8 Relacion de Chimalpahin

folio: 2r

Reproduccion digital

8 Relacion de Chimalpahin 2r
NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

2r 7

Auh macichui yn iuh omoteneuh yn oc ceppa macoco cuepilliloque yn intlahtocayo yn îmahuizço chalco tlahtoque catca yece ca ça yuhqui yn ompa Tetlahtocamacehualhuan mochiuhque Mexico Tenuchtlitlan ompa ça tetlahtocatetlapacholhuan ça temac yn catca ca ça quexquich ynic mahuizçoque mochiuhque yhuan aocmo yxquich ynic huelitia nican chalco yn iuh omoteneuh tlacpac quenin catca achtopa nican tlahtoque catca oc tlatzintla yn ayemo yuh nican hualtepehuaya Mexica yn iuh cenca ymixcoyan oncatca huey inhuelitiliz ynic moyocaytquiya mo yocamamaya tlahtoque chalca catca auh macihui in yehuantin in omoteneuhque in ça tepan oc ocuepilliloco tlahtocayotl chalca ynic motlallique nican tlahtoque in motenehua ye tepehualtin catca ca ça ompa tetlahtocatlatititzalhuan mochiuhticatca ça ompa intech ontlatemachiticatca ynic tle yn quinhualnahuatiaya quichihuazque in huehueyntin tlahtoque catca Mexico tenuchtitlan ynic ôpa hualpacholloya nican tlahtoque catca

2r 8

auh yn omoteneuh Ahuitzotzin in tlahtocat Tenuchtitlan caxtollomome xihuitl no yxquichcauh yehuatl ytlahtocatlapacholhuan mochiuhque yn omoteneuhque nican  chalco tlahtoque catca ynic niman omomiquillico ypan xihuitl de años auh çâ niman yhcuac yn ipan in omoteneuh xihuitl oncan hualmotlahtocatlalli in tlacatl Moteuhcçumatzin xocoyotl auh ynin caxtollome xihuitl in tlahtocat Tenuchtitlan no yxquichcauh// ytlahtocatlapacholhuan mochiuhque yn omoteneuhque nican Chalco tlahtoque catca auh yehuatl ipan in yn omoteneuh tlacatl Moteuhcçumatzin Xocoyotl yhcuac tlahtocati yn tenuchtitlan ypan acico in hernando cortes yn capitan hualmochiutia yn ixquichtin quinhualhuicac españoles in ça tepâ nican oquimotocayotico conquistadores auh yehuatl omoteneuh hernando cortes in ça tepan Marques del Valle mochihuaco yn callaque Mexico Tenuchtitlan ypan yc mani Metztli Nouiembre ypan xihuitl de años auh yn ipan huehuetque catca yn incemilhuitlapohual catca hecatl auh yn ipan in inMetztlapohual catca matlaquilhuitia quecholli yhcuac oncan ypan in polihuico in huey tlahtocayotl oncatca Mexico Tenuchtitlan yhuan y moch ic nohuiyan ypan nueva españa oncatca tlahtocayotl mochi poliuh y huel nelli intlahtocayo Xihuitzolli anoço copilli yn incorona catca Mexica tlahtoque yhuan nueva españa tlaca oquincuillico yn españoles auh yc niman ohualcallac yehuantin quicallaquico yn ontlahtocayotzin yn incoronatzin in huehue^ytin tlahtoque Reyes españa Auh in yehuantin omoteneuhque Mexico Tenuchtitlan tlahtoque catca ynic tinmacehualhuan ticatca tichalca çan onpohualloncaxtolli xihuitl auh yn oncan oc ceppa yc quinhualcuepillica intlahtocayo chalca in tlacpac omoteneuh tlacatl Tiçocicatzin ynic ye no cuel nican hualtetlahtocatlallica ynic oc ceppa ontlahtocatihuac chalco çan ixquich cenpohuallonmatlactli ypan nauhxihuitl ynic nimâ o ynpan acio yn omoteneuh hernando cortes capitan yhuan oc cequintin españoles yn oquihualhuicaque tlaneltoquiliztli

2r 9

Auh yn ihcuac nican Amaquemecan oquiz omoteneuh hernando cortes capitan ça tepan Marques del Valle omochiuh çan yehuantin nican quinamicque yn omentin tlahtoque ynic ce yehuatl yn omoteneuh ynic ome ytoca cacamatzin Teohua teuhctli tlahtohuani catca tlayllotlacan Ama^qmecan ynic ome yehuatl yn omoteneuh tlacpac yn itoca Quauhcehcecuitzin tlamaocatl teuhctli tlahtohuani catca panohuayan auh ynin omentin tlahtoque ontecpantli yn cihua quinnechicoque in cenca cuacualtin mahuiztique in chipahuaque catca çan nican macehualtzitzinti ymichpochhuan catca quimitlanilique yn omoteneuhque tlahtoque catca yhuan oc cequintin tlaçopipiltin catca ynic quimitlanque quinmochpochtihque quinchichiuhque quinmacaque in  quenami yhcuac on quinemiltiaya tlahtoque yncihuahuan in mahuiztic cueytl yhuan huipilli yc quinchichiuhque yhuan yuh mihtohua quintenque quimaaltihque temazcalco quinyecxoteçonhuique quinyeyectzicahuazhuique quinxauhque auh// ye oquincencauhque inca tenamicque in omoteneuhque omentin tlahtoque quimonnamictihque quintlauhtihque yn españoles yhuan quimonnamictihque chicontzontli ypan matlacpohualli pesos ypâ ca in coztic teocuitlatl ynepapan cozcatl yc tlachiuhtli auh yn iyacayocan ynic cetlayacatl ytztlacoçauhcan y huel oncan motenehua amaquemecan ayac tlahtohuani catca yn ihcuac ^y auh quemaca oncatca// yn oncan in yn itech pohuia tlahtocayotl oqu ichichiyan coçoltica onoc yn ihcuac quimacaca Mexico Tenuchtitlan tlahtohuani catca Moteuhcçozatzin xocoyotl ca ytlatzin yhuanyolqui catca yece yn ihcuac nican quiz omoteneuh hernando cortes capitan ca piltontli ye quin ye chicuexiuhtia yn omoteneuh cihua yllacatzin ayemo quimati macichui yehuatl ytech catca ytztlacoçauhcan tlahtocayotl / auh ca quihtotihui in huehuetque catca/ yn ihcuac nican  quiz omoteneuh hernando cortes capitan amo quimocuiti in cacamatzin Teohua teuhctli ynic tlahtohuani catca tlayllotlacan  Amaquemecâ quitlatlani quilhui in capitan aquin tlahtohuani nican Ama^qmecan cuix tehuatl yc nimâ quinanquilli çan quihuil Ca a// nehuatl in nitlahtohuan ca ye amomiquilli yn tlahtohuani catca ytoca Ayoquantzin chichimeca teuhctli auh ca ça ypiltzin yn oncatqui ytoca cihua yllacatz ma canati yc niman canato yn ocanato yc niman connexti quittiti yn capitan hernando cortes yn oquichpiltzintli cihua yllacatzin quilhui Teotle ma ximottilli ca huel yehuatl in in tlahtohuani nican  ytztlacoçauhcan Ama^qmecan auh yn o yuh quittac Capitan yn oquichpiltzintli cihua yllacatzin yc niman quihto in capitan ynin piltzintli aocmo ytoca yez cihua yllacatz yehuatl nicmaca y notoca yn ihcuac mocuaatequiz ytoca yez Don hernando Cortes O yhui n oncan in   quimacatiquiz yn itoca Capitan yn piltzintli cihua yllacatzin ynic ça tepan yc mocuaatequi ytoca mochiuh Don hernando cortes auh ^y nican tlahtohuani catca huehueyotzintli tzacualtitlan tenanco amo tenamic amo quimottiti yn omoteneuh hernando cortes capitan yuh quihtotihui yn huhuetque catca can motlati mochololti mochtin quinhuicac yn icihuahuan ompa motlatito yn itocayocan tlacoyahualco yn icanpa xoyactepetl // ça tepan  hualmocuep ^y nican motlallico auh ça ycel nican quicauhtiaca yn omoteneuh yteuhctlahtocauh// yn itoca xiuhtzin tlalquicatzin tlayllotlac teuhctli no yhuan yehuatl tenamic Auh çan no yuh mochiuh yn Miccacalcatl tlaltetecuintzin chichimeca teuhctli tlahtohuani catca tecuanipan çan mauhcaya yuhqui n çan chollo yn oquimah ye huallaci españoles amo nican quinmochielti ye Mexico callac ytlan motlallito yn ihuayolqui huey tlahtohuani Moteuhcçomatzin xocoyotl yc cen yah aocmo yc hualmocuep ^y nican tecuanipan Ama^qmecan auh yn omoteneuh hernando cortes capitan çan omilhuitihtiquiz in mocehui nican Ama^qmecan auh y macehualtin nican quinpa //hui oncate onxiquipilli ypâ  matlactzontli ynic tomacuilcantian auh yc niman yah callac in Mexico Tenuchtitlan yn capitan ytlan motlallito in huey tlahtohuani Moteuhcçomatzin xocoyotl çan pacca yocoxca quihualnamic yn ipan omoteneuh xihuitl de años auh yn o yuh yah Mexico tenuchtitlan in capitan hernando cortes auh çan icampa yn onmomiquilli yn omoteneuh cacamatzin Teohua teuhctli tlahtohuani catca tlayllotlacan Ama^qmecan ynin ye omihto ca nican tzacualtitlan tenâco ychan catca huel ompa tlacatl yn atlauhtlan quaxochpan auh ynic ompa tlahtocatito omoteneuh tlayllotlacan Ama^qmecan çan ipampa yn icihuauh yn itoca tlahco cihuatzin tlahtocacihuapilli ompa ychan yn itztlacoçahuacan Ama^qmecan ynic oncan ytech otlacatque yn omoteneuhque omentin tlahtoque Don Thomas de Ssan Min Quetzalmaçatzin yhuan yteyccauh Don Juan de Sandoval tecuanxayacatzin auh yn ihcuac y ye momiquiliznequi yn omoteneuh tlahtohuani cacamatzin Teohua teuhctli yuh mihtohua quinnahuatitehuac yn omoteneuhque omentin ypilhuan quimilhui xihualhuiayan yn annopilhuan xiccaquican ytla ye oninomiquilli niman anyazque yn ompa tochantzinco Tzacualtitlan tenanco ompa anquipiatihui yn altepetl ompa antlahtocatitihui ca tel oc yehuantin quimati in tzacualtitlan Tenanca ca amî pilhuan yn annopilhuan ca yehuantin ompa amechtlahtocatlalizque yehica yn oncan in nicatqui ca amo tochan ca çan tocihuacan ma camo nican amo ca necahcayahualoz Ca huel ompa tochan o quichtechihualiztica in tzacualtitlan Tenanco yc niman quinanquillique quilhuique tlacatle tlahtohuanie otlacauhqui y moyollotzin otitechmocnelili ytla otimomoquilli ma yuhqui ticchihuazque ma tiyazque in tzacualtitlan tenâco yn iuh titechmonahuatilia auh yuh quichiuhque yn o yuh momiquilli tlahtohuani cacamatzin yn ompa tlayllotlacan Ama^qmecan yc niman huallaque in nican tzacualtitlan Tenâco yn omoteneuhque omentin ypilhuan quetzalmaçatzin yhuan Tecuanxayacatzin motlallico auh ynin omoteneuhque omentin tlahtocapipiltin macihui motenehua ymomextin nican tzacualtitlan Tenanca yece ye omihto tlacpac ca amo nican tlayllotlacan pouhque catca ynic ceccan yyacayocan tlahtolloyâ catca yn ipan î tzacualtitlan Tenancayotl auh ca ye huel ompa pouhque huel ompa tepilhuan catca yn atlauhtlan quaxochtenco ynic occan catca tlahtocayotl nican ypan tzacualtitlan tenancayotl yn ihcuac oc ye huecauh catca yn o yuh mihto tlacpac yn ayemo yuh techpehuaya Mexicatl auh y ye yuh otechpeuh yhcuac yc cen poliuh yn atlauhtlan tlahtocayotl yece in ompa tepilhuan pipiltin amo yc poliuhque yn itech quiça Popocatzin atlauhtecatl teuhctli catca yn iuh yehuantin nican omoteneuhque omentin ca yxhuihuan yhuan oc cequîtin miequintin ca mochintin ypilhuantzitzinhuâ yehuatl yn omoteneuh tlacatl cacamatzin Teohua Teuhctli catca motenehua atlauhteca pipiltin

