8 Relacion de Chimalpahin

folio: 1r

Reproduccion digital

8 Relacion de Chimalpahin 1r
NahuatlNotas Traducción (no todos los textos tienen estas opciones)
Estimado Usuario, en la versión en nahuatl original, usted podrá editar los textos pero el sistema no guardará dichos cambios, por favor tenga presente que cuando usted salga de cada página, su edición se perderá.
Cuado usted pulsa dos veces sobre una palabra, el sistema la buscará en los diccionarios.

1r 4

Auh ynin omoteneuh huehuetlahtolli yn itech tlaquixtilli tlacopintli amoxtli libro quimopialia omoteneuhtzino Don vicente de la anunciacion ^y nican ye mihtoz ye motenehuaz nicnotlatlanili ypampa nehuatl Don domingo de S Anton Muñon chimalpahin quauhtlehuanitzin nicnolhuili campa oticmoquixtili yn ixquich huehuetlahtolli Tzacualtitlan Tenancayotl nican oticmihcuilhui y huel momatzintica ypampa niquixi mati y momatzin yc timocuecuetziuhcatlacuilhuia yc niman onechmonanquilili oquimihtalhui noxhuiuhtzine xicmomachilti ynin Texamatlacuilloli huehuetlahtocatlacamecayotlacuilolli nican ticmottilia ca nechmocahuililitia y nottatzin catca machcohcoltzin Don Miguel de S tiago teuhcxacantzin catca auh çan huel quinamiqui ynin libro ynic tlatecpantli omoteneuh tlahtocatlacamecayotl ompa ychantzinco niquixtito niccopinato y nomontatzin catca Don Rodrigo de rosas Xohecatzin pilli catca Ytztlacoçauhcâ ytech ce huey libro huecapan ycalcuac manca moch oncan ytech ca ytech ycuiliuhtoc yn ytlahtollo ynic macuiltlayacatl altepetl yn itztlacoçauhcan yn tecuanipan yn Panohuayan yn tlaylotlacan Teohuacan amo noconcopin amo nic quixti auh çan iyoca noconquixti niccopin yn itlahtollo nican centlayacatl altepetl Tzacualtitlan Tenanco auh// yuh niccopin in huehuetlahtolli ça n oc ceppa oncan noconmah yn calcuac amo nel ça n oncan opoliuh ynin huey huehue libro aoc tle neci ahço çan oncan opallan auh çan iyoca noconcopin ynî ytlahtollo nican altepetl tzacualtitlan Tenanco auh çan oncan niccauh yn oc nauhtlayacatl altepetl ytlahtollo auh ynin onicteneuh huey huehue libro huel ymatica ycuecuetziuhcatlacuiloltzin mochiuh yn onicnotenehuili nomonttatzin catca Don Rodrigo de Rojas xohecatzin catca ytlan escriuanotic in Andres de S tiago xochitototzin calli xuchimilco ychan catca nican Jueztico yn ipan altepetl Amaquemecan ypan xihuitl de años yhcuac tlacenquixtilli tlacentlalili yhcuac tlaneltitlili ynin huehue tlahtolli yn ixquich nican ye mihtoz ye motenehuaz ipantzinco yhcuac tlahtocati in tlacatl Señor Don Antonio de Mendoça y huel achto visurrey mochiuhtzinoco Mexico Tenuchtitlan yhuan moch ic nohuiyan Nueva españa ye yuh matlactlonnahui xihuitl motlahtocatilia yn ihcuac ytencopatzinco nican Amaquemecan quihualmihualli omoteneuh Juez Andres de S tiago xochitototzin yhcuac ytlacauhticatca in nican omotenteuh altepetl Amaquemecan mahuaya yn omêtin tlahtoque catca ynic ce yehuatl yn Don Thomas de S Martin quetzalmaçatzin chichimeca teuhctli Tlahtoani catca yn ompa omoteneuh yztlacoçauhcan  Totollimpa Amaquemecan yn yhcuac yn