 |
 |
 |
 |
 |
 |
 |
 |
Reproduccion digital
1. Nopiltze, nocuzque, noquetzale, otiyol, otitlacat, otimotlahticpacquixtico ; in ytlalhticpac in totecuyo omitzyocux, omitzpic, omitztlacatili in ypalnemoani in Dios. Auh mixco mocpac otitlachixque in timonauan, in timotauan ; yoan in mauiuan, in motlauan, in moayolhque omixco omocpac tlachixque, ochocaque, otlaucuxque mopampatzinco inic otiyol, inic otitlacat in tlalticpac
2. Auh yn axcan achitzin otiuallachix, otiualhmozcali, otiualizcayac, otiualhchamauac ; yuhquimma titototzintli iyequin timotlachopinilia ; yuhquimma quiye tiualhquiça in mocacalloctzinco ; yuhquimma quiye timotlacoquentia ; yuhquimma quiye quiça in mocuitlapilhtzin, in matlapalhtzin ; yuhquimma quin quentelhtzin ticoolinia in momatzin, in mocxitzin, in motzontecontzin ; yuhquimma yequin timoyeecoa inic tipapatlantinemiz
3. Auh quen comonequilhtia yn ypalnemoani, aço cemilhuitl, aço omilhuitl timitztotlaneuizque, ticuzcatlaneuizque, tiquetzallaneuizque ; ypaltzinco yn totecuyo aço ticaz, aço tinemiz in tlalhticpac ; ma oc yuian, ma oc ycemel yxiualhmana, yxiualhmozcalhti, ma yliuizteua, ma yliuiztia. Ma çuc ye ytloctzinco ynauactzinco ximocalaqui in totecuyo, inic mitzmotlauculiliz. // Auh ma oc yehuatzin quimomachitia, ma çuc yehuatzin mitzeheco, mitztamachiua, ca teutl, ca tlatoani, ca uey macoche, ca uey teputze. Ca yehuatl Dios uelh monantzin, motatzin, ycenca tlapanauia inic uelh mitzmocuitlauitzinoa, inic mitzmotlaçotilia, in amo mach yuhqui inic nimitznotlaçotilia in nehuatl in nemonan, in nimota ; yeica ca yehuatzin oquito, oquiyocux, oquimoyoculili, inic otiyol, inic otitlacat. // Ma ticmolhcauilli ; ycemilhuitl, yceyoalh xicmonochilitinemi, xicmotlatlauhtilitinemi, xelhciciuhtinemi, xitlaucuxtinemi ; macamo yuian in cochiztli, in netequiztli yxicmochiuili : ma ontlami in mittzin, in moyollotzin in ytechcopatzinco in totecuyo : yehica ca motatzin, ca omitzmochiuili. // Ma ypampa in ytetlaçotlaliz xicmotlaçotlayeculhtili, inic mitzmocneliliz, inic tlacauaz yyollotzin, inic mitzmomaquiliz inytetlamactzin ; in molhuih, in momaceualh, in micaya, in monenca, inic uelh ticaz, inic uelh tinemiz, inic amo mixtitlan, tlayoualhtitlan ticalactinemiz.
4. Yoan in canin ixpan tiquiçaz in yxiptlatzin in totecuyo, anoço yn ytlaçouan, anoço cruz, uelh ticmauiztliz, ixpan timopachoz, anoço timotlanquacoloz. Auh intla uelh yehuatl in totecuyo I.C. ynacayotzin ysanto sacramento ixpan tiquiçaz, tlapanauia inic ticmotlatlauhtizliz in yca mochi moyollo, ca moteouh, ca motlatocauh, ca motemaquixticatzin, ca motlaçotatzin. Yoan uelh ticmauiztiliz in ytocatzin I.C., yoan in ilhuitzin uelh ypan timocencauaz
5. Yoan tiquintlapaloz in ytlachiualhuan in campa cate in anoço cana, tiquinnamiquiz in pipilhtin, in tlatoque, yoan in tepan ycanime in padreme, auh yueuetzin, yn ilamatzin, yoan in icnotlacatl, in nentlacatl in amo auia, in amo paqui : yehuatl inic ciauhquetzalo, inic tiquinciauhquetzaz ; amo çan ilihuiz in tiquiciauhquetzaz, uelh qualli tlatolhtica ; amo yuhqui in tinontli ic tinemiz ; yntla uelh ticchihuaz y, ic titlacamachoz, tiyequitoloz, tiqualitoloz.
6. Yoan xicmotlaçotili, xicmocnelilhmati, xiquixtili, xiquimacaci, xicmauhcaytta, xictlacamati, xicchiuili yn tlein quinequi in yyollo in nantli, in tatli ; ca ilhuil, ca ymaceualh, ca ynemac, ca ytechpouhqui in tetlayeculhtiliztli, in tetlacamachiliztli, in temauiztililiztli. Ca amo uelh ic ihcaz, ic nemiz, in aquin amo quitlacamatiz, in amo quitlayeculhtiznequiz, in amo quimauiztiliz in ynan, in yta : içan yxco, içan icpac nemi : ca yehuatl ytoca icnopillaueliloc. // Auh yoan ma yliuiz tinen, ma yliuiz tichocholotinen, ma yliuiz taactinen in teixpan, in tenauac ; çan yuian, çan ycemel ximonemiti, ca ye qualli, ca ye yectli : ça ximocnoteca, ximopechteca, ximotolo, ximomalhcocho.