2r 10

Auh yn o yuh momiquilli tlacatl cacamatzin teohua teuhctli catca auh yn oc ce ytlaçopiltzin y huel yacapantzin catca ahnoço çan quimopiltzinti yn iuh omoteneuh tlacpac yn itoca huehueyotzintli tlayllotlac teuhctli tlahtohuani catca nican tzacualtitlan tenanco çan quitocatia yn ittatzin no niman yc momiquilli ypan xihuitl de años auh yn omoteneuh tlahtohuani huehueyotzintli in quexquichcauh tlahtocat ca no yxquichcauh ytlan teuhctlahto yn iteuhctlahtocauh catca (Senador ) yn omoteneuh yn itoca catca Xiuhtzin tlatquicatzin çâ no tlayllotlac teuhctli catca auh y yehuatl in çan cen momiquillique yn omoteneuh tlahtohuani huehueyotzintli tlayllotlac teuhctli yn ipan omoteneuh xihuitl de años auh yn omotenehu in Xiuhtzin tlatquicatzin tlahtocapilli catca Tlayllotlacan yn ihcuac momiquilli in quincauhtia ytlaçopilhuantzitzin macuiltin mochtin oquichtin in tlahtocapipiltin motenehuaya tlaçochichimecapipiltin y huel yehuantin in oncan in tlayllotlacan axcahuaque catca tlahtocayotica ynic ceme yehuantin in oncan tlahtocatizquia tlayllotlacâ ynic ce ytoca Tlalnahuacatzin ynic ome ytoca quetzaltecpintzin ynic Ey ytoca Ahuiliçatzin ymim ça tepan yc mocuaatequi ytoca mochiuh Don Baltasar ynic nahui ytoca Mochuchchintzetze lohuatzin ynin ça  tepan yc mocuaatequi ytoca mochiuh Don diego hernandez ynic macuilli ytoca Cuetzpaltzin ynin ça tepan yc mocuaatequi ytoca mochiuh Don franco ^y macuilixtin in ytlaçoyxhuiuhtzitzinhuan in tlacpac omoteneuh tlahtohuani catca Quauhtlehuanitzin tlaylotlac teuhctli yn ipan mantia ynic poliuh chalcayotl yn ihcuac techpeuh Mexicatl yn ipan tlacpac omoteneuh xihuitl

2r 11

Auh yn omoteneuh tlahtohuani huehueyotzintli tlayllotlac teuhctli catca yn ihquac momiquilli no miequintin yn quincauhtia ypilhuantzitzihuâ yn oquichtin yhuan cihua yn oncan tlacatico ypan tlayllotlacatyotl yece amo yehuantin yntech pouhqui amo huel yehuantin ynnemac yn omoteneuh tlahtocayotl tlayllotlacan macihui yn oquipix inttatzin huehueyotzintli ye omihto ca çan texihxicoliztica quicuica ynic huel otlahtocatico nicâ tlayllotlacan Auh yn o yuh momiquilli yn omoteneuh huehueyotzintli auh çan ce xihuitl yn ayac tlahtocat nican tzacualtitlan Tenanco tlayllotla// n yn ipan in Ey calli xihuitl de años auh no yhcuac ypan in motlahtocatlalli in tlacatl Omacatzin teohua teuhctli Tlahtohuani mochiuh yn opochhuacan Tlacochcalco Tlalmanalco ynin ça tepan ynic mocuaatequi ytoca mochiuh Don hernando de guzman

2r 12

Auh ypan iiii Tochtli xihuitl de años ypan in mictilloque omentin tlaçopipiltin quetzaltecpintzin yhuan tlalnahuacatzin i yehuantin in ye omoteneuh tlacpac ymomextin ytlaçopilhuantzi tzinhuan catca in tlacatl xiuhtzin tlatquicatzin tlayllotlac teuhctli tlahtocapilli in teuhtlahto catca auh ynic mictilloque ma achitzin nican toconitocan yn ihcuac yn o yuh mihto tlacpac yn o yuh huallaque nican tzacualtitlan tenanco yn omoteneuhque omentin quetzalmaçatzin yhuan yteyccauh Tecuanxayacatzin yn otlacatito tlayllotlacan Ama^qmencan yn ipilhuan omoteneuh tlahtohuani cacamatzin Teohuan teuhctli yn o yuh hullaque niman yc ye quinemilia in quenin huel quicuizque nican Tzacualtitlan Tenâco tlahtocayotl tlayllotlacan yehica ypampa ^ytech meleltiaya intech motzotzonaya yn oqu ic oncate macuiltin tlaçopipiltin yn iuh omoteneuh y huel yehuantin ymaxca ^ytlatqui yntech pouhticatca nican tzacualtitlan tenâco tlahtocayotl tlayllotlacan ye omoteneuhque yn itlaçopilhuantzitzinhuan yn omoteneuh xiuhtzin tlatquicatzin çan tentlapictica çan quintlahtolchichihuilique ynic quimonpoyomictihque quintzonhuique yn ipan in nahui tochtli xihuitl de años yn omentin y huel teachcahuan catca yn tlalnahuacatzin yhuan yteyccauhtzin quetzaltecpintzin auh ça yeyntin yn quincauhque ca noço macuiltin catca in tlaçotlahtocapipiltin auh ynic quinmictihque ynic quintzonhuique ye omihto yehuantin intemcopa mochiuh yn omoteneuhque Don Thomas de S m^jn Quetzalmaçatzin yhuan yteyccauh Don Juan de Sandoval Tecuanxayacatzin yhuan ynic huel quinchiuhque no yhuan ye huatl quimachiztico quenin quilhuito yhuicpa ontlayhuaque quitlatitlanilica ynic quiztlacatlahtolmacato omoteneuh Don hernando de guzmâ omacatzin Teohua Teuhctli tlahtohuani opochhuacan tlacochcalco tlalmanalco ynic no yehuatl ytem//pa mochiuh no quinhuallatzontequilli yniqu intlacepanhuil mochiuh ynic mictilloque ynic tzonhuilloque yn omoteneuhque omentin tlaçopipiltin ynic mahuiztli quitlazque yhuan ic xicyotl intech quitlallique yn oc Eyntin quincauhque teteyccahuan yn amo tehuanme quinmictihque yn itoca Don Baltasar Ahuliçatzin  ynic ome Don Diego hernandez Moxochintzetzellohuatzin ynic Ey Don franco cuetzpaltzin ynic aocmo ceme yehuantin otlahtocatque tzacualtitlan Tenanco ça omocnonemiltico yhuan ça opiltique ça oquinchicoquetztinenque aoc tle yc oyehuatico auh ye oc cenca yehuantin omoyehuatillico yn omoteneuhque omentin ypilhuan Cacamatzin Teohua teuhctli yhuan yxhuihuan yn iuh no yehuatl ypilhuan huehueyotzintli ca omoyehuatillico yn ipan tzacualtitlan Tenancayotl aocmo no can oquimonpohuaco yn omoteneuhque E^ytin tlaçopipiltin auh ynic huel quichiuhque yn intemictiliztequiuh yn omoteneuhque Don Thomas de S M^jn quetzalmaçatzin yn inehuan Don Juan de Sandoval Tecuanxayacatzin yhuan yxquichtin Amaquemeque pipiltin ca quicepanhuique yn ipan in  xihuitl de años yhuan ynic nican tzacualtitlan Tenanco ynic quimonmictihque omoteneuhque omentin tlaçotlahtocapipiltin ynic huel mochiuh caocac ompa conixittaque in Mexico auh y ye yuh omictilloque ynin omoteneuhque omentin tlahtocapipiltin in tlalnahuacatzin yhuan yteyccauhtzin Quetzaltecpintzin

