitin in ixquichtin in tlenamacaquê tlamacazquê achcacauhtín in itetlayecolticahuan in huei tlacatecolotl tetzauteotl ihuan in tiacahuan ihuan ín omentin imachhuan toquichtin ihuan no omentin cihua imachhuan ixhuihuan itlacamecayohuan in Huitzilopoch Auh in iquac in omonechicoque in omocentlalique in ixquichtín in otiquinteneuhque in macehualtin auh in yehuatl in Huitzilopoch momozticpac teocalticpac omotlali auh oncan oquinnotz in ixquichtin imacehualhuan oquin ilhui Notlazopilhuane in nican amonoquê ma huel xicmoyollotican inquexquich ihuan in quezquitlamantli namechilhuiz namechcaquiltiz in itlatolintoteouh in tetzauhteotl in yaotequihua in tepehuani in yollotli in eztli itlaqual nitonal inemac inic ihuicpa mochipa quihuenchiuaz in ixpan ic tlamanaz in ilhuicatitech onotiuh in olin in tonatiuh in tlanextitiuh in momoztlae in icelteotl in Tloque in Nahuaque ipalnemoa in ilhuicahua in tlalticpaquê
Auh ihuan in tlatocateotl in Tezcatlipoca in impan icac in iteyacancauh in tlatocayotl in pillotl in teucyotl in petlatl in icpalli Auh ca yehuatl in intelpochtli yaotl Tezcatlipoca in tlamachiliztli _ in tlaacicamachiliztli itech catqui itechquiza ihuan tlatocateotl Auh ca yehuatl in in ompa tlapiatiuh in campa techhuicatiuh in toteouh in tetzauhteotl in oncan acachto otlaqualittato in canin huei anepantla in metztli iapan
Auh yehuatl iyaotequihuacauh iyaotlatocauh itepehualpan mochihuaz in nohuian ahuacan tepehuaccan in oncan tetlayecoltiz in oncan temacehual mochiuaz in oncan acitihui in aquiquê amopilhuan amoxhuihuan amo mintohuan amoteiccahuan amotentzonhuan amixquamolhuan amiztihuan amacacaamayohuan in ixquichtin amonecacahuahuan in aquique quittazque in aquique quipantilizque in amo iciuhca in iquin on quimaxiltiz in toteouh in yaotequihua in mitl chimalli in teoatl tlachinolli ipial in tetzauhteotl inic yehuatl oncan quinextiz in itiacauhyotl inic quintlayecoltiz in ixquichtin teteô in huei tlaloc in quiyacana in quichihua in imic neliloca in ixquichtin onon tlaca in teotlachihualiztica ic quimicnelia cecni tlaca in nepapan teteo
Auh ca yehuatl in toteouh in totlatocauh in tetzauhteotl in teoatl tlachinolli quimanatiuh in chimaltica in mitica ic quinyacanaz in imacehualhuan inic tepehuazque iz zan imelchiquiuh in mayeccampa in teoatl tlachinolli in quauhyotl in oceloyotl ic yezque in aquique quittatihui in aquique quipantilitihui in iquinon Auh in nican amonoque in annopilhuan
acazomo aca amehuantin anquittatihui in oniquito in onicteneuh in canin anepantla in canin metztli iapan xochitlalpan tonacatlalpan ca iuh quitoa ca iuh quitenehua in toteuh in tetzauhteotl ca oc huecauhtica in acitihui in aquique amocotoncahuan amohuampohuan Auh ca ye anquimati ye niman Colhuacan otopan mochiuh in xihuitl inelpiayan ye ompohualxihuitl ommatlactli omome in iquac tihualquizque in Aztlan in Chicomoztoc in oncan otechpopolozquia in totlatocahuan in totecuiyohuan ocatca in Aztecâ in Chicomoztocâ in Altepechiuhticate