ye yuh cempohuallonchicuacen xihuitl tlahtocati çan iteyccauhtzin yn inehuan mahuayan yn itoca Don Juan de Sandoval tecuanxayacatzin Teohua teuhctli tlahtohuani catca tlaillotlacan Amaquemecan yn ihcuac ^y ye yuh cenpohuallonnahui xihuitl tlahtocati in Teohuacan yehuatl pehuaya ^y yn cahuaya ytiachcauhtzin auh ynic nican hualcallac Juez quin yehuatl quinnenotzaltico quin cepan tlacualtico ynic quimicniuhtlaco auh yhuan ynin omoteneuhque omentin tlahtoque catca ca quipopollohuaya yn oc Excampa tlahtocayotl yn oncan catca huel cehcen petlatl ycpalli tlahtocayotica ynic ceccan ye oncan in in tzacualtitlan Tenanco chiconcohuac yhuan Tecuanipan yhuan panohuayan yn iuh quinequia yn iExcanixti yn aocac oncan tlahtocatizquia aocmo connequia ynic oncan ceme tepilhuâ Teyxhuihuanyxquetzalozquia ynic oncan tlahtocatizquia ynic cecenyaca cecenme quipiazque ymaltepeuh yn iuh quinequia omoteneuhque omentin tlahtoque amo çan iyocan oncan y huel yntlahtocatian y huel yyeyampa in tlahtocatizque auh ca çan no yhuan quixtocaya huel quimotechtica yn omoteneuh ompa oc Excampa tlahtocayotl y yeppa huecauh nepa ôcan oncatca huel quipoloca quitecuilica auh ypâapa yehuatl in ynic cenpohualxihuitl in ça cactimanca yn aocac tlahtocat tzacualtitlan Tenâco ça quauhtlahtolloc no yuh tlamanca yzqui xihuitl in tecuanipan yhuan Panohuayan auh yniqu ipampa yn iuh omoteneuh in ça quauhtlahtoloc yn iExcanixti ^y ynic aoaca^q tlahto^q catca in ça cactimanca auh macihui yn iuh omihto ^y in ça quauhtlahtolloc yn iExcanixti miec xihuitl auh yece ye omoteneuh ca huel yExcanixti huel quicuica quimotechtihca yn etlayacatl altepetl yhuan tlahtocayotl ynin ça yçeltin omoteneuhque omentin tlahtoque huel yuh quinequia ça huel yceltin ^y tlacamachozquia yhuan ça ^yceltin yn intecpan tlacenmachozquia y tlatecpanolozquia in tecpanozquia in tequitlacaquizquia yn ixquichtin tlaçopipiltin yn oncan tlahtocatepilhuan tlahtocateyxhuihuan yn ipan omoteneuh Excampa tzacualtitlan Tenanca yhuan Tecuanipan tlaca yhuan Panohuayan tlaca yhuâ in oncan in yzquican macehualtin moch quinmomacehualitiaya ynic cenca hueycococ Teopouhqui Techichinatz Tetoliniliztli yn techquipachohuaya ynic quinnotzaya amo cualtica tlahtolica Auh huel quinchiuhca ynca mocahcayahuaya ynic cequintin cholloca yhuan oc cequîtin yc cen yah^q yc quitlalcehuique yn altepetl Amaquemecan yn tlaçopipiltin yn iuh yehuantin tlayllotlaque Tecalco tlaca quichiuh^q nican tzacualtitlan tenanco pouhque catca auh yhcuac ompa callacque ompa mopouhque yn inxeliuhcayopan mocuepque in tenanco Tepopolla Texocpalco yc cen ompa yahque aoqu ic ohualmocuepque o yuhqui yn yn quichihuaco omoteneuhque omentin tlahtoque catca in omenico ye ypâ chritianoyotl aocac huel ynmac tlahtohuaya ynic cenca otlatollinico yhuan otlamahmauhtico yn imacuilcanixti nican ypan altepetl Amaquemecan Ynic niman oquiteylhuito Mexico yxpantzinco yn omteneuhtzino tlahtohuani Don Antonio de Mendoça visurrey auh yzcate nican Tocateneuhticate y yehuantin yahque Mexico yn quichihuato Pleyto Eyntin