2r 13

Auh yc niman yc huel onmotlahtocatlalli yn ipan in omoteneuh xihuitl años in Don Thomas de S m^jn quetzalmaçatzin tlahtohuani tlayllotlac teuhctli mochiuh ^y nican tzacualtilan Tenâco tlayllotlacan yc oncan ye tlahtocati auh yn ihcuac nican tzacualtitlan Tenanco ye tlahtocati yn omoteneuh Don Thomas de S m^jm quetzalmaçatzin tlayllotlac teuhctli yz catqui in quichihuaya yuh mihtohua macihui yn o yuh hualla nican tzacualtitlan Tenanco ynic oncan ye tlahtocati auh yece amo niman yc quincauh in pipiltin Amaquemeque yn iztlacoçauhque ^y tlayllotlaque Teohua^q yn itlahuan ypilhuan yn icoltzin catca Toyaotzin chichimeca teuhctli tlahtohuani catca ytztlacoçauhcan yhuan yn oc cequintin pipiltin yhuayolque amaquemecan mochtin impan onquiztinenca quimonittaya ynic quintlaçotlaya inca ontlatlantinemia in quen cate auh ynic no yehuantin omoteneuhque ytlahuan cenca oquitlaçocamatque yhuan yn oc cequintin yhuayolque Amaquemeque yc motlaçocamatque yn amo yuh imca quichihuaya yn oc ce immachch intlahtocauh yn itoca Don hernando Cortes cihua yllacatzin inin çan catca yn itztlacoçauhcan Ama^qmecan ca nel oc piltontli yn ihcuac yn ayemo quimati quin chiuhcnauhxiuhtia auh yn ipampa yniqu iuh ynca quichihuaya ^y yn itlahuan yhuan yhuayolque yn omoteneuh quetzalmaçatzin chichimeca teuhctli anoço tlayllotlac teuhctli auh niman  yqu ipan yehuatl ye mocentlalia ye mononotza yn omoteneuhque ytlahuan yhuan yhuayolque pipiltin Amaqueme^q ytztlacoçauh^q ye quihtohua ye quimolhuia ma//ço ye yehuatl totlahtocauh mochihua in quetzalmaçatzin ca huel mahuiztic tlacatl cualli tlacatl ma yehuatl nican techpiaqui yn itztlacoçauhcan ca yhuiyan yocoxca in moneniltia ca tetlaçotlani yhuan Teca tlátlanini Tepan quiçani auh y yehuatl Don hernando cortes cihua yllacatz ca ye hualixtlamati yn itech pouhtica nican tlahtocayotl ma ticmictican ma quihualilhuiti in Don hernando omacatzin Teohua Teuhctli tlahtohuani tlalamanalco auh ynic niman conilhuito yn omacatzin Teohua teuhctli çan quinhualilhui yn titlanti xiquimilhuican yn amaque^qme ca amo huel mochihuaz ynic mictiloz ca oquittac in capitan hernando Cortes intla quitemoz aoc ac cuix amo niman yc techpipiloz ypampa techtlahtlatiz ma çan motlechihua macamo mictilo cuix amo tehuantin yc titlatzacuazque auh y yehuatl ypampa oniccac in quetzalmaçatzin tlayllotlac teuhctli in quinequi Amaquemeque ynic ompa ytztlacoçauhcan intlahtocauh yez ca niquitohua ynic huel tlahtocatitiuh yn ompa ypetlapan ycpalpan yn iteyccauh cihua yllacatz ynic huell mochihuaz ma çan mopatili ma ye ompa tlahtocati in tzacualtitlan Tenanco yn cihua ylacatz ma yc mixiptlayotili ^y tlaylotlac teuhcyotl ynic moyolcehuiz ma yuhqui ^y mochihua yuh xiquinnonotzati yn itztlacoçauhque auh yc niman hualmocuepque in titlanti quimonilhuico yn Ama^qmeque yn iuh oquinhualilhui Don hernando de guzmâ Omacatzin Teohua teuhctli auh yc niman yuh quichihuaque yn itztlacoçauhque pipiltin cocanaco yn quetzalmaçatzin auh çan nopohualilhuitl/ ahnoço yn iuh oc cequintin huehuetque quimachiyotihtiaque chiuhcnapohualilhuitl / yn ontlahtocatico nican tzacualtitlan Tenanco tlayllotlacan auh ynic conanaco Ytztlacoçauhcan Ama^qmecan quihuicaque ynic ompa quitlahtocatlallique chichimeca teuhctli mochiuh ypan xihuitl años yn ihcuac yn ye omihto yehualixtlamati ye matlacxiuhtiaya yn Don hernando cihuallacatzin ynic çâ texixicoliztica concuilito yn itlahtocayo yn itech pohuia chichimeca teuhcyotl y çan ontlamâpa Ytiachcauh Don Thomas de S m^jn quetzalmacatzin(sic) çan cihuatlachihualli yconetzin in yn tlahtocacihuapilli Tlacocihuatzin yyahuitzin catca yn omoteneuh Don herdo cihua yllacatzin auh yn omoteneuh Don Thomas de S m^jn quetzalmaçatzin ynic ompa motlahtocatlalito Yztlacoçauhcan Ama^qmecan ca quitlachicahuilli no yehuatl ytencopa mochiuh in capitan don Fernando cortes Marques del valle ca quimachiztique yn ama^qmeque ynic no yehuatl quimacac in chichimeca teuhcyotl ypampa huel quiximatia ycniuh ca noço quinamic yn ihcuac yancuican nican Ama^qmecan quiz capitanm yhuan ça tepan yconpadre mochiuh ce ipiltzin yn omoteneuh Don Thomas de S m^jn quetzalmaçatzin quicuaatequi yn omoteneuh Marques del valle auh y yehuatl omoteneuh Don herdo cortes cihua yllacatzin yc niman nican tzacualtitlan tenanco tlaylotlacan quihualtlahtocatlalique tlaylotlac teuhctli quihualchiuhque yn amaquemeque yn çâ niman ipan in omoteneuh xihuitl años yc quiyolcehuique ynic aoctle quihto yn ic atle quihtoz ca nel piltontli auh yn ixquichtin nican tzacualtitlan tenanco pipiltin yn ipilhuan nican quincauhtia omoteneuh tlacpac Cacamatzin teohua teuhctli Teomeca yhuan ypilhuan catca tlahtohuani huehueyotzintli tlayllotlac teuhctli catca cenca achi quezquintin catca auh amo cenca yyollocacopa ynic quicelique ynic yntlahtocauh mochiuh cihua ylacatzin ynic ye ica mocahcayahua ye quiquehquellohua auh yehica ye omihto yn ihcuac nican tzacualtittlan Tenanco hualmotlahtocatlalli ca ayemo cenca quimati ye quin matlacxiuhtiaya auh ynic nican tlahtocatico tzacualtitlan Tenanco tlayllotlacan çan chicuacenxiuhtico ynic niman quitohtocaque ypan xihuitl años yn tzacualtitlan Tenanca yhuan Amaquemeque ca quicepanhuique ypampa yuh mihtohua ynic quitlahtocatlazque cenca tlahuanaya ^y nican tenanco yhuan mihtohua çan quichololtihque in tzacualtitlan tenanca yn ipilhuan cacamatzin Teohua Teuhctli ^y nican quincauhtia yhuan ypilhuan huehueyotzintli auh ynic niman ompa yah yacapichtlan yn Don herdo cihua yllacatzin ompa intlan monemiltito yn ompa catca yhuayolque auh ça tepan ompa huallehuac y yacapichtlan ynic ye no ni cuel nican callaquico ychan ytztlacoçauhcan Amaquemecan ça onmotlallico aocmo tlahtohuani mochiuh yn iuh niman ye onneciz

2r 14

Auh yn ipan omoteneuh xihuitl años yn ihcuac quicauh tlahtocayotl nican tzacualtitlan tenanco yn omoteneuh Don herdo cortes cihua yllacatzin ynic quitohtocaque ahnoço quichololtihque yn o yuh yah auh cenpohualxihuitl yn cactimanca yn ayac tlahtocat nican tzacualtitlan Tenanco yxquichica yn ynic occampa ytztlacoçauhca quetzalmaçatzin yhuan tlaylotlacan Teohuacan Tecuanxayacatzin quinmomacehualtic yn tzacualtitlan Tenanca yn Tenanca pipiltin cequintin ytztlacoçauhcan ontecpanohuaya cequintin tlayllotlacan teohuacan yn ontecpanohuaya moxellohuaya

2r 15

Auh çan no yhui yn tecuanipan pipiltin yhuan panohuayan pipiltin no ompa ontecpanohuaya moxexelohuaya ynic occan tecpan ontecpanohuaya yhuan no yuh ontlacallaquiaya

2r 16

Auh ye tlacpac oniquinteneuh yn eyntin tlaçotlahtocapipiltin Don baltazar Ahuiliçatzin yhuâ Don diego hernandez Moxuchintzetzellohuatzin yhuan Don Franco Cuetzpaltzin tlayllotlac teuhctli yn quimopieliaya huehuealtepetlahtolli yn huehuetlahtocatlacamecayotlahtolli mochi onomac huetzico ynic oc ceppa axcan nicyancuilia niquicuillohua amoxpan auh ynic nahuintin ye no tlacpac onicteneuh in huehuetque yehuatzin in Don Vicente de la anunciacion ynic no yehuatzin centetl quimopialiaya in achi huey huehueamoxtli yn itech niquixti huehuetlahtolli yn onicnenenehuilli oniccentetili inic ce amoxtli libro onicchiuh auh ynic macuiltin huehuetque yehuatzin  in Señor Don Bartholome de S tiago tenmahuiztzin autenetzin yn oquimohuiquilli tt Dios ypan xihuitl de años ynin no yehuatl centle quimopieliaya in huehueamoxtli libro çan achi tepiton yn itechpa tlahtohua tzacual titlan Tenancayotl ynic huallaque Tenanaca omomac huetzico ytech oniquixti cequi in huehuetlahtolli ynic ça niccentetilia axcan auh macihui yn  çan tepiton in yece huel cualli huel neltiliztli ynic tecpantica huehuetlahtolli yn itech in onicnehnehuilli yn oc cequi huehueamoxtli ynic oniccentetilli yn iuh niman ye onmottaz ytech in amoxtli // Auh ynic chicuacen huehue ca yehuatzin in miecpa tlacpac otictotenehuilique tlacpatl tlacatl Señor Don Feliciano de la Ssumpcion calmaçacatzin catca ma  quimotlamachtitzinotie in tt Dios cemihcac yn ompa ilhuicac yn oquimohuiquilli ypan xihuitl de años ynin no centetl yehuatzin cuecuetziuhcatlacuilolpan letratica amoxpan quimicuilhuitia xiuhtlapohualamoxtli libro oquimochihuilitia in ma ca  çan tezcatl oncan ytech otechmotlalilitia yn ixquichtlamantli in tle ^y nican omochiuh ye huecauh Amaquemecan çan tepiton yn oncan tetlan actica yn itech tlahtohua tzacualtitlan Tenancayotl yn itech xiuhtlapohualamoxtli yn tlahtohua ytech altepetl ytztlacoçauhcan yhuâ tlayllotlacan Ama^qmecan ahxilztli hecoliztli y huel ymaticatzinco amoxpan quimotecpanilitiuh auh ynin huehuexiuhtlapohualamoxtli oc monemiltia oc yehuatzin yyomatzinco y nechmotlaneuhtilitiuh ynic oniquixtlapan oniccopin yn iuh tecpantica xiuhtlapohualamatlahtolli// ynic no ytech onitlanénehuilli mochi oniccentlamantilli yn oc cequi onicteneuh huehuetlahtolli yn itech tlahtohua Tenancayotl yn iuh niman mochi ye onmottaz