7. Yoan uelh xitenotza, uelh xitetlatlauhti, xiteixtili, xiteymacaci, xitetlacamati, xitetlaçotla : ye ic tinemiz, ye ic ticaz. Ma yehuatl youi, yxopech tictoca, y ye onca, y ye onnemi in miuintitinemi, in ymac chicha, in momatlemamali , in iquechtlan tlacuia, in ymac tlacuia ; yuelh motzinilhpia, in moquetztlatzinia, in macopiloa, in tocuileua, in tzatzi, in oyoa ; in yuhqui mixitl, in yuhqui tlapatl, in yuhqui uctli, nanacatl in oquic, in oquiqua ; in aucmo quimati ; in tetl, in quauitl quicuitiuetzi ; in quiyehecalhuia in caacoleuilia in ynan, in yta ; in aucmo quixcopaytta ; yçan yuicpa mocuecuepa, miylacatzoa ; in aucmo quimacaci, in auctle ipan quimati ; yçan yliuiz in oyoa, in tzatzi ; in aucmo yquiçayan in quiça, in aucmo ynemian in nemi, in aucmo ytlacçayan in tlacça, in aucmo ompa yxe, in aucmo ompa nacace, in auc uelh cah in ix in yollo ; in aucmo yehuatl in cuicatl, in tlatolli in queua, in quitoa ; in aucmo ytzatzian ytlatoayan in tzatzi, in tlatoa ; in aucmo yehuatl in utli, yn xopechtli in quitoca, in aucmo quiuelhcaqui in qualli tlatolli y yehuatl in eoaloni, in yhtoloni : yça yliuiz in nenemi, in chocholoa, in aactiuetzi, yça tzompachpul, yça cuitlanexpulh monemitia, in auc yuian, in auc ycemel in meoa, in moteca ; yça yuhqui in tochiciui, maçayciui, in cuexcochiuintitinemi, in ixtlatlayoatitinemi, in aucmo ompa ytzteua in analoznequi, in tlaltitechpacholoznequi ; yçan temacpa quiquiça, yçan temacpa yeeua, yçan temacpa tlatlacxotla, tlatlatelicça ; in auc uelh mana, in auc uelh motzitzquia, in auc uelh motlalhtitechpachoa ; yçan temamapeua, yçan teca momomotla, yçan teca motzotzona, yçan teca mouiuitequi, yçan tenanalhtzatiuetzi, yçan tequaquatiuetzi.
8. Auh yehuatl y in oquiçoma, in oquinenec in totecuyo, aucmo ymaçoayan in maçoatiuh, aucmo yuetzian in uetzitiuh, aucmo ycalaquian in calaquitiuh, aucmo ymiquia in miquitiuh ; çan can tçoaztli, çan can mecatl quiualhmaquitiuh ; çan can atlauhtli, çan can tepexitl quimottititiuh, quimonamictitiuh ; çan can tetl, çan can quauitl ic mouitequitiuh ; çan can çacatla, çan can quauhtla uetzitiuh, inic ompa intlaqualh mochiuaz in tzopilome, in cocoyo ; çan can techinantitlan, tecalhtitlan momayauitiuh, inic itzcuintli intlaqualh mochiuaz : yehica ayac oquitochtili, oquimaçatili, ca çan yneuian oquimochiuili, oquimopicti in aqualli, in ayectli, in tlauelilocayutl : auh ca çan yneuian omoxocomicti, omotlapaui, inic yuhqui omochocholhti, omoquaquauhti, in omotochtili, in omomaçatili, in oquinamic in tochtli, in maçatl in youi, yoan in ixtlauatl : yçan yneuian omocalaqui in quauhtla yçacatlaca : yoan çan yneuian omoquixti in axixpan, in cuitlapan ; yçan yneuian xomolli, calhtechtli ic omopacho, in omoxixini, in omomomoyauh : çan yneuian omatoyaui, omotepexiui ; ayac ytech qualaniz.