pipiltin ynic ce ytoca Don Pablo mocuatlahuitectzin yhuan ymach ytoca Helias de S Juan Tetzauh yllamatzin ynin omentin ce ypiltzin ce yxhuiuh in tlacatl Toyaotzin chichimeca Teuhctli tlahtohuani catca ytztlacoçauhcan ynic Ey ytoca Thoribio quimichcual tecpoyoachcauhtli ynin çan quauhpilli catca yhuan macuiltin teopan tlaca catca ynic ce ytoca Domingo xuarez fiscal catca ynic ome ytoca Pedro cuetzpal ynic Ey ytoca Melchior Ordiz Ynic nahui ytoca Joseph de Sta Maria tzilintoc ynic macuili ytoca Leonardo de S Tiago Moçauhquitta in macuiltin in yehuantin amatlacuilloque capitulos quintlalilique yn imomextin omoteneuhque tlahtoque Don Thomas de San Martin quetzalmaçatzin yhuan yteyccauh Don Juan de Sandoual Tecuanxayacatzin huel quintlalilique quimicuilhuique yn ixquichtlamantli in tle in quichihuaya ynic tlatoliniaya ynic quintlaecoltiaya yn izqui campa macehualtin yhuan yn occequi tlamantli yc tecamocahca yahuaya moch capitulo ypan quintlalilique ynic quimottitilito yn omoteneuh tlahtohuani Don Antonio de Mendoça visurrey yn o yuh quimottili ^y yc niman ypâpa yn nican quihualmihualli yn omteneuh Juez Andres de S Tago xuchitototzin ynic yehuatl tlachiaco moch quitehtemoco yn quenin catqui ynic tomacuilcantian macuitlayacatl altepetl Ama^qmecan yn iuh cacatqui ytlatlahtollo motenehua y tetzonaltepetl yn iuh huel cehcen ahxiliztli titlan ypil catca telchiuh] ticpia yhuan macuilli tlahtocayotl auh tel ynic tlamacuilcantilia tlahtocayotl motenehua teohua teuhcyotl yn ompa catca tlayllotlacan ynin tlahtocayotl amo quihualhuicaque ompa yn campa huallehuaque tlayllotlaque ynic nican motlallico Ama^qmecan amo hualpillotiaque yn  imaxiliztica auh ynic ye cecni maltepeyttoticate tlayllotlaque ynic ce tlahtocayotl quipia ca ye quin iz peuh itzintic ypan xihuitl de años auh çan oncan in ytech yn iztlacoçauhcan tlahtocayotl ohualquiz in tlahtocayotl teohua teuhcyotl inic peuh motlalli tlayllotlacn ynin omoteneuh Teohua teuhcyotl in ça tepan cencaquihueyllico quihuecapanoco quimahuizçotico in ihcuac oncan in tlahtocatico tlayllotlacan in cenca chicahuac tlapaltic in huey yaotachcauh catca i huel achtopa yehuatl ytoca mochiuh huehue Cacamatzin teohua teuhctli yehuatl in in quincenyacanaya yaoyotica Tepehualiztica yn izqui altepetl in mocentenehua chalca ynic ompa quiquetzato inquaxoch chalca yn techixco ytztapallapan caltenco yehica ynin omoteneuh huehue cacamatzin yn iuh quinequia acan Mexico yezquia (auh yn iuh conitohua yehuantin huehuetque Mexica Tenuchca yn ihcuac quimonyaochihuaya Cacamatzin oc ompa in  chapoltepec yc catca Mexica chichimeca oc yehuatl ypan y huel achto intlahtocauh catca yn itoca huehue huitzilihuitl ynin ça tepan maltic cacique yehuantin yn culhuaque yn ihcuac nauhcampa quinyaoyahualloque mexica yn oncan chapultepec auh yn ihcuac yn o yuh cacique culhuaque yn omoteneuh tlahtohuani huehue huitzilihuitl yc niman ça tepan ompa quihuica^q in culhuaque yn inchan culhuacan ompa quimictito // auh ayac ypiltzin in quicauhtia çan ic cen mixpopolotia auh ynic niman yehuantin Mexica ytencopa yn inteouh catca huitzillopuchtli huallehuaque chapultepec oncan hualmicuanique in culhuacan quin oncan in quitlallico ynic oc yehuatl quinyacanaz in Tenuchtzin oquauhtlahto ynin çan Mexicatl amo pilli cenpohuallonmacuilli xihuitl yn oncan culhuacan quinyacan Mexica yece ynin omoteneuh Tenuchtzin