2r 17

Auh yn omoteneuh tlacpac yn ihcuac nican hualcallac omotocateneuh Juez Andres de S Tiago Xochitototzin xuchimilco ychan ynic nican quihualmihualli tlahtohuani Don Antonio de Mendoça Visurrey ynic tlachiaco yhuan tlatehtemoco yhuan tetlahtocatlallico yn oncan oqu excan poliuhticatca tlahtocayotl ^y nican ypan altepetl Ama^qmecan moch quitemoco yn tomacuilcantian yc ticate nican yn iuh cacatqui y Tetzonmacuiltlayacatl Altepetl ynin huel mochiuh yxquich ytzinecan ynelhuayocan yuh mellahuac neltiliztica quittitique yn iuh huel cécen ahxiliztli hecoliztli ticpia yzquican /niquihtohua tlaca çan nauhcan) yhuan quitemo mochi y ye huecauh huehuetlahtocatlacamecayotl yn iuh oncatqui huel cehcen tlahtocayotl ynic nican Tomacuilcantian Ticate Amaquemecâ huel iuh quittitique yhuan yttitiloque yn aquique huel oc yehuantin tlaçopipiltin in tlahtocapipiltin in tlahtcaoquichtlachihualtin no yhuan yttitiloque y yehuantin monetehua tlahtocacihuapiltlachihualti pipiltin yn oquinchiuhque tlahtocacihuapipiltin motenehua yn inpilhuan cihuatlachihualtin pipiltin moch quimittac yxpan nezque yn omoteneuh Juez yn iuh yehuantin catca omoteneuhque Don Thomas de S m^jn quetzalmaçatzin yhuan yteyccauh Don Juan de sandoval Tecuanxayacatzin auh yn imomextin in yn oncan macihui tlahtocatia Amaquemecan ce ytztlacoçauhcan ce tlayllotlacan Teohuacan yece yuh mihtohua ca çan incihuachan çan ipampa ^ynantzin yhuan ypampa yncitzin ^ycitzin ynic ompa tlahtocatia auh yn itechpa inttatzin cacamatzin ynic mihtohua oquichtlachihualti ca huel nican tepilhuâ tzacualtitlan Tenanco atlauhtlan mihtohua huel tenanca yn oquichtlachihualiztica auh ca çan cihuatica ynic ompa Tepilhuan Amaquemecan ynin huel mochi yuh quittitique yn omoteneuh Juez auh ya yehuatl ipampa yn ynic oncan quimilhui yn amehuantin quetzalmaçatzin yhuan Titecuanxayacatzin ca ancihuatlachihualtin yn axcan oncan antlahtocati Ama^qmecan ca amo cenca huel amochan ca çan amocihuachan yn amoncate ca ye oniquittac yc o noyollo pachiuh yn iuh catqui amotlacatiliz ca antzacualtitlan tenanca amatlauhteca yn oquichtlachihualiztica yhuâ no yehuatl ypampa ^y yniqu iuh quimilhui yn omoteneuh Juez yhcuac no yxpan moteylhui in Don hernando cortes cihua yllacatzin tlahtocapilli ye omoteneuh tlacpac huel yehuatl in ytech pouhticatca huel yaxca yn omoteneuh ytztlacoçauhcan tlahtocayotl auh macihui yn oncan î tlahtocatia omoteneuh Don Thomas de S m^jn quetzalmaçatzin ca çan iuhqui quipialiaya ytlahtocayo auh yehica ypampa yn omoteneuh Don hernâdo Cortes cihua yllacatzin ca oncan in oquichtlachihualli catca huel ytlaçopiltzin yehuatl catca yn tlahtohuani Ayoquantzin chichimeca Teuhctli yc teomeca yn iuhqui yntoca ^y ompa maltiqu in moyaomiquillito huexotzinco yn oc tlateotoquilizpan ypan xihuitl años yuh mihtohua ompa cuacualloc y huexotzinco yhuan yuh mihtohua ynin omoteneuh ynic Teomeca Ahoquantzin yn inantzin catca tlahtocacihuapilli Mexico Tenuchtitlan hualmohuicac quil ychpoch y huey tlahtohuani Axayacatzin auh yhueltiuh y huey tlahtohuani Moteuhcçumatzin xocoyotl ynic mihtohua ymachtzin yc quinotzaya temach catca yn Ayoquantzin auh yn o yuh moyaomiquillito ^y huexotzinco yn omoteneuh Tlahtohuani Ahoquantzin chichimeca teuhctli yc niman quimachiztito y huey tlahtohuani Mexico Moteuhcçomatzin yn quenin omoyaomiquillito huexotzinco yn imachtzin Ahoquantzin auh yn ihcuac yn o yuh yyollo pachiuh Moteuhcçomatzin auh ye niman y yehuatl omteneuh tlahtohuani Ahoquâtzin ^y nican quicauhtia ytlaçopiltzin yn itoca Don hernando Cortes cihua Yllacatzin macihui yn oc coçoltica onoc yc niman quihualmacac y tlahtocayotl y chichimeca teuhcyotl ytztlacoçahucan Ama^qmecan ynic mihtohua oc coçoltica onoc y cihua yllacatzin y macoc tlahtocayotl quihualmacac yTencopa mochiuh in tlacatl Moteuhcçomatzin Xocoyotl huey tlahtohuani Mexico Tenuchtitlan yn ihcuac ^y mochiuh ayemo huallacia yn españoles auh y yehuantin ytztlacoçauhque amaquemeque quicelica ynic intlahtocauh mochiuhca yn cihua yllacatzin ypan xihuitl de años yn ihcuac ^y ye yuh nepa nauhxihuitl moyaomiquillito huexotzinco yn ittatzin Ahoquantzin catca auh çan nauhxihuitl yn itech oncatca tlahtocayotl y chichimecaTeuhcyotl yn omoteneuh cihua yllacatzin yn itztlacoçauhcan auh çan quicahualtihque yn itlahtocayo ynic quicauh yn oc yehuatl quimaca ca ytlatzin Moteuhcçumatzin Xocoyotl auh ça tepan concuillito yn omoteneuh Don Thomas de S m^jn quetzalmaçatzin yn iuh niman ye onnecitiuh

2r 18

Auh macichui yn iuh omoteneuh yn moteylhui Don hernando Cortes cihua yllacatzin yn ixpan omoteneuh Juez yn ipampa ytlahtocayo chichimecateuhcyotl ytztlacoçauhcan yn oquimaxcati yn oquicuilli y çan ontlamanpa ytiyachcauh omoteneuh Don Tomas de S m^jn quetzalmaçatzin yece aocmo huel macoc y cihua yllacatzin yn quitlania ytztlacoçauhcan tlahtocayotl yhaun aocmo no huel quiquixtilli yn tlahtocayotl omoteneuh Don Thomas de S m^jn quetzalmaçatzin ye ça quimontlachicahuilico yn Juez in inehuan yteyccauh Don Juan de sandoval Tecuanxayacatzin amo huel quinpolhuico yn oncan tlahtocatia yyeyeyan ceceyaca yn oncan tlapiaya ypan ontlayacatl alte petl yece ça quimoyoyocatlalico nononcua ynic ceceyaca yntlapacholpan yn ipan yc cecentlayacatl yn oncan tlahtocatia huel quimonnononcuaquixtico yn iuh nepa ye huecauh hualhuillohuac yn amo yhuan quimaxcatizque yn oc Excan omoteneuh tlahtocayotl Teaxca auh çan ye tel yuh tlacauh yn iuh nepa ye huecauh hualhuillohuac ynic mochipa tequitlacacoyan mochiuhtihuitz ytztlacoçauhcâ auh ynic quiyollalique Amaquemeque omoteneuh Don hernâdo cortes cihua yllacatzin ontecpantli macehualli ytech quipouh Juez yn quicaltiaya in quelimiquiliaya yc moyollali yc aocmo tle ytlah quihto // Auh yn o yuh hualcallac nican Amaquemecan yn omoTeneuh Juez Andres de Sanctiago xochitototzin aocmo ma ohuecahuac yn omoteneuh tlahtohuani Don Thomas de San Martin quetzalmaçatzin çan niman // yhcuac yn ipan xihuitl años yn onmomiquilli yn tlahtocat ytztlacoçauhcâ cenpohualxihuitl onmacuilli yxpan mochiuh yn omoteneuh Juez auh yn ipampa mochi quitemoco omoteneuh Juez ynic tomacuilcantiâ yn huehuealtepenenonotzaliztlahtolli yn iuh quenin cacatqui ceceyaca cehcentlayacatl auh yn ipampa ^y yn ixquichtin huehuetque tlaçopipiltin catca ynic tomacuilcantian in necêtlaliliztica nononqua yhcuac cececcan quinemilique quicenquixtihque ynic amoxpan quicuilloque quitecpanque camoxyhcuilloque yn iuh cacatqui macuiltlayacatl altepetl huel yuh yxpan quinextihque yuh quittitique y yehuatl omoteneuh Juez neltiliztlahtoltlatecpanpa yn quitlachialtihque yniqu iyollo pachiuh ca nel yuhque catca y huehuetque yn amo huel yztlacatia teyxpan huel quiyectlatecpanilique y tlacamecayotica y huhuetlapaltlacamecayotlacuiloltica y nauhcan huel cehcen ahxiliztli hecoliztli ticpia yequene ynic tomacuilcantian huel cehcen tlahtocayotl oncan mopia ca yzquican tlahtocayoticate auh ynic huel quicemittac quicentlalli mochi ynin huehuetlahtolli yn omoteneuh Juez Andres de s tiago xuchitototzin yhcuac ytlan escriuanotic yn Rodrigo de roças xohecatzin pilli ytztlacoçauhcan yehuatl quicuillo amoxpan yn axiliztli yn ehcoliztli yhuan yn iuh cacatqui tlahtocatlacamecayotl tomacuilcantia Amaquemecan yn quitemoco omoteneuh Juez yn quittitique in quipohuilique huehuetque tlaçopipiltin catca tomacuilcantia