9. Auh yoan ma yca tiuetzca, ma yca timotopeuh, ma yca ticamanalo yueuetzin, in ylamatzin, anoço cucuxcatzintli, in tennecuilhtzin , in ixpupuyotzin, in ixpatzactzin, anoço tenquatzin, anoço macuecuetzin matziculhtzin matepulhtzin, anoço uilantzin, xotepulhtzin, anoço ymatzin icxitzin quiuilana, anoço nontzin nacaztapalhtzin, anoço tlatlacamiccatzintli, anoço in tlein cuculiztli ytech cah, anoço yehuatl in aquin tlatlaculhtica mococoa, anoço mixpan otlatlaco in tlein oquitlaco. Yn yzquitlamantli nimitzteneuilia, çan niman amo ynca tiuetzcaz, timotopeuaz, amo ynca timauilhtiz, amo ynca ticamanalhtiz, amo ipan titlapiquiz, amo tiquimpipinauiz, amo tiquintlaihilittaz, amo tiquintlatçilhuiz, amo tiquimihiyaz, amo tiquintelhchiuaz ; çan ic timozcaliz, çan ic titlachiaz, çan ic timiçauiz, çan ic timomauhtiz, çan ic tichocaz, çan ic titlaucuyaz, çan ic timocnotecaz, çan ic timopechtecaz yxpantzinco in totecuyo, ynic amo no yuhqui mopan mochiuaz yn iuhqui ipan omochiuh yntla ynca tiuetzcaz, ynca timauilhtiz, yntla tiquintelhchiuaz. Auh in yquin açuc tlapanauia in ytech titoneuatiuh, in tocommonamictitiuh yn tecoco, yn temamauhti, in teyçaui, yn tecototzo : cuix ye quin yquac tiualhmoxicotiuh, tiualmomamatitiuh ? Cuix ye quin yquac tiqualitotiuh : tlacahço ca nelli in quito in nechilhui in nonan, in nota : ma niccaquini, ma niccuini in yuh nechilhui ; macamo tepan nicamanalhtini, macamo niquintelhchihuani in ytlachiualhuan in Dios, ma niquintlaçotlani, ma niquintlatlauhtiani, ma niquintlauculiani, ma niquinpaccayttani, ma niquinyollaliani ; inic amo yuhqui nopan mochiuazquia, in axcan ye nopan mochiua in onoc onnonamictico in ytech ononacico in tecoco in tetoneuh in techichinatz, in ytçoaz, in ymecauh, in ycoluuh, in ytçitçicaz, in iteuh, in yquauh in totecuyo, yye notech conteca, yye notech compachoa, onechan, onetçitziqui : campa niaz ? campa nicalaquiz ? Yniuh tiquitoz y acaçucmo matlamachpan : aço ye centlamantli ypan omitzmixeuili in totecuyo, in iuhqui yehoantin yacachto ynca otiuetzcac, in ynca otimopeuh.
10. Auh amo teca timocacayauaz, amo titechichichaz, amo titeaaxixaz, amo teicpa timomapupuuaz, amono ytla yoan tictequalhtiz in tlein qualoni anoço yoaloni, amo ytla yoan ticteytiz in tlaylli ; in amo qualli, amo tlalli, amo nextli, amo çuquitl tetech ticchichiuaz : yoan in tlein amo qualoni, amo tictequalhtiz ; in amo yoaloni, amo ticteytiz, inic amo tictlatlacalhuiz in totecuyo, ynic amo ytçontlan yquatlan tiaz, yehica cenca mauiztililoni in ytlachiualhtzin in Dios. Auh intla teca timocacayauaz, amo ic titlacaquiçaz, ychilhtica, ypuctica tiquiztiaz in tlalticpac ; in ihquac timiquiz, maxix, mocuitl ytlan tactiaz ; moten, monenepilh tictotoputztiaz. Auh intla xiquimmauiztili in ytlachiualhuan in Dios, çan yuian, çan ycemelh in timomiquiliz ; yoan yuian ycemelh ximonemiti, ma tixtomauatinen, ma ticicatinen. Cana yca timotzotzonaz, timouitequiz yueuetzin, in ylamatzin, anoço cucuxcatzintli, anoço pilhtzintli : inic amo motech tlamiz anoço cana ytla chiualo, ytolo, teneualo, inic amo titetlacaualhtiz, titetlapulohtiz, inic amo titetoliniz, ypampa in amo monematiliz.
11. Yoan macana titequacoyoni, macana titetopeuh, titetlauitec, ca ic xixtli, cuitlatl ticmotlaliliz. Yoan macana yliuiz titlato, titetlatohpanaui, inic amo titetlatolhcotonaz, titetlapulolhtiz, inic amo ticteilhcaualhtiz in tlein qualli tlatolli inic nenunutzalo. Auh intlacamo melauac quitoah, in tehuatl uelh timoyehecoz intla tiquintlapatiliz in aquique in ueueyntin, in tlatoque. Yntlacamo motlatoayan, amo teoan titlatoz, tinauatiz, çan timocauaz. Auh intla no tehuatl motlatoayan, anoço titlatlaniloz, çan melauac inic titlatoz, atle tiquiztlacaytoz, ayac ticchicoytoz : uelh ticnemachiliz in motlatolh, inic titlananquiliz : amo iuhqui in tixulupitli, amo no yuhqui in timopuani inic titlatoz, inic titlananquiliz : çan ticpilhuetziz in motlatolh, inic timauiçoloz.
12. Yoan ma ticmocuitlaui in auillatolli, in camanallatolli, ca amo qualli, amo yectli teauilquixti, tetlauelilocatili, amo yuian yectli tetlaz, temayauh yn atoyac, in tepexic, in tzoazco, in mecac, quitenamictia in tetl, in quauitl.