1r 5

macichui yn amo tlahtohuani catca yece ca yuhqui n quitlahtocapohuaya Mexica quicemittaya çan içel quitlacamatia yn ica tlein quinnahuatiaya ytlapacholhuan Mexica ynic yehuatl oncan culhuacan quihuallehualti ynic yaoyotica quinhualtocaque quinhualyacantia in Mexica quimaxitico yn oncan Tenuchtitlan yc motlallico ynic oncan oc no cenpohualloncaxtolli ypan nauhxihuitl oquinyacanaco yn omoteneuh Tenuchtzin ynic yehuatl ynehuan omoteneuh huehue cacamatzin Teohua teuhctli monamiquia yaoyotica mopehuaya necoccampa in ihcuac ayamo yuh motlahtocatlaliaya in tlacatl Acamipichtli in ye no yehuatl contzintito tlahtocayotl Tenuchtitlan oncan culhuacan quitlanico in Mexica Tenuchca ynic intlahtocauh mochiuh auh ynin omoteneuh tlacatl Acamapichtli in ipan xihuitl de años motlahtocatlalli Tenuchtitlan çâ no ypan y momiquilli tlacatl cacamatzin teohua teuhctli tlahtohuani catca nican tlaylotlacan Ama^qmecan o yehuatl in yn itlahtollo yniqu iuh quinequia acan Mexico Yezquia ynic quimonpehuaya Mexica ach quen mochihuazquia ytlacamo çan quitonallanque Tepaneca yc momiquilli omoteneuh huehue cacamatzin yehica ca nahualli catca ynin huey yn itenyo quicauhtia yn intlan yxquichtin chalca yn iyoquichtiliztica ytla ye oc nemini o yehuatl in yn itenyo ynic macuiltlayacatl yn ipan tlayllotlacayotl ynic yehuatl omoteneuh Juez Andres de S Tiago Xochitototzin mochi quitemoco in macuilcan huehuetlahtocatlacamecayotl yn iuh catqui huel cehcen tlahtocayotl ynic tomacuilcantian ticate auh yn ipampa yn ynic mochi quitemoco yn omotenuh Juez yn huehuealtepenenonotzaliztlahtolli in quenin catqui ynic tomacuilcantian ynic yehuantin nicâ huehuetque tlaçopipiltin catca in necentlaliliztica ihcuac quinemilique quicenquixtihque y huehuetlahtolli yhuan amoxpan quitecpanque camoxyhcuilloque yn iuh cacatqui macuiltlayacatl yniqu ixpan  quinextihque huel yuh quittitique y yehuatl omoteneuh Juez huel nel tiliztlahtoltlatecpanpa in quitlachialtihque huehuetque catca ca nel huel iuhque catca yn amo huel yztlacatia teyxpan huel quimellauhcatlatecpanilique in tlahtocatlacamecayotica in tlapalhuehuetlahtocatlacamecayotlacuiloltica ynic tomacuilcantian yn itechpa ynic huel cehcen ahxiliztli hecoliztli ticpia yhuan huel cehcen tlahtocayotl oncan mopia ca y nauhcanme huel ompa nican huallh tocayotiaque in can in chicomoztoc huallehuaque ynic nican huallehua^q ynic nican aahcico ynic hehecoque ^y nauhtlamanixtin huehuetque chichimeca catca ynic çan yehuatl ypan hualhuillohuac yn oc nepa tlatzintla ypehuayâ ypan centlamantli huehuetlahuiquiliztli catca ynic hualhuillohuac quihualmomacatiaque yn intlahuiquiliz yn oc yehuantin impan centlamâtin huhuetque tlahtoque catca auh çâ nimâ ayc