Auh quin ye nican titlantihui inic nican otechaxiltico in toteouh in oniquito ca nican itocayocan Huei Colhuan Auh inin Nopilhuanê manen anmozotlauhtin manen amo meyollohuati manen ammomauhtiti ca oc huei in anquitocazque ca oc huei in anquinenemizque ca ayamo aci in itlapohualpan in aquin icel teotl in ilhuicaz onoc in amo iximachoni in amo macho in tlein itoca ihuan aic ittoni Auh ca ye ehuatl in oquinahuatilmacac in axcan toteouh in tetzauhteotl inic ompa techhuicaz in canin tlamapilhuitiuh in canin tlateneuhtiuh yeica in onamech ilhui in acazomo oc amehuan in nican amoneque âcâ ceme quittazquê in canin on tihuicatihui ca oc huecauh Auh in in macamo ximotoliniltocacan macamo xinentla matican ca amo amechxiccahuaz in toteouh ca _ amechyollalititiz ihuan in nehuatl Auh ca axcan namechcaquiltiz in nomiquiztempan tlatolneca cahual inic pachihuiz in amoyollo
Capit Nican mitoa in quenin oquincennahuati in Imacehualhuan in itlatocauh in Inteyacancauh in Huitzilopoch in oquincaquilti in quexquich ic oquinnahuatí in Tlacatecolotl Tetzauhteotl
Auh ca nican ca ic tzonquiza in inhuallaliz in Mecitin ihuan ca ye moch otichualitotiquizquê iz zan ocquexquich in itlatlatollo in ipohualoca in oncan ohuallaque iz zan tlatzauctihuitzê iz zatepan ohuallaque in Mecítin Auh ca nican imonecyan ic tiquitozquê in imiquiztempan in inecacahualiz miquiliztempan tlatol in inteyacancauh in intlatocauh ohualmochiuhtia in Mecítin inic oquinhualhuicatia in Huitzilopoch Ca nican quimilhui in Huei Colhuacan in Huei Chichimecatlalpan auh ca in yehuatl in Huitzilopoch ca cenca ye omacic inic ohuehuetic ye onchicuepohualxiuhti aocmo huelli ye ihiyocauhtiuh ic imiquiztempan oquim ilhui in imacehualhuan
O Notlazopilhuanê Noxocoyohuanê caye annechitta aocmo itla nohueli aocmo nichicahuac ye nizotlauhtiuh ye niihiocauhtiuh Auh
in axcan ca za ic namechnahuatitiuh in nomiquiliztempantlatol Auh yece ma axquilcauhti ma anquipoloti in ixquichtlamantli onachmech ilhui ihuan in occequi axcan namechilhuiz huel xicmoyollotican manen anquilcauhtin Maxicmatican ma ic pachihui in amoyollo in annopilhuan annoxocoyohuan annomamalhuan annoxhuihuan annocacamayohuan ca ye ixquich in noyoliliz in notlalticpacnemiliz ca nel ye nihuehuetic ca nel aocmo nihueliti ca zan niquintlaocoltia in teteô in totecuiyohuan in mache huel yehuatl in toteouh in totecuiyo in toteyacancauh in totlatocauh o mochtin mocennonotzque in ixquichtin nepapan teteô inic nechhuicazquê inic ompa intlan niyetiuh in canin itocayocan ximohuayan in mochin iz cenchan in momiquilia ye yalhua ye ohuiptla yohualnepantla onech anaco impan onechhuicaquê in tepeticpac in huei colhua icpac Auh zan onechpatlanaltiquê quauhtli ipan niquiztiuh auh in iquac ompa onechaxiltique ca moch oncan cenquiztoquê in teteô totecuiyohuan huel temamauhtiquê huel teizahuique tlen mach ic mixeuhtoque iuhquin huehuein tequanimê tzitzimimê ocelomê huehuein tequancohuamê cequintintzinaca aztlacapallequê
Auh in onech axilti in toteyacancauh in totlatocauh in toteouh yaotequihua onechilhui macamo _ ximomauhti Huitzitlê opochmayeê ca yehuatl in motoca inic TiHuitzilopochtli ximoyollali amo ximomauhti ca tel in tencopa inic onimitzanato inic nican mitzcennahuatizquê in ixquichtin teteô in nican onoque in otiquimittac inic niman mochintin onech ilhuiquê otitlacneli macehuale Huitzitle opochmayeê tiacahuê totetlayecolticahuê ca in axcan ca mopampa nican oticenquizaco inic nican mopampa otitonechicoque Auh ca timitzicnelia in ma ixquich in motlalticpacnemiliz ca ye oticiauh inic otitechtlayecolti ca cenca qualli yectli ic otitechhuellamachi cenca ic otitechpapaquilti inic otitechhualmacatihualla in inyollo in imezzo in tomacehualhuan in amo iuhqui ic otipacticatca ye ixquich cahuitl