13. Yoan ma ticmocuitlaui, ma ytech timoman in tianquiztli, yoan yn apan, yn upan ma timoquetz, ma timotlali, in oncan cah, oncan nemi yuey yteyya, yuey ytequaya in tlacateculutl, yehuatl in tecioauh, yehuatl in tetlacauh, in teaxca, in tetlatqui.
14. Yoan ma muchipa tictemo, ma muchipa tiqueleui, ticnec in qualli nexintli ; ma muchipa timopepetla, timotezcaui, ma muchipa timoyecquetz, ma muchipa timoyecchiuh, ma muchipa tiqueleui in qualli nechichiualiztli, ca çan itetlacaanaya, itetlapauiaya in tlacateculutl, çan oncan motlamalia ; aucmo yxnezticah, in cana ipan in moneyecquetzaliz, moyecchichiualiz, ic mitzatoyauiz, mitztepexiuiz in tlacateculutl cana ic mitztzotzonaz , mitzuitequiz in tecue, in teuipilh, yoan inic amo titlauelilocamachoz
15. Yn iquac in utli tictocaz, amo auiccampa titlachiaz, çan tictequimatiz in utli, amo timomatlatlaztaz, amo ticuiuilhtectaz in utli, amo tequechpan timotlatzitzquilitaz, amo tematitech titetiztzquilitaz, amo timoquechtlatlaztaz, amo ticamanalotaz, amo titeixtotocaz, amo titepapanauitaz, amo tlayacac timoquetzaz, in tlacamo otinauatiloc.
16. Yntlanelh tinauatiloz inic titeyacanaz, aço çan ic titlatlatto, in cuix timimatini ? inic qualli yez, aço occeppa oppa in titlanauatiz, inic amo tehuatl titeyacanaz. Auh intlanelh tiquinpanauia in occequintin : ayamo niman yciuhca tiquiyacanaz, oc timoquetzaz, oc ticchiaz in aço titlalhcauiloz.
17. Yoan in canin quixoayan, amo tehuatl achto tiquiçaz yntla oncate in mitzpanauiah, yehuantin achto quiçazque ; anoço calacoayan, amo tehuatl achto ticalaquiz, yehuantin achto calaquizque in mitzpanauiah : çan no yehuantin quiyacatitiezque in campa netlaliloyan : auh in canin nequetzaloyan, çan no yehuantin quiyacatitimanizque. Auh in campa tlatozque yehuantin compehualtizque, amo yyacac tiquiztiuetziz, amo yliuiz tiquincuiliz in intachcauhyo, intlacamo omitzmopepenili in totecuyo, intlacamo ytencopatzinco in tlein ticchihuaz ca ic titlatlacoz, auh in tlalhticpac tlaca in ihquac mitzittazque immimatinime, iuellanonotzalhtin, iuellazcalhtilhtin, ça niman mitzpinauizque, mitztlatemmachilizque . No yehuantin achto tlaquazque atlizque ; auh in tehuatl amo niman no tiqueleuiz in achto atliliztli tlaqualiztli, ye oc tocontemoz in tlamaceualiztli in neicnotequiliztli, niman ye tocommocuiliz in atzintli, timotematequiliz, timotecamapaquiliz ; intla tipilli amo oncan ticcauaz in mopillo, in motlatocayo, in moueyca, amoma chalhchiuitl, teuxiuitl in momac temi, amo ualh tepeuiz, çan ic tlamaceualo ypalhtzinco in Dios. Yntla çatepan timacoz in quexquichtzin in motech monequiz, amo tictlauelhcauaz : anoço atle uelh timacoz amo ic timoxicoz, amo ic titetlahilittaz, amo ic timocniuhcauaz ; açiuh quimonequilhtia in ypalhnemoani, acic mitztlamaceualhtia. Auh intla ic ximoxico, intla ic xichicotlato, ca amo uelh neciz inic titlaçopilhtzin in totecuyo : açuc achitzin in molhuilh yezquia, in mitzmomaquilizquia, ca ic ticmotlatlacalhuiliz, ic atle tonquiçaz.
18. Yoan ma yecuelh ticmocuitlaui, tiqueleui in cueytl, yuipilli, teauilhquixti, teiçolo, tecatçauh, tetlauelilocatili ; ma moyollo monan, mota ticchiuh ; ma nextepeualli, ma utlamaxalli ticmonanti, ticmotati, ic ytzontlan yquatlan tiaz in totecuyo ; ma ye oc xontlacoti xontequiti yxpantzinco ynauactzinco, ca oc tatzintli, titototzintli, ca oc tixiluti, timiyauati : in maçan yuh tichalchiuhtzintli titexiuhtzintli, in maçan yuh tiquetzalhtzintli, ma moneuian timoteteço, timomauaço. Ca yauh in cueytl yuipilli, ca tlacelia, tlatzmolini, tlaxiluti, tlamiyauati in tlalticpac, amo temociuican, oc ye ytloctzinco ximocalaqui in totecuyo, ma oc yehuatzin tlamatcatzintli in quenin muztla, in quenin huiptla ; aço ye nican uitz, aço ye nican icatiuitz in temuxtli, in eecatl, inic mitzanaz, inic mitztzitzquiz . Yntla cueytl uipilli ytlan ticalaquiznequi, titechilhuiz in timonauan, in timotauan, amo çan ticmotlaliliz, amo çan ticmitalhuiz, ca tinane ca titate, ca titquiua, ca timamalo.