cana quicotonque yhuan ayc huel aquin oquinpolhuica in ihquac oc yehuan// moyocatlahtalhuiaya yn ayemo can tetech pohuia ynic nican macuilcan quipiaya tlahtocapetlatl ^y tlahtocaycpalli tlahto^q ca çan mochipa ceceyaca cececni çan intech catca quihualpixtiaque yn ixquichica ihuac momiquiliaya çan quihualmomamacatiaque çan ic hualmotlalitiaque hualmocaupeuhtiaque in tlahtoque yn izquicampa ynic macuilcan catca tlahtocayotl ynic ayc ceppa campa opoliuhque tlahtoque yn ixquichica ynic oncan ypan î xihuitl de años ynic techpehuaco tichalca in tlacatl huehue Moteuhcçuma ylhuicaminatzin tlahtohuani catca Mexico Tenuchtitlan ynic nican Amaquemecan hualcallac Quin yehuatl techpolhuica yn omoteneuh nican n oncatca macuilcâ tlahtocayotl Amaquemecan yhuan yn izquican ynic mocentenehua chalco yn izquican oncâ tlahtocatihuaya yn oc oncan catca altepetl tlacochcalco atenco ihcuac micuani yn axcan ye motenehua tlalmanalco yhuan acxotlan yhuan chimalhuacan nohuiyan quipolloca in tlahtocayotl huel ixquinchica cenpohuallomome xihuitl yn aocac tlahtocat çan ocuauhtlahtolloc nohuiyan ynic cen Chalco auh yn o yuh techpeuh tichalca yn omoteneuh huehue Moteuhcçuma ylhuicaminatzin çan macuilxihuitl in timacehualhuan ticatca ynic niman onmomiquillico ypan xihuitl de años auh çâ niman ipan in yn omoteneuh xihuitl quixquetztia yehuatl yn ixhuiuhtzin oncâ hualmotlahtocatlalli in tlacatl Axayacatzin yc chicuacen in tlahtohuani muchiuh in Tenuchtitlan in tlahtocat matlactlomome xihuitl auh yn ixquichica yn amo noyac tlahtocat ynic macuilcan nican Ama^qmecan yhuan yn izquican omoteneuh ynic cen chalco çan nohuiyan ocuauhtlahtolloc auh yn omomiquillico tlacatl Axayacatzin ypan xihuitl de años auh çan niman ipa// yn omoteneuh xihuitl oncan hualmotlahtocatlalli in tlacatl Tiçocicatzin ynin tlahtocat Tenuchtitlan chicuacen xihuitl auh y no yxquichica yn anoyac tlahtocat ynic macuilcan nican Amaquemecan yhuâ yn izquican omoteneuh yc cen chalco çan ye quauhtlahtolloc auh yn omoteneuh huey tlahtohuani Tiçocicatzin ye ymiquiztempa in quintemo in yehuantin tlaçopipiltin in tlahtocapipiltin yn izquican nican tepilhuan ynic cennohuiyan chalco ynic ye no yehuatl quincuepillico yn inteuhcyo yn intlahtocayo yn inpetl ymicpal chalca in quincuillica in quinpolhica yn incoltzin catca huey tlahtohuani huehue Moteuhcçuma ylhuicaminatzin yn ihcuac techpeuh ticenchalca auh ynic quintemo tlacatl tiçocicatzin ynic quin hualteantla nican yzquican yc cen chalco yn izquintin tlaçotlahtocapipiltin yn inpilhuan ymixhuihuan in tlahtoque catca yn inpan poliuh yn inpan mantia chacayotl auh ca temoloque in campa cequintin motlatihtinemia tlahtocapipiltin yn o yuh temolloque yn o yuh nezque yc niman huicoque in Mexico tenuchtitlan quinnextito yxpan yn omoteneuh huey tlahtohuani Tiçocicatzin auh yn o yuh quimittac yn o yuh yttitiloque tlahtocapipiltin chalca yc niman quincuepilli quinmacac yn intlahtocayo in copilli corona çan oc chicomentin in quihualtlahtocatlalli yn izquican yc cen chalco yn oncan yeppa mopiaya yn achi