Auh yece ca ic oticnahuatique in toyaoteachcauh in tetzauhteotl inic timochintin totencopa omitzhualquixti in atenco anepantla Aztlan metztli iapan Chicomoztoc in otiquinhualhuicatihualla in ixquichtin Mecitin Azteca mopilhuan in michtlatlamaque yoyolimê quimacia Auh inic cenca otimitzicneliquê ihuan in mochintin ca otamechcahualtiquê in michtlatlamaliztli ihuan in occequintin yoyolimê patlantinemi Auh ca nel ye otichualchiuhtihualla in izquitlamantli icomitznahuati
in toteachcauh yaotequihua tetzauhteotl iz cenca ic otitechpapaquilti iz cenca ic otitechhuallamachti in timochintin nican tonoquê in titeteô Auh inic timitzicnelia ca zan macuililhuitl in timiquiz icemilhuitlapohualpan in Mictlan Teuctli
Auh yece macihui in timiquiz inic totlan tonahuac yez in moyolia ca amo ic mitzxiccahuaz in toteachcauh tetzauhteotl ca in momiyoitic in moquaxical itic ca oncan motlaliz ca oncan mopampatlatoz iuhquimma zan oncan tiyoltica ic quimatizque in ixquixtin macehualtin ca iquac intla itla quinemizque in tlenamacaquê in huehueintin mozauhquê tlamacazquê tlenamacaquê ca tiquimilhuiz ca tiquinnahuatiz in tlein quichihuazque ic tiquinyollaliz in ixquichcahuitl otlatocatiazque ihuan iquac in acitihui in ompa annemactilo anepantla metztli iapan xochitlalpan tonacatlalpan in oncan tepehuazquê in oncan tlatocatizque in oncan tlayecotilozque in oncan macozquê in quetzalli in chalchihuitl in tonacayotl ic tlayecoltilozque oncan cemanahuac ic tlamauhtitiezquê in teoatl tlachinolli mitl chimalli ca ye otinahuatiloc inic tic huenchihuax tohuicpa tixpan in inyolllo in imezzo in aquique mamaltin ye oc anquimacizquê _ ihuan in ixquichtlamantli ic oticnahuatiloc in totlayecoltiloca mochihuaz ca yehuatl mochi ic tiquintlaquauhnahuatiz in ixquichtin monecacahualhuan tiquincauhtiuh ma iuh xiquinnahuati in iquac oquiz in moyolia inic otimic ma tepetlacalco quitocacan in monacayo oncan oc nauhxihuitl onoz in momiyo occenca palani tlalli mocuepa in monacayo catel oncan tiquinnotzaz in motetlayecolticahuan tlenamacaque in iquac mitzquixtilizque niman topco quimilco quitiemazque in momiyo momozticpac teocalticpac quitlalizquê qualcan yeccan onoz in iquimillo in itopyo in momiyo
Auh momoztlae mitztlayecoltizquê in copalli ic mitzpopochhuizquê inic mixpan tlenamacazque yeica ca tiixiptla in toteachcauh tetzauhteotl ihuan ca no oncan yez xochitl iyetl amixpan quitlalizque ihuan oncan amixpa moxtlahuazque in nacaztitech imacoltitech inelchiquiuhtitech in tlanitzttech quiquixtizque in imezzo ic amech atzelhuizquê Auh in iquac itla quinequiz in toteachcauh yaotequihua ihuan tehuatl anquimilhuizque in amo tlayecolticahuan tlamacazquê tlenamaque papahuaquê huehueintin mozauhque in quitozquê in quincaquiltizquê in ixquichtin macehualtin in tlein ic anquinnahuatizquê
Auh noihuan ic timitzicnelia inic tehuatl
tiez in titetzauhteotl canozo tiixiptla inic mitztocayotizque Huitzilopochtli tetzauhteotl O ca zan quicacque inic oninahuatiloc Auh ca yehuatl zan noye namechnahuatia ca nel ye ni ixiptla oninochiuh in Toteouh in tetzauhteotl atle anquipolozque atle anquilcahuazque ca tel namechilhuitiaz in ixquichtlamantli in tlayecoltiloca in Teteô Auh ca noihuan onechilhuique ca zan huel aciz chicuepohualxihuitl inic tilintimaniz