18. Yoan ma yecuelh ticmocuitlaui, tiqueleui in cueytl, yuipilli, teauilhquixti, teiçolo, tecatçauh, tetlauelilocatili ; ma moyollo monan, mota ticchiuh ; ma nextepeualli, ma utlamaxalli ticmonanti, ticmotati, ic ytzontlan yquatlan tiaz in totecuyo ; ma ye oc xontlacoti xontequiti yxpantzinco ynauactzinco, ca oc tatzintli, titototzintli, ca oc tixiluti, timiyauati : in maçan yuh tichalchiuhtzintli titexiuhtzintli, in maçan yuh tiquetzalhtzintli, ma moneuian timoteteço, timomauaço. Ca yauh in cueytl yuipilli, ca tlacelia, tlatzmolini, tlaxiluti, tlamiyauati in tlalticpac, amo temociuican, oc ye ytloctzinco ximocalaqui in totecuyo, ma oc yehuatzin tlamatcatzintli in quenin muztla, in quenin huiptla ; aço ye nican uitz, aço ye nican icatiuitz in temuxtli, in eecatl, inic mitzanaz, inic mitztzitzquiz . Yntla cueytl uipilli ytlan ticalaquiznequi, titechilhuiz in timonauan, in timotauan, amo çan ticmotlaliliz, amo çan ticmitalhuiz, ca tinane ca titate, ca titquiua, ca timamalo.
19. Yoan macana tetopco, tepetlacalhco, tecomic, tecaxic timayauh, ca oncan tinotiaz, oncan tactiaz. Yoan ma tollan, ma tipato, ma auilutl ticmocuitlaui, oncan ticmonamictiz in ouy in etic, aço uelh cana ypampa tichtequiz, ca ye moyecolh in tianquizco, moca tzatziuaz : ac tictenyotiz ? ca niman nehuatl yn nimonan, yn nimota in tinechpinauhtiz in teixpan. Ye qualli, ye yectli xicmocuitlaui in tlalticpaccayutl : xitlay, xiquaquaui, xelimiqui, xinopalhtoca, ximetoca : ye tiquiz, ye ticquaz, ye ticmoquentiz, ye ic ticaz, ye ic tinemiz : ic titoloz, ic titeneualoz, ic mitziximatiz in maui, in motla, in moayolhqui ; aço quemmanian cueytl uipilli itech timopiloz : tlein quiz, tlein quiquaz ? Cuix ecachichinaz ? ca ticeuhti, ca tipati, in tiquauhtin , intocelo ; anoço centetl ontetl yxillampa ytozcatlampa uetzi in cuzcatl, in quetzalli : tlein quiz, tlein quiquaz ?
20. Ayaxcan in tlalhticpac ic nemoa : touihque tetique in timaceualhtin in atontacih in atoneuah in aualhnecini in toquizpan in toquappan, in toquechtlan in ompilhcaz ; in çan achitzin quexquichtzin ixaxalhtzintli in ichpilinalhtzintli. Yoan in tlein quizque, in tlein quicquazque, in tocuchca, in toneuhca : ca uelh ontimaliui, ca uel onchamaua in tecoco, in tetoneuh. Ayaxcayo temamauhti, inic onimitzicalhti, inic onimitzuapauh, inic otizcayac, inic otichamauac : ca uel oontlan in nacolh, in nocuitlapan, inic onicxelo, inic onictemo in oticmiti, in oticmoqualhti. Yequene in motechtzinco onicpilo in ichpilinalhtzintli, ca tianquiztla ca nanauiztla onicnentlamachti in quauhtzintli, in iztaxalhtzintli, in chilpuztectzintli. Yoan onitetlayli onitequaquauili, onicteanili in teteopil, in tecacax, inic onictematomilhti iça cemmatzin in pupuyotzintli, içan quexquichtzin ixaxalhtzintli in motettzinco omonec, inic achitzin ic ocelia, ic ontotonia in monacayotzin. Amo onimitzxiccauh , amo onimitznencauh : uelh mopampa onichocatinen, onitlaucuxtinen, amo xixtli, amo cuitlatl onimitztlalili : acan tetopco, acan tepetlacalhco, acan tecomic tecaxic onican, oniccuic, inic onimitzicalhti, inic onimitzuapauh : ça uel ontimaliuh, ça uel onchamauac in quauhyutl, in oceluyutl : çan yuian, çan ycemel in nimitzoncauhteuaz in tetloc, in tenauac.