huehueyxtiticatca tlahtocayotl yn oquinpolhuica yxquichica omoteneuh cempohuallomome xihuitl auh çan oc omentin yn quî hualtlahtocatlalli nican Amaquemecan ynic ce yehuatl in tlacatl Toyaotzin chichimecateuhctli mochiuh in ytztlacoçauhcan ynic ome yehuatl ^y tlacatl Cacametzin ynic teomeca yn iuhqui ^ytoca ^y mochiuh teohua teuhctli mochiuh yn tlayllotlacan auh yn o yuh hualtetlahtocatlalli nican chalco yn omoteneuh huey tlahtohuani tiçocicatzin yc niman momiquilli ypan xihuitl de años auh çâ niman yhcuac yn ipan in omoteneuh xihuitl oncan hualmotlahtocatlalli yn iteyccauh yehuatl in tlacatl yn itoca Ahuitzotzin yc chicuey tlahtohuani mochiuh in Mexico Tenuchtitlan quin yehuatl in quihualcencauh yn izqui altepetl ynic ye cennohuiyan chalco quîhualtlalli tlahtoque yn oncan oc quezquican polihuia yn oc quicauh yn ayemo// quintlallitia tlahtoque yn omoteneuh tlahtohuani Tiçocicatzin auh yn omoteneuh huey tlahtohuani Ahuitzotzin ye quin yehuatl quihualtlahtocatlalli nican tzacualtitlan Tenanco y tlacpac omotocateneuh tlacatl huehueyotzintli tlayllotlac teuhctli mochiuh ypiltzin in yhuehueyo mochiuh ynic ome ytoca cacamatzin teohua teuhctli yn iuh omihto tlacpac in tlacatl Ahuitzotzin çan cenquinhualtlahtocatlalli yn omoteneuh huehueyotzintli yn itoca Quauhcehcecuitzin tlamaocatl teuhctli mochiuh tlahtohuani Panohuayan in quinhualtlahtocatlalli ypan xihuitl de años auh yn omoteneuh tlahtohuani ahuitzotzin ynic macuilli ça tepan quihualla xilti nican Amaquemecan in quihualtlahtocatlalli ypan xihuitl de años yehuatl in tlacatl Miccacalcatl tlaltetecuintzin chimeca teuhctli mochiuh tlahtohuani Tecuanipan ypampa ynantzin ynic nican tlahtocatico auh yn ittatzin catca yehuatl in tlacatl Tlilpotoncatzin cihuacohuatl tlahtocapilli Mexico tenuchtitlan ynin huel ytlan catca yteyxtlaticauh ytenahnamicauh catca yn omotenuh tlahtohuani Ahuitzotzin ynin Ahuitzotzin yehuatl quihualcetilli in ome tlahtocayotl oncatca nican ypan tzacualtitlan Tenancayotl ytech cetiac yn omoteneuh huehueyotzintli ynic tlayllotlac teuhctli mochiuh auh aocmo quinec yn ahuitzotzin ynic oc ce tlahtohuani ompa motlalizquia atlauhtlan auh ytla quinequini Ahuitzotzin ynic oc ceppa quintlalizquia omentin tlahtoque in nican tzacualtitlan tenanco yn omoteneuh huehueyotzintli ye ompa tlahtocatizquia yn atlauhtlan yehica ca ompa Tepiltzin mochiuh auh ynic macoc yn oncan in Tecpan tlayllotlacan tlahtocayotl ynic tlayllotlac teuhctli mochiuh ca çan texihxicoliztica teca necahcayahualiztica yehuatl quichiuh ypan tlahto yn ittatzin omoteneuh cacamatzin teohua teuhctli yn ompa ye tlahtocatia ompa canaco yn tlayllotlacan Amaqêmecan Teohuacan auh yn oncan in omoteneuh tlayllotlacan Tenanco auh ca huel yehuatl oncan nemaque in tlahtocayotica y tlacpac ye cecni omoteneuh yn itoca xiuhtzin tlatquicatzin yehuatl tlahtohuani tlayllotlac teuhctli mochihuazquia auh yehica ce yehuatl huel oncan in Tepiltzin ytlaçopiltzin catca yn omoteneuh tlacatl Quauhtlehuanitzin tlayllotlac teuhctli tlahtohuani catca yn oncan in