2r 19

Auh ^y nican tzacualtitlan Tenanco ca omentin y huhuetque tlaçopipiltin y huel quimatticatca in quenin catqui yhuehuenenonotzallo ^y nican tzacualtitlan Tenanco altepetl yn quitlapohuillique omoteneuh Juez ynic ce yehuatl yn Don Augustin de s Andres Teyoltzin Amilcatl teuhctli ynic ome yehuatl y Don Miguel de sTiago Teuhcxacantzin quittitique ynic huel ce tlahtocayotl Ticpia Titzacualtitlan Tenanca auh yn o yuh quittac yn o yyollo pachiuh omoteneuh Juez yn iuh catqui altepetl nican Tzacualtitlan tenanco yc niman quitlahtocatlalli yn Don Joseph de castilla hecaxoxouhcatzin tlahtohuani tlayllotlac Teuhctli mochiuh ypâ xihuitl de años ^y nican tzacualtitlan Tenâco ynin omoteneuh Don Joseph de castilla hecaxoxouhqui ye omoteneuh tlacpac ypiltzin catca in huehueyotzintli tlayllotlac teuhctli tlahtohuani catca ^y nican tzacualtitlan Tenanco ye omoteneuh cenpohualxihuitl yn ayac nican tlahtocat çan quauhtlahtolloc yn ihcuac ^y omoteneuh yehuantin quimixquetzaya ynic tlahtocatizquia in tlacatl Don diego hernandez moxochintzetzellohuatzin yhuan Don Franco Cuetzpaltzin yhuan Tlilcahualtzin yhuan Don balthasar Atleoneuhtzin atlauhtecatl teuhctli auh amo quicelique yn tlahtocayotl ynic ceme yehuantin tlallilozquia çan quihtoque tle yn oc ye ticnequi ynic titlahtocatizque amo ye yuhqui ynic titequipanollo in ticaltillo ^y Tellimiquillilo Yn Ticuahcuahuililo yequene Timatequillotica ma paco timahuiztililo amo ma yehuatl tlahtocati ma techonpacho ma techonpie yn toteyccauh Don Joseph de castilla hecaxoxouhqui ynic niman contlahtocatlalli yn omoteneuh Juez çan cenquîtlahtocatlalli yn ipan in omoteneuh xihuitl in Don Juan de Sto Domingo de Mendoça tlacaeleltzin tlahtohuani chichimeca Teuhctli mochiuh yn itzatlacoçauhcan Ama^qmecan yn ihcuac ^y ye yuh tlaco xihuitl omomiquilli yn ittatzin catca Don Thomas de S m^jn quetzalmaçantzin chichimeca Teuhctli ye omoteneuh tlacpac oqu ipan acico   ^yyn omoteneuh Juez Andres de S Tiago Xochitototzin yhuan no yhcuac yn ipan in omoteneuh xihuitl quitlahtocatlalli yn Don Juan Bapta Toyaotzin Tecuanipan pochtlan tlahtohuani mochiuh ypampa ynantzin ompa ychan ynin ypiltzin yn Don Juâ de Sandoval tecuanxayacatzin Teohua Teuhctli tlátohuani tlayllotlacan Teohuacan auh cenpohuallonmatlactli xihuitl yn  ayac tlahtocat Tecuanipan çan cuauhtlahtolloc macihui quimaxcatica ^y tlahtocayotl omoteneuhque tlacpac omentin tlahtoque

2r 20

Auh yn ipan yc nauhtlayacatl Panohuayan no yz catqui yn omochiuh yxpan yehuatl omoteneuh Juez ynic nican ohualla Ama^qmecan yn ihcuac oquittitique yehuantin Panohuayan tlaca yn iuh catqui yn innonquaahxiliz yn innonquahecoliz ynic no huel ce ahxiliztli hecoliztli quipia yhuan ce tlahtocayotl yhuan quimittitique yn quezquîtin oncatca yhcuac oncan y huel oc yehuantin tlahtocapipiltin oquichtlahtocatlachihualtin no yhuan yn quezquintin on catca pipiltin motenehua tlahtoca cihuapiltlachihualtin mochtin quimittac yn omoteneuh Juez ynic oncan ceme yxquetzalozque ce tlahtohuani mochihuaz Panohuayan auh oc cence yehuatl quittitique yn omoteneuh Juez yn itlacamecayo Don Joseph de Sancta Maria Teuhctlacoçauhcatzin yn iuh catqui ytlacatiliz ynic çan cihuapiltlahtocatlachihualli çan itechpa ynantzin ynic pilli auh yn itechpa yttatzin çan tequihua quapilli catca ytoca Chalchiuhhecatzin ynin huel oncan chane catca y Panohuayan ychpochtzin yn tlahtohuani huehue quauhcehcecuitzin tlamaocatl Teuhctli yn quimocihuahuatica ynic oncan motlacatilli omoteneuh Don Joseph de Sancta Maria auh yn o yuh quittaqu in omoteneuh Juez Andres de Stiago xuchitototzin yn iuh catqui ytlacatiliz ytlacamecayo yn omoteneuh Don Joseph de Sancta Maria Teuhctlacoçauhcatzin ynic çan cihuatlachihualli pillotica auh yn ittatzin çan macehualli quauhpilli auh yn o yuhqui quittaqu in omoteneuh Juez huel yc amo quiceliaya çan quitlatzilhuiaya ^y çan niman amo quinequia ynic yehuatl tlahtocatzin Panohuayan ca noço huel yehuatl yn quixquetza Panohuayan tlaca ynic intlahtocauh yez auh ye oncan in yn quihto omoteneuh Juez quimilhui yn panohuayan tlaca yhuan Amaqueme^q ca nimechilya ca amo monequi yehuatl in tlahtocatzin Panohuayan ypampa caçan cichuatlachihualli auh yn iuh connequia yehuatl omoteneuh Juez Huel ce oquichtlahtocatlachihualli yn oncan quitlahtocatlalizquia Panohuayan auh ynic huel yehuatl quixquetzaya quimacaya tlahtocayotl Panohuayan yn itoca Don Mateo Tetlilnellohuatzin Tecpanecatl teuhctli ypampa huel  quittac yn itlacatiliz ynic tlahtocaoquichtlachihualli panohuayan ypiltzin catca yn tlahtohuani Quauhcehcecuitzin tlamaocatl teuhctli auh macihui yn iuh omoteneuh Juez ynic yehuatl Don Mateo Tetlilnellohuatzin quimacaya tlahtocayotl yece y yehuatl amo quicelli çan quilhui ynic quinanquilli tlahtohuanié ca cenca nimitznotlatlauhtilia ma ça yehuatl xicmomaquilli yn Don Joseph de Sancta Maria in tlahtocayotl ca nomachtzin yhuan ca ohuiya yn xuchipillan yc niman quinanquilli quihto y Juez ye nimitznolhuilia ca amo huel mochihuaz ynic yehuatl tlahtocatzin Panohuayan auh ma ye yehuatl oncan in tlahtocati// in Don Juan de oJeta Quauhcehcecuitzin yn otlacatito tlalmanalco yn itlaçopiltzin Don hernando de guzman omacatzin Teohua teuhctli tlahtohuani ca oniquittac yn itlacamecayo ca amoxhuiuh amopiltzin yn ompa oquichihuillito cihuapilli papaloxuchitzin yn ichpotzin tlahtohuani catca Quauhcehcecuitzin tlamaocatl Teuhctli ca nican Panohuayan mohuicac yn inantzin ca cenquiztica yn ihezço yn itlapallo yn iconetzin  omoteneuh Don Juan de oJeta ma xicmaniliti yn ompa tlalamanalco ma yehuatl nican quipiaqui y nauhtlayacatl altepetl Panohuayan ynic nauhcan ca tlahtocayotl ca nel yxhuiuhtzin no yehuatl in tlahtohuani catca huehue Quauhcehcecuitzin auh ynin yc tlanahuatica omoteneuh Juez in ça tepan amo huel mochiuh ynic canazquia omoteneuh Don Juan de oJeta quauhcehcecuitzin yn ompa tlalmanalco auh yc niman no ceppa quihto in Juez quilhui in Don Mateo Tetlilnellohuatzin ca ye cualli ma yhui Don Mateohe ca motencopa ye nicmaca in tlahtocayotl Panohuayan in momach Don Joseph de Sancta Maria yn amo huel yuh mochihuazquia amo nehuatl notlahtlacol ca tehuatl motlahtlacol ynic niman huel oquimacac oquitlahtocatlalli y çâ ye ypan omoteneuh xihuitl de años tlahtohuani tlamaocatl teuhctli mochiuh yn Panohuayan yn oncan in no cenpohuallonmatlactli xihuitl yn amo noyac tlahtocat çan cuauhtlahtolloc yhcuac quincauhque ^y yn itztlacoçauhcan tecpan yhuan tlayllotlacan teohuacan tecpan ynic aocmo ôpa ontecpanohua yn omoteneuh oc Excanme pipiltin ya yehuantin in y panohuayan tlaca yhuan tzacualtitlan Tenanca yhuan Tecuanipâ tlaca O yuhqui yn ynic tlacenquixtilli ynic tlaneltilili yn altepehuehuenenonotzaliztlahtolli yn ixquichtlamantli nican ye toconcaquiz Ticpohuaz yn ipan in huehuenemilizamoxtli in çaço ac tehuatl tamapouhqui yn tichristiano ynic amo tle ytlah yc timotzotzonaz Tomeyollohuaz ynic amo tiquihtoz campa oquiz yn ixquichtlamantli huehuenemiliztenonotzaliztlahtolli nican neztoc teneuhtoc huel xicmomachilti ynin huehuenemiliztlahtolli ca mochi ye huecauh neltiliztli ca omochiuh yhuan ye huecauh miequintin tlaçohuehuetque yllamatque y huel huehuetlahtolmatinime catca yn oquitlalitiaque yn oquitecpantiaque ynin huehuexiuhtlapohualamoxpan yn oquihualtlapalycuilotiaque ynic oquihualtecpancapixtiaque yn iuh oc nepa in huehuenenonotzal mochiuhtiuh yn oquineltilitiaque yn iuhqui ^y mochi yn quimattihui auh ynic huel ticmatiz ca nehuatl Don domingo de S Anton Muñon Quauhtlehuanitzin Chimalpahin mochi onictemo ynin huehuetlahtolli aquin oc quimati topan axacan tonemilizpan auh ynic amo polihuiz ylcahuiz yn ynic oc ceppa ye no nehuatl axcan nicneltilia nicyancuilia niccenteamoxtlalia oc ceppa nicacicatecpana yn iuh ye huecauh onemohuaco yn iuh otlamanico yn nican ypan yc ontlayacatl altepetl Tzacualtitlan Tenanco chiconcohuac Ama^qmecan yn hueycan in ceme yc nauhcan ticate ypan yc cemaltepetl motenehua la Provincia de chalco nican quittazque yhuan quimatizque yn axcan cahuitl ypan monemiltia tepilhuan yhuan quin ye nemiquihui yn amo quimatia yn iuh catqui yhuehuenenonotzallo yn ihuehuetlahtollo altepetl yn iuh niman ye onneciz ye onmotecpancapohuaz yn ipan in huehuealtepetenonotzaliztlahtolli Huehuenemilizamoxtli