21. Auh yoan ma ticmocuitlaui in iztlactli, in tenqualactli, ca amo yuian yectli, amo yuian qualli : ayac uelh tetloc, ayac uelh tenauac ic cah, ic nemi, çan axixpan çan cuitlapan tequixti, temayauh. Ye qualli, ye yectli intla mixpan oytoloc oteneualoc in qualli tlatolli yuel ytoloni, yuel teneualoni, in amo tlatlacoloni : intla tiquitoz, amo tictzoneuaz, amo tictlapiuiz, intlacamo yuampo, amo yoan ticuampotiz : çan ixquich in quexquich in oticcac, in tiquitoz inic amo titlatlacoz. Auh in tlein ouih mixpan mitoz, mochiuaz, amo niman tiquitoz, ticteneuaz, ticpantlaçaz : intlanelh aca mitzilhuiz in ticnextiz, in tiquitoz ; anoço aca mitztlatlaniz in ypampa in mixpan omito, omochiuh : amo tiquilhuiz, amo ticnextiz : intlacamo ac quimati, cuix yuhquin tixilutl timiyauatl ticuitlatzayanaloz ? Cuix mitic tlachiazque ? Ca yuhquin topco petlacalhco in mitic in mocuitlaxculhco, ca uel ilhpitoc, ca uel tzauctoc : ma aca in quito, ma aca in quinexti, ma aca in quimotequiuhti : macamo tehuatl in tiquitoz, in ticnextiz, in ticmotequiuhtiz : inic amo ticmonamictiz in oui, in etic, in temamauhti, inic amo oncan ticmotlaliliz in xixtli, in cuitlatl ; ca itlacamo yuhqui in otiquito in oticteneuh ca ic titlatlacauililoz, inic oncan cenca titoliniloz, tipinauhtiloz, titentzatzayanaloz.
21. Auh yoan ma ticmocuitlaui in iztlactli, in tenqualactli, ca amo yuian yectli, amo yuian qualli : ayac uelh tetloc, ayac uelh tenauac ic cah, ic nemi, çan axixpan çan cuitlapan tequixti, temayauh. Ye qualli, ye yectli intla mixpan oytoloc oteneualoc in qualli tlatolli yuel ytoloni, yuel teneualoni, in amo tlatlacoloni : intla tiquitoz, amo tictzoneuaz, amo tictlapiuiz, intlacamo yuampo, amo yoan ticuampotiz : çan ixquich in quexquich in oticcac, in tiquitoz inic amo titlatlacoz. Auh in tlein ouih mixpan mitoz, mochiuaz, amo niman tiquitoz, ticteneuaz, ticpantlaçaz : intlanelh aca mitzilhuiz in ticnextiz, in tiquitoz ; anoço aca mitztlatlaniz in ypampa in mixpan omito, omochiuh : amo tiquilhuiz, amo ticnextiz : intlacamo ac quimati, cuix yuhquin tixilutl timiyauatl ticuitlatzayanaloz ? Cuix mitic tlachiazque ? Ca yuhquin topco petlacalhco in mitic in mocuitlaxculhco, ca uel ilhpitoc, ca uel tzauctoc : ma aca in quito, ma aca in quinexti, ma aca in quimotequiuhti : macamo tehuatl in tiquitoz, in ticnextiz, in ticmotequiuhtiz : inic amo ticmonamictiz in oui, in etic, in temamauhti, inic amo oncan ticmotlaliliz in xixtli, in cuitlatl ; ca itlacamo yuhqui in otiquito in oticteneuh ca ic titlatlacauililoz, inic oncan cenca titoliniloz, tipinauhtiloz, titentzatzayanaloz.
22. Yoan intlacamo yuh ticchiuh, in yuh quimonequilhtia in Dios, intlacayemo moteyya, intlacayemo motequaya inic otietic otitequa, ca ticmotzacuilitiaz : ca ic tixamanis, ca ic tipuztequiz in tlalticpac anoço mictlan : atle ic tiualhmacoz, atle ic tiualittililoz ; çan ticnenuiz in mix in moyollo, intla yuh ticchiuaz.
23. Auh yoan ma ticmocuitlaui in tlacatlatolli, ma yuhqui timaquizcoatl, tichiquimolin timochiuhtinen ; macana tetzalan, tenepantla timotecatinen ; macana titenetecheuh, titeneixnamicti ; ma yuhqui conteuh caxteuh titenetechchalani ; ma titexixini, ma titemomoyauh. Aço uel mani in mulcaxitl in chiquiuitl, aço uel oniua, aço uel onqualo in atolatzintli in uapauacatzintli, aço uelh onoc in petlatl in icpalli, aço uelh nemaco in xuchitl, inyyetl : ma tehuatl tocontlaz in aqualli, in ayectli, in teuhtli, in tlaçolli : ma tehuatl tiquiçolo, ticcatzauh in petlatl, in icpalli, in icniyutl, in coayutl, in netlacamachiliztli, in netlaçotlaliztli : ca intla iuh ticchiuaz y, ca amo ic titlacaquiçaz, ca ticmotzacuilitiaz in quemmanian.