omoteneuh Tecpan tlayllotlacan yn ipan mantia ynic poliuh chalcayotl yn ihcuac omoteneuh techpeuh Mexicatl auh macihui yn iuh mihtohua yn techpeuh Mexicatl in tichalca yece in ça cemi yhcuac tlamico yaoyotl ayac maltic ayac ceme quimacique yn izquintin nican tlahtocatia ynic cen ypan chalcayotl auh ca çan mochintin mohuicaque quitlalcahuique yn imaltepeuh yn oncan tlahtocatia yn ihcuac oquittaque ye incallacallaqui Mexica yc quihualcenmatque yn amo huel ynmac motlaçazque Mexico tlahtoque ynic çan mohuicaque tlahtoque chalca huexotzinco tetlan mocallaquito yuh mihtohua yn ompa ya achto celiloque yn amaquemecan tlahtoque Auh tlalmanalco yhuan chimalhuacan tlahtoque ça tepan in callaquillotique ynic celiloque huexotzinco auh ça ynpilhuan in quincauhtiaque nican yzquican chalco ynic yehuantin ça tepan otlapiltillique auh yn omoteneuh tlahtohuani Quauhtlehuanitzin tlayllotlac teuhctli catca yn ihcuac // mohuicac huexotzinco ynic mihtohua panhuetz auh ca çan omentin ^y nican tzacualtitlan tenanco quincauhtia ytlaçopilhuantzintzin ynic ce ya yehuatl yn omoteneuh yn itoca xiuhtzin tlatquic Teuhctli çan icentepiltzin catca yn oquichtli ynic huel yehuatl ytech pouhticatca tlahtocayotl yn oncan in omoteneuh tecpan tlayllotlacan ca huel oncan in tlaxillacalyacatl yhuan huel achto oncan tlahtolloyan catca yuh cacicama yn omoteneuh Ahuitzotzin tlahtohuani catca Tenuchtitlan ypampa yn amo huel quipollo yn oncan in tlahtocayotl auh ynic omentin ypilhuantzintzin quincauhtia omoteneuh tlahtohuani Quauhtlehuanitzin tlayllotlac teuhctli cihuatzintli ytoca Teoxutzin ynin ycihuan mochiuh yn omoteneuh ynic o// ytoca cacamatzin teohua teuhctli ynic yehuâtin quichihuaque oncan motlacatilli in tlacatl Don Alonso gregorio Quauhtlehuanitzin tlacochcalcatl teuhctli ynin no ce ypiltzin quichiuhtia yehuatzin yn tlacatl Don feliciano de la Ssumpcion calmaçacatzin ye tlacpac omotenehu in

1r 6

Auh macihui yn omoteneuh yn oc ce tlahtocayotl ompa catca yn Atlauhtlan camo cenca hueycan ca çan itoquillo mochiuhticatca y tlayllotlacan tlahtocayotl huell oncan in hueycan tlahtolloyan catca ynic tzacualtitlan tenanco auh ynic  çan itoquillo mochiuhticatca yn achi huey tlahtocayotl catca tlayllotlacan yn atlauhtlan ynic amo cenca huey catca yn ompa tlahtocayotl ypampa yn quipollo yuh cacicama yn omoteneuh huey tlahtohuani Ahuitzotzin aocac tahtohuani oncan quihualtlalli yn atlauhtlan Oyhui yn ynic hueycan catca oncan omoteneuh tlayllotlacan ynic huel oncan in yehuatl omoteneuh tlacatl xiuhtzin tlatquicatzin teuhctli ytech pohuia yyaxca catca yn oncan in tlahtocayotl tlayllotlacan catca yn quicuillique çan texihxicoliztica // Auh amo yehuantin intechpohuia yn omoteneuhque Atlauhtlan tepilhuan pipiltin amo yehuantin ymaxca catca in tlahtocayotl tlayllotlacan auh yehica ypampa ca yuh huallaque yuh huallotlatocatiaque yn oc ye  nepa ye  huecauh yn  ihquac ayemo yuh techpehuaya Mexicatl ca amo huel quimocuiliaya amo no huel quimopatiliaya yn inpetl ymicpal yn îtlahtocayo ca çan huel nononqua catca çan huel