2r 21

Auh mocichui y huel yxtlamatini catca yn omotenuh yehuatl Juez Andres de stiago xuchitototzin yn iuh nican ye onneciz ye onmotaz yn izquitlamantli qualli yectli quichihuaco ynic quiyectlallico yn itlacauhticatca nican altepetl Amaquemecan yece oc mopolloco yn ixtlamachiliztica yehica ypampa ytla ye nelli huel yxtlamatini ynic quinalquixtizquia yxtlamachiliz amo quitlatzilhuizquia amo quitzotzonazquia yn itlacatiliz ynic cihuatlachihualli catca omoteneuh tlacpac Don Joseph de Sta Maria tlamaocatl teuhctli yn iuh quitlatzilhuico quitzontzon Juez auh ytla nelli yxtlamatini ynic huel conaxiltizquia yxtlamachiliz yz catqui ontlamantli neyxcuitilli omochiuh y ye hue cauh yn oc tlateotoquilizpan yn o// tlacatecolonotzalizpan ^y nican ypan altepetl Ama^qmecan ca omentin yn cihua otlahtocatico // yn ipan ontlayacatl ôcan oyehuatic opopouh// yn cihuatlahtocayotl ynic ceccan // ypan ynic ontlayacatl Tzacualtitlan tenanco chiconcohuac yn ce tlahtocacihuapilli otlahtocatico otepachoco oteyacanaco yn oqu ipan omoteneuh tlateotoquiliztli tlacatecollonotzaliztli yn otlahtocatico ychpotzin in tlahtochuani Quahuitzatzin tlayllotlac Teuhctli catca yn cihuapilli ytoca catca xiuhtotzin chiuhcnauhxihuitl yn tlahtocat auh yehica yn omotenuh tlahtohuani quahuitzatzin yn ihcuac momiquilli ayac oquichtli ypiltzinquicauhtia ^y nican ypan tzacualtitlan tenancayotl çan mochi ychpotzitzinhuan yn quincauhtia Eyntin ynic ce yehuatl yteyuhctzin motlahtocatlalli ya yehuatl yn omotenuh ytoca xiuhtotzin cihuatlahtohuani tlayllotlac Teuhctli mochiuh yn itlahtocatiâ yttatzin catca auh yn ipampa oncan in tzacualtitlan Tenanco otlahtocatico ynin cihuapilli yc oncan quimicnopilhulli quinmacehui yn tlahtocayotl y pillotl yn iconetzin tlahtohuani ytztlotzin tlayllotlac teuhctli yhuan yxhuiuhtzin Quauhtlehuanitzin tlayllotlac teuhctli yn ipan mantia chalcayotl ynic techpeuh Mexicatl yhuâ ynic cen mochiuhtin yn itech quiça yn itlacamecayohuan pipiltin y manel ça cihuatlachihualtin onyezque yn oncan in ypan tzacualtitlan Tenancayotl ca yehuantin oncan piltizque tlahtocatizque quipiazque yn altepetl ca ya yuh omotlalliyyeliz ayac oncan quitlatzilhuiz yn pilotl in motenehua yn ça çihuapiltechihualiztli yc tlacati pipiltin amo yc mahuipololoz^q ca no yehuantin yezque piltizque tlahtocatiz^q tepachozque Teyacanazque yn ipan tzacualtitlan tenancayotl yehica ca yuh oquinmacehui yehuatl yn omoteneuh cihuatlahtohuani catca xiuhtoztzin yn itech quiça auh ynic occan nican ypan ynic macuiltlayacatl tlayllotlacan Teohuacan Ama^qmecan // yn oc ce tlahtocacihuapilli otlahtocatico yn oteyacanaco yn otlapachoco yn oc no ypan tlateotoquiliztli y tlacatecollonotzaliztli ytoca Tlaco cihuatzin ychpotzin in in tlahtohuani huehue Cacamatzin Teohua Teuhctli achto yuhqui yn ytoca mochiuh yn omoteneuh tlaco cihuatzin Teohua teuhctli mochiuh// chiuhcnauhxihuitl yn tlahtocat tlayllotlacan Teohuacan yn itlahtocatian yttatzin catca huehue cacamatzin teohua teuhctli auh yn ipampa no oncan in tlatocat tlayllotlacan Teohuacan cihuapilli omotocateneuh tlaco cihuatzin yc no oncan oquinmacehui y pilotl y tlahtocayotl ynic cen ye mochintin yn itech quiça  yn itlacamecayohuan pipiltin y manel çan no cihuatlachihualtin onyezque yn oncan ypan tlayllotlacayotl Teohuacayotl ca yehuanTin oncan piltizque tlahtocatizque quipiazque yn altepetl auh ca ye yuh oneltico omochiuh yn oncan in yn iuh yehuantin y ye ymintotonhuan omoteneuh cihuatlahtohuani Tlaco cihuatzin Teohua teuhctli y çan cihuatlachihualti y tlacpac ye miecpa omotocatenehuaque omentin ynic oncan in ce tlayllotlacan otlahtocatico yehuatl yn Don Juan de Sandoval Tecuanxayacatzin Teohua Teuhctli mochiuh ynic ome yehuatl y Don Thomas de Sm^jn quetzalmaçatzin chichimeca Teuhctli tlahtohuani mochiuh ytztlacoçauhcan ynin omoteneuhque omentin tlahtoque ynic ayac motlapololtiz quichicocaquiz yn innantzin catca ça no ytoca catca tlaco cihuatzin yc teomeca ychpotzin in catca yn tlahtohuani Toyaotzin chichimeca Teuhctli ye yxhuiuhtzin in catca y tlacpac omoteneuh yn illama Tlaco cihuatzin cihuatlahtohuani catca Teohuacan yn omoteneuhque omentin tlahtoque Don Juâ de Sandoval tecuanxayacatzin teohua teuhctli yhuan Don Thomas de S m^jn quetzalmaçatzin chichimeca Teuhctli yn oncan yocanixti ynic cececni otlahtocatque maço nellihui y çan incihuachan yece in ça tepan ca no yhuan yn inpilhuan yn imixhuihuan o no oncan in tlahtocatico opiltico yn iyocampayxti omoteneuh tlayllotlacan Teohuacan yhuan ytztlacoçauhcan y ye christianoyopan yn iuh niman ye onneciz onmottaz o yehuatl in oncan tlami yn yn itlahtollo y cihuapillotica Techihualiztli

2r 22

Auh ynin nican omoteneuh tlahtolli yca ynin ytla ya nelly yxtlamatini catca omoteneuh Juez Andres de Stiago xuchitototzin ynic nican tetlahtocatlallico ypan Etlayacatl ahnoço nauhtlayacatl altepetl ama^qmecan yehuatl in ytech canazquia ypan in yazquia ynic amo quitzohtzonazquia amo quitlatzilhuizquia yn itlacatiliz yn itlacamecayo ynic cihuapiltlachihualli yn omoteneuh// Don Joseph de Sancta maria tlamaocatl teuhctli ynic quitlahtocatlallico Panohuayan yehica ytla ye nican oquimatico oquittaco oytitiloc onextililoc in quenin nican ypan ontlayacatl oncan omotlahtocatillico omentin cihuatlahtoque ye huecauh yn oquipiaco altepetl o yehuatl in yn quitlatzilhuico omoteneuh Juez in tlahtocacihuapiltechihualiztli ynic piltihua çan itechpa nantli yn amo yehuatl yca ttahtli auh macihui yn iuh motenehua ^y yn cequintin pipiltin yn çan cihuapiltlachihualtin yc piltin yece yn ipan mellahuac Justicia camo tel yc mahuizpolihui ca  tel huel no monequizque yn ihtic altepetl ynic huel piltizque tlahtocatizque quipiazque yn altepetl yn canin intlacatian moteneuha yquizcan yyolcan yn innantzitzinhuan oc cenca ypan yn axcan christianoyotl yn oncan huel Teoyotica sacramentotica ochihualloque Tepilhuan ca ylta nel huel macehualtzintli Toquichtin ^ytla teoyotica sacramentotica quimonamictiz yn tlahtocacihuapilli yc pahti yc yectia yn innepilhuatiliz cualli tlacatiliztli yc tlacati yn inpilhuan ynic huel ynemac mochihuaz tlahtocayotl yn anoço gouernacion yn oncan ytlacatyâ ynnantzitzinhuan yn anoço axquitica tlatquitica yn ipan pilotl huel nemaquehque yezque yn tlahtocacihuapiltlachihualti ca amo yqu itlacahui ca amo quichicoquixtia y cualli yectli tlacatiliztli yn tlahtocayeztli y tlahtocatlacamecayotl auh ca çan no yuh tlaçotli y tlahtocapilte chihualiztli oquichtica ca no yuh patiyoque ^y cihuapiltlachihualtin auh yehica ypampa tle yn ocque eztli quipia ynpil oquichtlachihualli amo çan ye no yuhqui yn cihuatl quipia Auh ynic nelti ynin yxquich nican omoteneuh tlahtolli ma ticneh//hulican ma ytech machiyotl Toconanacan in tehuantin timacehualtin nican ypan nueva españa Titlaca ynic no ypan Tiyazque Tictocazque yn intlahtocayeztzin yn intlahtocanenahuatiltzin yn ipan mohuica y quimotoquilia y yehuantzitzin y huel oc cenca tachcahuâ tlaneltoquiliztica yhuan huel oc cenca huehueyntin ynic tlahtoque ^y Reyes y Emperadores yn omotlahtocatillico yhuan yn axcan motlahtocatilia yn ompa españa yn iuh ca imnemachtzin yn iuh ca yn intlahtocanenahuatiltzin motenehua ley yn quimotoquilia yn ipan mohuica