23. Auh yoan ma ticmocuitlaui in tlacatlatolli, ma yuhqui timaquizcoatl, tichiquimolin timochiuhtinen ; macana tetzalan, tenepantla timotecatinen ; macana titenetecheuh, titeneixnamicti ; ma yuhqui conteuh caxteuh titenetechchalani ; ma titexixini, ma titemomoyauh. Aço uel mani in mulcaxitl in chiquiuitl, aço uel oniua, aço uel onqualo in atolatzintli in uapauacatzintli, aço uelh onoc in petlatl in icpalli, aço uelh nemaco in xuchitl, inyyetl : ma tehuatl tocontlaz in aqualli, in ayectli, in teuhtli, in tlaçolli : ma tehuatl tiquiçolo, ticcatzauh in petlatl, in icpalli, in icniyutl, in coayutl, in netlacamachiliztli, in netlaçotlaliztli : ca intla iuh ticchiuaz y, ca amo ic titlacaquiçaz, ca ticmotzacuilitiaz in quemmanian.
24. Yntla aca canapa mitzmotitlaniz, intla çan ompa tiualaualoz, anoço ualteputzitoloz in omitztitlan : amo ic tiualhqualantaz, amo motenco, amo mocamac ualhpilcataz in yuhqui mopan oquichiuh, inic omitzolini, inic otimouicaya. Auh in otiualhmouicac, intla niman mitztlatlaniz in omitztitlanca, intla mitzilhuiz : quen otiquiçato in ompa otimouicaya ? Niman qualli tlatolhtica ticnanquiliz, çan yocuxca : amo ticicaz, amo niman yuh tiquilhuiz, in tlein ic omitzolini, anoço yehuatl in tlein ic oquiualauac, ic oquiualhteputzito amo ticnextiliz. Auh intla niman yuh xiquilhui, intla niman xicnextili, aço niman ic tiquinneixnamictiz, tiquinnetechehuaz : aço niman ic mauazque, momictizque. Auh in tehuatl in titenetechuani, cuix tipactiez ? Cuix nelli yez in moyollo ? Cuix quiniquac tiquitoz : macamo yuh niquitoani, inic amo mixnamiquizquiah : intla yuh tiquitoz y, cuix oc ic tompatiz ? Cuix ic tonyectiaz , ca ye timaquizcoatl ? Ca ye tichiquimolin ? çan qualli çan yectli, in quenin otiualhtoliniloc, anoço in quenin otitlachiato in tlein mochiua ; amo monexicolizpan, amo moyolhcucolpan ticualeuhtaz,ticualitotaz. Çan ticqualhtiliz in mocuic , in motlatolh, ic cenca tlapanauia ynic titlaçotlaloz, ic uelh tetloc, tenauac tinemiz.
25. Yoan macana tecue teuipilh ic timotzotzon, ic timouitec, cenca oc moyolic xonitztiuh : amo oppatiua in nemoa, çan cuel achitzinca, çan ixquichcauitl in yualhnetotonilo in ypalhtzinco in totecuyo ; çan ic cenquiça in tlalticpac
25. Yoan macana tecue teuipilh ic timotzotzon, ic timouitec, cenca oc moyolic xonitztiuh : amo oppatiua in nemoa, çan cuel achitzinca, çan ixquichcauitl in yualhnetotonilo in ypalhtzinco in totecuyo ; çan ic cenquiça in tlalticpac
26. Yoan ma yliuiz titlacacuicui, ma yliuiz titlanenec, ma yliuiz timotlatepeualhti, ma yliuiz titepanaui ; in amo molhuilh, in amo momaceualh, in amo monemac, amo çan ticmocuiliz, amo çan ticmaniliz. Ca çan yehuatzin in Dios techichiua, ca çan ycelhtzin quimotemaquilia ycecenyaca in temaceualh, in tenemac. Ca yehuatl ticmocuiliz, ticmonemiliztiz in molhuilh, in momaceualh, in monemac : ma quinyquac in omitzmaceualti in totecuyo, ipan tiez, ipan ticaz, ipan tinemiz. Amonelh niman no ipan tinemiz, intla timimatini çan icnotlacayutl ipan tinemiz, ic ueyaz in momaceualh, ca intla mopan quichiuaz in totecuyo. Auh intla tel noço ticcuiz, ayac ic quen quitoz, ayac ic tictoliniz, yehica ca maxca, ca momahceualh, ca monemac. Auh intla iliuiz, xiccui in amo momaceualh, in amo monemac, ic titoliniloz, ic tipinauhtiloz, yoan ic timoteuhpuaz ixpantzinco in totecuyo.
