17v 46

] auh qujttaia qujmaceoaia in jneiollaliliz in jnetlamachtil pactinenca vellamatia in jquac ipan mjmatia ytonal qujtoznequj in jquac vel monotzaia in vel ontlamaceoa Auh in aqujn amo ipan mjmatia in atle ipan qujttaia çan qujtlavelia yn jtonal ca iuh mjtoa in jquac aqujn cujcanj anoço aca toltecatl tlachichiuhquj intla ie vnca qujquanj ye vnca ynecujltonol auh ie conpopoa ijxco ijcpac ie qujmana contepopoaltia yz ic moquetza iz ic moqujxtia ic teijxco teicpac nemj ic atlamattinemj ic cuecuenoti injx injiollo in jcujcanjo in inemach injc tlatlalianj injc tlaiolhujanj injc cujcapiqujnj injc cujcatoltecatl auh intla cana coanotzalo cuicatlalhujlo tlacaqujtilo molcaoaltilo aocmo vmpa conjtta aoc tle ipan qujtta in javiaca in jtzopelica in tloque in naoaque in xochitl in jetl in atl in tlaqualli auh in ne tilmatli ipampa ca nel ie muchi vnca in jchan ca aoc tle monectoc aoc tle qujtemachia in iuh momati ioan in tenan in teta in tecutli in achcauhtli yiaotequjoa aoc tle ipan qujtta aoc ac tle conpoa aoc ac quixtilia aoc no iellatoa in aca qujnamjquj in qujmotlapalhuja [fol v