2r 23

Auh ca yuhqui yn yn iuh oquimotlalilitiaque yn intlahtocatlanahuatiltzin yn ihcuac tla quenmanian pilihuiquihui yn intlahtocatlacamecayopantzinco yn intlahtocapilhuantzitzin oquichtin amo yc polihuiz in tlahtocayotl españa ytla ye onyezque cihua yn intlahtocaychpotzitzinhua yehuantin huel tlahtocatizque yn ompa españa yn tlahtocacihuapipiltin yn imichpochhuan Reyesme yn ihcuac huel ymonecyan yez ytla ca ocaque onyezque oquichtin in tlahtocapipiltin in tlahtocaoquichtlachihualtin in yehuantin   huel nemaquehque yezquia yn ipan tlahtocayotl auh ytla ye onyezque tlahtocateychpochhuan yehuantin ceme macozque in tlahtocayotl tlahtocateocuitlaycpacxuchitiloz coronatiloz yehuatl quipiaz in tlahtocayotl españa ynehuan yn aquin teoyotica Sacramentotica quimonamictiz ce tlahtocapilli ytla nel cana hueca ce huey altepetl ypan huallaz y conoquichitlaniz tlahtocacihuapilli huel ynehuan tlahtocatizque yn oncan españa ynic mopilhuatizque oncan yntech quiçazque in tlahtocapipiltin ynic ça tepan yehuantin yezque quinnemactitehuazque intech quipouhtehuazque yn españa tlahtocayotl ynic amo polihuiz ynic amo cotoniz tlahtocatlacamecayotl yn iuh ye oppa omochiuh españa

2r 24

Yn imezço// y huel mellahuac yn intlacamecayo y yehuantin tlahtoque Reyes españa yhuan Emperador // Don Carlos quinto yhuan in tohueytlahtocauh Rey axcan ompa motlahtocatilia amo huel mitoz y macamo yntech moquixtia in cenca ahco tlacpac moyetzticate in tlaçotecpipiltin tlahtoque// yn itlahtocahuan yehuantin motenehua Godos y ye ontzonxihuitl ypan // yepohualli ypan caxtollomome xihuitl axcan y ye oncatqui in tlahtocacalli in tlahtocatlacamecayotl castillan in çâ niman ayc cana ocotonico y maca çan iuh mecatl yn tlahtocatlamecayotl (sic) ytech huitz in tettatzin quihualmaca ypiltzin ahnoço ychpoch ahnoço yteyccauh ahnoço ymach ahço centlamampa yteyccauh ynic amo campa oyah ynic amo can opoliuh yn in intlacamecayo y huel mellahuac intlahtocatlacamecayo y yehuantin tlahtoque Reyes Godos in oncan canin peuh ça ye oncan in catqui yn amo micuania yn intlahtocaTeocuitlatopil y macana oc ce tlacamecayotl ytech auh yehica ypampa y yehuatl tlahtocapilli infante catca Don Pelayo in tlahtocatico ça tepan y ye o yuh tlahpoliuh y ye o yuh pehualloque España tlaca çan no yehuatl oncan tetech quiça oncan tepiltzin yn iuh cequîtin quihtotiuh ca yteyccauh ^y in tlahtohuani Rey catca Don Rodrigo yn ipan mochiuh yaoyotl España ynic cacico Morostin anoço cacica quipoloca yehica ca oc ceppa oquicuique in christianosme auh yc atle yuhqui atle caci tlahtocayotl in ipan christianoyotl y manel no ypan in tlahtocayo Morostin yniqu iuhqui ynic cenca ye hueca auh yehica ypampa yn ipan mochi oc cequi tlahtocayotl omicuani omopahpatlac in cenca mahmahuiztic omihiquani ohuetzito yn tlahtocayotl ytech oc cececcan tetlacamecayotitech ahnoço yntech oc cequintin tlaca ahnoço çan otepehualtique oquinpeuhque oc centlamâtin tlaca

2r 25

Auh nican ca ytlahtollo yn quenin ompa españa ynic no hueliti cihua yn imichpochhuan tlahtoque Reyes cihuatlahtoque Renasme (sic) mochihua yn ihcuac ayac onca oquichtli ynic yehuatl huel tlahtocatizquia auh ca yuhqui yn yn iuh mochiuh

2r 26

Auh ca ytech in Don Juan Segundo tlahtohuani Rey moyetzicatca yn ompa castillan yhuan yc occan ompa motenehua leon yn ihcuac momiquilli yn omoteneuh tlahtohuani yn quinchiuhtia yn quincauhtia ypilhuatzitzin omentin ce ytoca Don Henrique Quarto impotente quihtoznequi ynic impotente tzinmicqui yoquichnacayotica ynic amo huel mopilhuatihtia cenpohual xihuitl yn tlahtocat España auh y momiquillico ypan xihuitl de años

2r 27

Auh ynic omentin ypilhuatzitzin omoteneuh tlahtohuani Don Juan Segundo ytoca Doña Isabel Catholica ynic catholica mihtohua quihtoznequi cenca tlaneltocani catca

2r 28

Auh ynin omoteneuh tlahtocacihuapilli yn o yuh momiquilli yachtzin omotocateneuh Don Enrique Quarto auh yc niman yehuatzî macoc in castillan yhuan leon tlahtocayotl yn omoteneuh tlahtocacihuapilli Doña isabel Catholica cihuatlahtohuani Reyna mochiuhtzino ynehuantzin yn inamictzin Don Fernando Catholico quinto tlahtohuani Rey mochiuhtzino// ypâpa yn icihuahuatzin Aragon ychantzinco ompa conmoquichitlani yn omoteneuhtzino cihuatlahtohuani auh ynin omoteneuh cihuatlahtohuani y motlahtocatilli cenpohuallonmatlactli ypan ce xihuitl y momiquillico ypan xihuitl de años auh y quincauhtia ychpotzitzinhuâ nahuintin yn inehuantzin quinchiuhque ytlaçonamictzin Don Fernando catholico ayac oquichtli quichiuhque auh yn imichpotzitzinhuam ynic ce ytoca Doña isabel ynin ompa mohuicac yn Purtugal ynamic mochiuhca yn tlahtocapilli Don Alonso ypiltzin in tlahtohuani Rey Don Juan çâ no Segundo yn ompa chane Purtugar auh yn omomiquilli Don Alonso yc no cuel ceppa yn tlahtocacihuapilli Doña isabel conmonamicti in tlahtohuani Rey Don Manuel y ça no ompa chane Purtugal

2r 29

Auh ynic omentin yn imichpotzitzinhuan tlahtoque Reyes catholicos Don Fernando yhuan Doña isabel ytoca Doña Juana ynin quimonamicti yn Archi Duque de Austria ytoca Don Philipe ypiltzin in y Emperador Maximiliano auh ye ymixhuiuhtzin y Emperador Federico el pacifico ynehuantzin y emperaTriz Doña leonor de Purtugal ynin ompa tlahtoque in Roma yece ompa mochantitzinohua y Alemaña auh y Don Philipe yhuan ynamictzin Doña Juana yntech otlacatque oquinmochihuilique yn omentin yn amo panahuiliztin yaoc y motenehua Çesares Don Carlos Quinto Emperador mochiuhtzino yhuan Don Fernando no Emperador mochiuhtzino ymomextin ompa tlahtocatque y Alemaña yece ompa motlacatilique yn flandes ca huel oncan ychatzinco oncâ motlacatilli yn inttatzin ye omotocatenuh Don Philipe in ça tepan oncan motlahtocatillico yn españa ca noç oncan tlaoquichitlantli mochiuhtzino ypampa yn inamictzin oncan tlahtocatico

2r 30

Auh ynic Eyntin ymichpotzitzinhuan tlahtoque Reyes Catholicos ytoca Doña Maria ynin conmonamicti in tlahtohuani catholico Rey Don Manuel yn ompa chane Purtugal y yehuantin in tlahtoque Reyes yntech tlacatque ompa quinchiuhque y cenca huel christiano moyetzticatca tlahtohuani Rey Don Juan Tercero yhuan y tlahtocapilli Don Luis

2r 31

Auh ynic nahuintin ymichpotzitzinhuan tlahtoque Reyes catholicos ytoca Doña Catherina ynin cihuapilli conmonamicti yn tlahtohuani Rey Artur ompa ychan Inglaterra auh yn onmomiquilli ^y tlahtohuani Artur yn cihuatlahtohuani yc no cuelle yc oppa yehuatl conmonamicti y tlahtohuani Rey HEnrique octauo yteyccauh catca yn omoteneuh tlahtohuani Rey Artur ompa chaneque ymomextin yn ayhtic inglaterra

2r 32

Auh yn ihcuac yn o yuh momiquilli Doña isabel catholica auh y yehuatl ynamictzin y cenca tlaneltocani catca catholico Rey Don Fernando yn ihcuac y ye oquimomiccamahuiztilili y miccatlatlatlauhtiliztica y cenca tlaneltocani cihuatlahtohuani Catholica Reyna Doña isabel moyetzticatca yc niman motlanahuatilli ynic niman huallazque nechicahuiquihui yn oncan tlahtocaTecpan in mochintin huehueyntin tlaca yn iteuhc yohuan yn itlahtocayohuan yn ipan tlaca yn itlahtocatlapachopantzinco auh yn ihcuac ohuallaque yn ocenquiçaco yc niman quinmonahuatilli quinmocuitlahuilli ynic yehuatzin quihtozque quitenehuazque in Doña Juana ychpotzî ynic yehuatzin oncan tlahtocatiquiuh castillan yhuan leon auh y ye o yuh quichiuhque yn yn itlanequiliz tettatzin yc niman conmomachiztilli yn ichpotzin yn ompa namiquetica yn ompa yhcuac moyetzticacta ypan tlahtocayotl condado de Flandes yn itlantzinco ynamictzin y cenca mahuiztlacatl tlahtohuani Rey Don Philipe yn ipiltin Emperador Maximiliano auh y ye o yuh quimocaquiltihque yhuan yn oqu ic ayemo hualmohuicaya oncan españa ypampa omotlapachilhui omotlahtocatilli yn ittatzin Don Fernâdo oc huel yxquichica ahcico yn ipan Metztli Abril yn ipan xihuitl de años oc onxihuitl yn ompa onmotzicotzinoca ynic nimâ hualmohuicaque oncan españa yn o yuh hualmohiicaque ^y auh yc no niman oquimocahuilli yn Tepacholiztli in tlahtocayotl yn oncan ypan omoteneuh tlahtocayotl españa yn Don Fernando auh yc niman onmopehualtihque mohuicaque ynehuantzin y Doña Germana ynic ome ycihuauh mochiuh Don Fernando mohuicaque ompa yn intlahtocayopan Aragon