27. Auh yoan iquac intla aca mitzmononochiliz, amo titlatlalicuilotic, amo itla ticmauiltitiez, amo ticmoxitltlauititectiez, amo motilhma tictlatlaquatiez, amo tichichatiez, amo auic campa titlachiaz, amo timoquetzteuaz. // Yn izquitlamantli in onimitzzteneuili, intla yuh xicchiua, ca uel oncan tineciz in tiuey tlaueliloc, in amo ompa cah in mix in moyollo, ca uelh tehuatl in titlauelhcaualoni ; ca uelh tehuatl molhuilh momaceualh mochiuaz in mixitl, in tlapatl, in uctli, in nanacatl in tiquiz in tiquaz, inic tiuetziz, inic timotlapulolhtiz ; inic aucmo ticmatiz in timomayauiz in tlexuquauhyo, in tlecomalco, in atoyac, in tepexic, in timocalaquiz in tzoazco, in mecac ; in aucmo ticmatiz in ticmonamictiz in tetl, in quauitl, in xixtli, in cuitlatl, inic teixco, inic teicpac tinemiz, inic timochocholhtiz, inic timoquaquauhtiz, inic ticmonamictiz in tochtli, in mazatl youy, inic timocalaquiz in quauhtla, çacatla : in tlacamo ticcuiz, intlacamo ticanaz in nanoyutl, in tatoyutl : intlacamo ticmocaccanequiz in micaya in monenca : ye ixquich ye oncan omochiuh, omotlauelihtic, ça can tiuetzitiuh, ça can coyutl, ça can tequani ymac taquitiuh : amo tle ic tiualhmoxicoz in micantlan in moteputztlan, ca mouic onequixtiloc, onetlaeualoc, ca nel amo tican, amo ticcuic in choquiztli, in yxayutl : auh canel amo motech oticpacho in culutl, in tçitçicaztli in otiquaqualtiloya : ca çan otictlaz, oticmapeuh, inic timozcalizquia, inic titlachiazquia : ca çan tetl quauitl ypan oticma.
27. Auh yoan iquac intla aca mitzmononochiliz, amo titlatlalicuilotic, amo itla ticmauiltitiez, amo ticmoxitltlauititectiez, amo motilhma tictlatlaquatiez, amo tichichatiez, amo auic campa titlachiaz, amo timoquetzteuaz. // Yn izquitlamantli in onimitzzteneuili, intla yuh xicchiua, ca uel oncan tineciz in tiuey tlaueliloc, in amo ompa cah in mix in moyollo, ca uelh tehuatl in titlauelhcaualoni ; ca uelh tehuatl molhuilh momaceualh mochiuaz in mixitl, in tlapatl, in uctli, in nanacatl in tiquiz in tiquaz, inic tiuetziz, inic timotlapulolhtiz ; inic aucmo ticmatiz in timomayauiz in tlexuquauhyo, in tlecomalco, in atoyac, in tepexic, in timocalaquiz in tzoazco, in mecac ; in aucmo ticmatiz in ticmonamictiz in tetl, in quauitl, in xixtli, in cuitlatl, inic teixco, inic teicpac tinemiz, inic timochocholhtiz, inic timoquaquauhtiz, inic ticmonamictiz in tochtli, in mazatl youy, inic timocalaquiz in quauhtla, çacatla : in tlacamo ticcuiz, intlacamo ticanaz in nanoyutl, in tatoyutl : intlacamo ticmocaccanequiz in micaya in monenca : ye ixquich ye oncan omochiuh, omotlauelihtic, ça can tiuetzitiuh, ça can coyutl, ça can tequani ymac taquitiuh : amo tle ic tiualhmoxicoz in micantlan in moteputztlan, ca mouic onequixtiloc, onetlaeualoc, ca nel amo tican, amo ticcuic in choquiztli, in yxayutl : auh canel amo motech oticpacho in culutl, in tçitçicaztli in otiquaqualtiloya : ca çan otictlaz, oticmapeuh, inic timozcalizquia, inic titlachiazquia : ca çan tetl quauitl ypan oticma.
28. Yoan ma mixco ma mocpac ticman, inic omitzmocnelili in Dios : intla ic titlauelilocatiz, intla ic teca timocacayauaz, ca ic timoxoquaz, ic tetech timoquaz, ic ticamamaz, ic ticmociuiz in totecuyo açuc uey inic mitzpanitlaliz.
29. Yoan in iquac titlaquaz, amo oncan titetlauelitztiez, amo tictetlauelcauiliz in tlaqualli. In aquin mopan calaquiz, cequi ticmomaquiliz, aço momayanaltitiuh ; maciui in quexquittzin, ça ye otimotlamaceui. Yntla aca ynauac titlaquaz, amo tiquittaz çan titolotiez ; amo yciuhca titlaquaz, inic amo timelcimaz, timelmotlaz ; amo achto timocauaz, quin yquac timocauaz in omocauh.
30. Auh intla aca ynauac timonemitiz, titlamocuitlauiz in ichantzinco titetlaliz, titlachpanaz : ic ticaz ic tinemiz, ic tatliz ic titlaquaz in tenauac ; intla çan oncan titlaçoloz, titlacatzauaz, amo tiuecauaz. Yntla uelh timonemitiz, intla uelh ticchiuaz y in onimitzilhui, in iquac tittaloz, mopampa tetl quauitl quitoctizque in aquin amo uel nemi, in amo quitlacamati in ynan, in yta. // Auh in axcan ye ixquich ic ninoquixtia in nimonan in nimota, ic nimitzpanoa, ic nimitztetziloa, ic nimitztiçauia, ic nimitzpotonia : ma çan cana tocontlaz, toconmayauh.