yyeyeyan momatticatca auh ynic nican quipiaya altepetl cetlayacatl barrio principal Tzacualtitlan Tenancayotl ca concahuiticatca in tlahtoque yhuan ymomextin quitzontequia yn  ipan tle y Justicia quichihuaya achtopa quicaquia in tlahtohuani tlayllotlacan in tle y// innetequipachol oncatca tzacualtitlan Tenanca auh ça tepan quicaquia çan contenotzallania in atlauhtlan tlahtohuani çan hualhuia oncan in tecpan tlayllotlacan yn ichan tlahtocatachcauh catca oncan quicaquiltiaya in tle y innetequipachol tenanca oncan quimocepanyeyecalhuiaya ynic ynehuan quitzontequizque auh no oncan quinhualnahnamiquia yn teyxtlatiliztica in consejotica yn oc omentin omoteneuhque tlacpac teuhctlahtoque in tlacatecpan Tlacateuhtli yhuan amilco tlacatehcutli quinuahcahuiaya ynic tle yn Justicia quichihuaya ypan tzacualtitlan tenancayotl ynic qualli yectli yc otlamaniltico yuhqui n çan ce yyollo catca ynic ayc omixnamiquico ahnoço omoyaochiuh^q çan cemihcac tlamatca catca in tlahtoque yhuan inmacehualhuan O yuhqui yn in tlamanca yn iuh niman ye onnecitiuh tlayxpan yn ipan in huehuenemilizamoxtli chronica

1r 7

Auh macihui in yehuatl omoteneuh tlacatl huehueyotzintli yn oncan in omoteneuh tlahtocatico tlayllotlacan yece ca yuh quihtotihui yn ixquichtin huehuetque tlaçopipiltin ocatca ca ynic nican tzacualtitlan tenanco tlayllotlacan quihualtlahtocatlalli Huehueyotl yn Ahutzotzin Mexico Tenuchtitlan tlahtohuani catca ca çan tlanepantla quihuallali ynic necoccampa quipiaya tlahtocayotl nican ypan tlaxillacalyacatl tlayllotlacan yhuan ypan ynic ontlaxillacalyacatl atlauhtlan yece huel oc cenca nican tlayllotlacan yn tlahtocatico huehueyotzintli ynic tlayllotlac teuhctli mochiuh oncan in cetiac in tlahtocayotl tzacualtitlan tenanco ypan in tlahtocayotl atlauhtlan yn omoteneuh tlahtohuani Ahuitzotzin yece omentin Teuhctlahtoque ytlan quihuallalli in huehueyotl ynic amo quimocemaxcatiz omoteneuh occan tlahtocayotl yhuan ynic amo no niman quicenpoloz yn iuh nepa tlatzintla hualyetia tlahtocayotl yyocanixtli oncan quihuallali teuhctlahtoque in tlahtozque in quinahnamiquizque in teyxtlatiliztica in tlahtohuani yehuatl ypampa yn ynic mihtohua çan tlanepantla catca in Huehueyotzintli yn itlahtocatilizpan ynic ce Teuhctlahto ytlan quihuallali yn oncan in tlayllotlacan yn ahuitzotzin yehuatl yn omoteneuh y huel oncan in Tepiltzin xiuhtzin tlatquicatzin ça teuhctlahto tlayllotlac Teuhctli quihualchiuh auh ca huel yehuatl in nican tlahtocatizquia huicoca in Mexico auh ynic ome Teuhctlahto quihuallali tlahtohuani Ahutzotzin ompa yn atlauhtlan yehuatl quihuallali yn itoca Tetlatzin atlauhtecatl teuhctli quihualchiuh ynin yuhqui yn ompa tlahtocapouhticatca/ lauhtlan auh ynin omêtin omoteneuhque Teuhctlahtoque ca ymomextin mochipa quintemachiticatca quinahnamicticatca yn omoteneuh tlahtohuani huehueyotzintli amo tle huel quichihuaya amo huel mixcahuiya in tle yn quitzontequia Justiciatica intlacamo ymeyxtin quicepanhuiaya quecahuiaya tlatzontequia ynic qualli yectli otlamanitico

Folios: 0r  1r  2r