2r 33

Auh yn ihcuac ypan in cahuitl yn on yuh hualmohuicaque in tlahtohuani Rey Don Philipe Primero yn inehuantzin cihuatlahtohuani Reyna Doña Juana oncan motlahtocaTecpanchantitzinoco y motenehua Villa de Valladolid ynic niman oncan oquinmotlacamachiltihque yn inmacehualhuâ ynic intlahtocahuan omochiuhtzinoco yhuan yn inconetzin Don Carlos yntlahtocapillo mochiuhtzino in castillan tlaca yhuan Leon tlaca auh amo onmohuecahualtico çan onmomiquillico in tlahtohuani Rey Don Philipe Primero oncan yn ipan altepetl ciudad Burgos ypan yc mani metztli SepTiembre y çâ ye ypan omoteneuh xihuitl de años çan nahui Metztli yn onmotlahtocatillico oncan españa ynic niman omocnocihuatilli Doña Juana yc cen aoqu ic omonamictitzino yc no niman quimocahuilli in tehuiquiliztli y tepacholiztli yn oncan ypan tlahtocayotl auh yc nimâ ompa motlalitzinoto yn itocayocan Tordesillas oncan quihualmohuiquilli yn imiccanacayotzin yn inamictzin ocatca oncan tococo ynic oncan ça yceltzin monemiti cenquizcacualyecycnocihuanemiliztica y huel yxquichica onpohuallonmatlactli xihuitl auh y teytquiliztli y tepacholiztli yn ipan in tlahtocayotl españa ytechquimocahuilitia y teoyotica tlahtohuani cardenal oncan españa Don fr Franco Ximenez Teopixqui catca San Franco no yhuan ^ytech quimocahuilitia yn itenánamiccahuan yn iconsejotzin tlaca yn ocyxquichica ynic ye no hualmocueptzinoz tlahtohuani Rey Catholico Fernando ytlaçottatzin ynic quimopieliquiuh tlahtocayotl ypampa yxhuiuhtzin Don Carlos yn oqu ic ompa moyetzticatca Flandes ytlantzinco yn iahuitzin Doña Margarita ompa ytlahtzinco mohuapauhtzinohuaya

2r 34

Auh y catholico Rey Don Fernando quihualmohuiquililique ompa y Napoles yn incartatzin yn intlatlatlauhtiliztzin yn cihuatlahtohuani Reyna Doña Juana yn ichpotzin yhuan yn ixquichtin huehueyntin tlaca yn  iteuhcyohuan yn itlahtocayohuan conmonochilique ynic hualmohuicac ynic ye no motehuiquilico ye no ni cuel oquimopachuilhuico oquimopielico ynin tlahtocayotl españa çan tlamatca yocoxca mellahuacatlachihualiztica huel yxquichcauh chiconxihuitl auh yn oquiz ynin chiconxihuitl oncan hualmoquixti oncan hualmohuicac yn ipâ altepetl ciudad Plasensia auh ynic  niman oncâ oquihualmonochilli in tt Dios oquimomaquilli y nelli huel nelli cemihcac tlahtocayotl ylhuicac huel oncan yn itocayocan Madrigalejo ypan yc cenpohuallomome mani metztli Enero ypâ xihuitl de años ye yuh Epohuallonnahui xihuitl monemiltia tlacticpac yhuan ye yuh onpohualli ypan onxihuitl yc motlahtocatilia auh yn imiccanacayotzin ompa huicoc yn ipan huey altepetl ciudad Granada ynic ompa quimotoquillito yn intlahtocacapillatzinco ytloctzinco ynahuactzinco in cenca tlayectenehualtzintli tlahtocacihuapilli Reyna Doña isabel yn achtopa ycihuahuatzin catca yn ompa Toctoc ynacayotzin

2r 35

Auh yn oyuh quimohuiquilli tt Dios in tlahtohuani Rey catholico Don Fernando auh ça yceltzin o mocauhtzino yn ipan tlahtocayotl in cenca mahuiztlacatzintli cihuatlahtohuani Doña Juana mochi ytetzinco pachiuh y tlahtocatepacholiztli yn oqu ic amo oncâ moyetzticatca tlahtohuani Rey Don Carlos yn iconetzin yn iuh omihto ompa moyetzicatca y Flandes auh yn ihcuac oquihualmomachilti omomiquilli yn omoteneuh tlahtohuani Catholico Rey Don Fernando yn icoltzin yc niman hualmohuicac yn oncan españa ypan ynic mani Metztli Septiembre ypan xihuitl de años yece oc ceppa huel omonec ynic ompa ycuitlahuicpatzinco mocueptzino çan onxiuhtica Auh yehica ypampa ynic no momiquilli in huey tlahtohuani Emperador Maximiliano yn icoltzin ompa momiquilli yn itocayocan Belfs huel ytzinpeuhyan y xihuitl de auh y yehuantin in tepehpenanime y teyxquetzanime in tetlahtocatlaliani yn ipan huey tlahtocayotl y Emperadoryotl yn ompa pouhqui Roma ahnoço ynic ça çe ye mochintin Alemaña// oquicemihtoque oquimotenehuillique ynic yehuatzin oquitlahtocatlallique omacoc y huey tlahtocayotl Emperadoryotl pouhqui Roma yn Don carlos quinto yc temacuilca mochiuhtzino yn iuhqui yntocatzin in yn Roma tlahtoque

2r 36

Auh ypampa ytlapachocatzin yGouernadortzin quimochihuilitia yn ipan tlahtocayotl españa in Teoyotica tlahtohuani Cardenal Adriano Obispo yn ipan altepetl Tortosa yqu i cepan mochintin yn itlahtocatenahnamiccahuan yn itlahtocaconsejotzin tlaca yn oncan Valladolid Auh ye no ceppa hualmohuicac hualmocueptzino yn oncan españa y Emperador ypan xihuitl de as ynic oncan ypan huey tecpilaltepetl Seuilla quimonamictitzinoco y cenca mahuiztlacatzintli Emperatriz y huel nelli cihuatlahtohuani Reyna y huel christiana Doña isabel y huel ymicnopiltzin ^y macehualtzin ynic ymichpotzin mochiuh y huel oquichtlapalticatzintli Don Manuel tlahtohuani Rey moyetzticatca yn ompa Portugal ypan xihuitl yn quin iz tlayxpan de años ynic oncan quimochihuillique quimotlacatililique y huel tlaneltocani tlahtohuani Catolico Rey Don Philipe Segundo ynic Teomeca Totlahtocatecuiyo omochiuhtzino

2r 37

Auh yc ye no mocueptzino yn ompa Alemaña ynic ompa Emperador mochiuhtzinoticatca quimopieli in Roma tlahtocayotl auh no yxquichcapa ompa hualmotlahtocatiliaya yn españa inic oncan Rey hualmochiuhtzinoticatca yn oncan españa tlahtocayotl camo Emperadoryotl ca çan mihtohua Reynoyotl

2r 38

Auh yn omomiquillico cihuatlahtohuani Reyna Doña Juana ypan Jueues Sancto de la cena ynic matlactionce xi mani Metztli Abril yn ipan xihuitl de años ompa ynic moyetzicatca yn ipan altepetl Villa de TordeSillas ye  yuh Epohuallonmatlactli ypan Exihuitl monemiltia tlacticpa yn oncan campa mocnocihuayetzticatca yhua çan mococotzinoticatca y huel yxquichcauh onpohuallonmatlactli xihuitl

2r 39

Auh y cenca huey tlapiltic tiyacauh y huel tlaneltocani catholico Emperador y huel netlamachtilylnamiconi Don Carlos Quinto y momiquillico ypan yc mani Metztli octubre ypan xihuitl de años ye yuh onpohualloncaxtolli ypan Exihuitl yhuan ypan chicome Metztli ye monemiltia tlalticpac Auh yhuan ye yuh onxihuitl omotzauhctzino yn oncan Teopixcacalli monasterio de S Juste yn oncan moyetzticate tlaçoteopixque frayles ypilhuantzitzin Sanct Hieronimo yn ipan altepetl La Vera de Plasencia ynic oncan y cepâ yntloctzinco ynahuactzinco cenquizcacualyecsanctoTeoyotica monemitiaya y cenca oquichyoTica Tiyacauhyotica omahuizyohuac nican tlalticpac quimocahuilli quimotelchihuilli yn itlahtocayotzin ynic huel cualtica yectica oquichyotica tiyacauhyotica quimocuiliz mahuiyotl cemihcac yn ompa ylhuicac in  tt Dios oquimocencahuilili ynic quimoxtlahuililiz quimocuepcayotililiz yn ica yn amo can tlanqui tzonquizqui omochiuh cococ teopouhqui noteliniliztli tlayhiyohuiliztli yn quimihiyohuilti quimochihuili ynic quimomanahuilli ynic quimohuecapanilhui in totlaneltoquiliz Sancta fe Catholica

2r 40

Auh y ye oncan in teopixcacalli monasterio quiquixtito yn iyomiyotzin Emperador oncan quihua llicuanique in tlahtocateopan S lorenço el Real yn oncan catqui motenehua Escurial yn oncan çâ no yehuatzitzin motlapialia S Jerónimo Teopixque yn  quihuallicuanique yyomiyotzin ypan xihuitl de años auh ynic quihuallicuanique yn iyomiyotzin Emperador ytech yc motlacahuilnectzino in tlahtocatleyomahuizyotlahtohuani Rey Don Philipe TotlahtocaTecuiyo ytech yn Don Hernando Henriquez de Ribera Duque de Alcala tlaçopilli chane yn oncan Seuilla auh huel quimochihuilli yn itechpa yca huel quimomahuizçotilli çan huel ytech quimotilli yn iuh ac yehuatzin ytechzinco omonec tlamahuiztililiztli

Folios: 0r  1r  2r