cf_12_xii

folio: 43r

Reproduccion digital

NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

43r 147

] vncan iuhqujn motepexivique motepexitenque mochintin vncã onvetzque ommotepeuhque in tlaxcaltecatl in Tliliuhqujtepecatl yoan in Españoles yoã in cavallome cequj cioa vel ic ten in acalotli vel ic tzoneuh Auh in ça tlatzacutiaque ça tlacapan ça nacapan in onqujzque in vmpanoque Auh in oacito petlacalco in oc ce vncan icaca acalutli çan jvian çan matca çan tlamach çan tlamatzin in onqujzque in jpan quauhtlapechtli vncan patito vncan imjhio qujcujque vncã moqujchquetzque Auh in oacito popotlan otlatvic otlanez ie oqujcheuhtivi ie veca motlamatilitivi Auh njmã ie ic qujmjcaoatztivi qujmololhujtivi intech icativi in Mexica qujmaantivi in tlaxcalteca yoã in Españoles mjctivi auh no mjctilo in Mexica in tlatilulca [fol r

43r 148

] necoc mjcoatiuh tlacupan qujnqujxtique in qujntoca Auh in oqujnqujxtito Tiliuhcan xocotlihiovican vncan in xoxocotla vncan in iaumjc in chimalpupuca in jpiltzin Motecuçoma in jpan qujçato mjntoc tiatzõtectica yoan vivitectoc çã ie no vncan in mjc Tlaltecatzin tepanecatl tecutli in qujniacanaia in qujntlaixtlatitivia qujmotlaxilitivia qujmotequjlitivia qujmoquechilitivia in Españoles njmã ie ic companavique in Tepçolatl (ce atoiatontli) vmpanoque onapanoque in vncan tepçolac njmã ic ontlecoque in acueco ommotlalito otoncalpulco quauhtenaniotoc quauhtenametoc in itvalli vncã mocevique mocecevique yoã vncan ihiio cujque imjhio qujcujque vncan patito vncã qujnnamjqujco in teucalhujacan in valteiacan